رواية المسؤولية الحلقات 16"17"18"19"20 بقلم طارق اللبيب
ﺍﻟﻤﺴﺆﻭﻟﻴﻪ ..
ﺍﻟﺤﻠﻘﺔ ..16
ﺑﻘﻠﻢ ﻃﺎﺭﻕ ﺍﻟﻠﺒﻴﺐ ..
ﺍﻫﺎ ﻧﻮﺭ ﻣﺸﺖ ﻟﻲ ﻣﻜﺘﺐ ﺍﻟﻤﺪﻳﺮﺓ .. ﻭﻛﺎﻧﺖ ﺧﺎﻳﻔﺔ ﻭﻗﻠﺒﻬﺎ ﻣﻘﻠﻮﻉ ﻣﻦ ﻣﺤﻠﻮ .. ﺍﻭﻝ ﻣﺎﺷﺎﻓﺖ ﺍﻟﻤﺮﺍﺓ ﺑﻘﺖ ﺗﺘﺬﻛﺮ ﺍﻟﻤﺮﺍﺓ ﺩﻱ ﺷﺎﻓﺘﻬﺎ ﻭﻳﻦ؟ .. ﺳﻠﻤﺖ ﻧﻮﺭ ﺑﻜﻞ ﺍﺩﺏ ﻭﺍﺣﺘﺮﺍﻡ . ﻭﺍﻟﻤﺪﻳﺮﻩ ﻗﺎﻟﺖ ﻟﻴﻬﺎ ﺍﻛﺸﻔﻲ ﻭﺷﻚ .. ﻣﺎﻓﻲ ﺯﻭﻝ ﺑﺠﻴﻨﺎ ﻫﻨﺎ .. ﻛﺸﻔﺖ ﻭﺷﻬﺎ .. ﻭﺍﻟﻤﺪﻳﺮﺓ ﻗﺎﻟﺖ ﻟﻴﻬﺎ ﺍﻗﻌﺪﻱ ﻳﺎﻧﻮﺭ .. ﻗﻌﺪﺕ ﻓﻲ ﻃﺮﻑ ﺍﻟﻜﺮﺳﻲ ﻭﻻﻣﻪ ﺟﺴﻤﻬﺎ ﻭﺭﺟﻠﻴﻬﺎ . ﻭﻇﺎﻫﺮ ﻋﻠﻴﻬﺎ ﺍﻟﺘﻮﺗﺮ .. ﺍﻟﻤﺪﻳﺮﻩ ﻗﺎﻟﺖ ﻟﻴﻬﺎ ﻧﻮﺭ .. ﻳﺎﻧﻮﺭ .. ﺧﻠﻴﻜﻲ ﺭﻻﻛﺲ ﻣﺎﻓﻲ ﺣﺎﺟﺔ .. ﺍﻧﺘﻲ ﺍﺻﻼ ﻣﺎﺑﺘﻌﻤﻠﻲ ﺷﻲ ﺑﻌﻤﻞ ﻟﻴﻚ ﻣﺸﻜﻠﻪ ﻣﺘﻮﺗﺮﺓ ﻟﻴﻪ؟ .. ﻧﻮﺭ ﺍﺗﺒﺴﻤﺖ ﻭﻗﺎﻟﺖ ﻟﻴﻬﺎ ﺣﺎﺻﺮ ﻳﺎ ﺍﺳﺘﺎﺫﻩ ..
ﺍﻟﻤﺮﺍﺓ ﻣﺪﺕ ﻛﺒﺎﻳﻪ ﺍﻟﻤﻮﻳﻪ ﻟﻨﻮﺭ ﺗﺸﺮﺏ .. ﻧﻮﺭ ﺷﺮﺑﺖ ﺑﺴﻴﻂ ﻭﺭﺟﻌﺖ ﺍﻟﻜﺒﺎﻳﻪ ﻣﻜﺎﻧﻬﺎ .. ﻭﺍﻟﻤﺮﺍﺓ ﺑﺘﻌﺎﻳﻦ ﻟﻴﻬﺎ ﻣﻌﺎﻳﻨﺔ ﺷﺪﻳﺪﻩ ﺧﻼﺹ . ﻭﺗﺘﺒﺴﻢ ﻭﺗﻘﻮﻝ ﻣﺎﺷﺎﺀ ﺍﻟﻠﻪ ﺗﺒﺎﺭﻙ ﺍﻟﻠﻪ .. ﻋﻴﻨﻲ ﺑﺎﺭﻩ ﻭﺻﻼﺓ ﺍﻟﻨﺒﻲ ﻓﻮﻗﻚ ﻳﺎﺑﺘﻲ .. ﻋﻴﻨﺎ ﺣﺎﺳﺪﺓ ﻣﺎﺗﺘﻌﺎﻳﻦ ﻟﻴﻚ . ﻭﺍﻟﺘﻔﺘﺖ ﺍﻟﻤﺮﺍﻩ ﻋﻠﻰ ﺍﻟﻤﺪﻳﺮﺓ ﻗﺎﻟﺖ ﻟﻴﻬﺎ ﺧﻼﺹ ﻛﻠﻤﻴﻬﺎ ..
ﺍﻟﻤﺪﻳﺮﺓ ﻗﺎﻟﺖ ﻟﻨﻮﺭ .. ﻳﺎﻧﻮﺭ ﺧﺎﻟﺘﻚ ﺩﻱ ﺟﺎﻳﺎﻙ ﻓﻲ ﻣﻮﺿﻮﻉ ﺧﺎﺹ .. ﻭﻣﺎﻳﻨﻔﻊ ﺗﻄﺮﺣﻪ ﻣﻌﺎﻙ ﻓﻲ ﺍﻟﻤﺪﺭﺳﻪ . ﻭﺟﺎﺕ ﺗﺴﺘﺎﺫﻥ ﻣﻨﻲ ﺍﻧﻬﺎ ﺗﻼﻗﻴﻚ ﻓﻲ ﺍﺛﻨﺎﺀ ﺍﻟﻴﻮﻡ ﺍﻟﺪﺭﺍﺳﻲ . ﻳﺎ ﺍﻣﺎ ﺗﺘﻔﻘﻲ ﻣﻌﺎﻫﺎ ﺗﻼﻓﻴﻬﺎ ﻓﻲ ﻣﻜﺎﻥ ﻣﻌﻴﻦ .. ﻳﺎ ﺍﻣﺎ ﺗﻤﺸﻲ ﻟﻴﻬﺎ ﻓﻲ ﺍﻟﺒﻴﺖ ﻭﺍﻧﺘﻲ ﺭﺍﺟﻌﻪ ﻋﻠﻲ ﺍﻫﻠﻚ . ﻭﻫﻲ ﻫﺴﻲ ﻋﺮﻓﺘﻨﻲ ﺑﻨﻔﺴﻬﺎ .. ﻭﻭﺭﺗﻨﻲ ﺑﻄﺎﻗﺘﻬﺎ . ﻳﻌﻨﻲ ﻋﻠﻰ ﺛﻔﺔ .. ﺍﻫﺎ ﺭﺍﻳﻚ ﺷﻨﻮ؟
ﻗﺎﻟﺖ ﻟﻴﻬﺎ ﻟﻜﻦ ﻳﺎ ﺍﺳﺘﺎﺫﻩ ﻫﻲ ﻋﺎﻳﺰﺍﻧﻲ ﻓﻲ ﺷﻨﻮ؟
ﻗﺎﻟﺖ ﻟﻴﻬﺎ .. ﻣﺎﻫﻮ ﻟﻮ ﻗﻠﻨﺎ ﻟﻴﻚ ﺍﻟﻤﻮﺿﻮﻉ ﺷﻨﻮ .. ﻳﺒﻘﻰ ﻓﺘﺤﻨﺎﻫﻮ ﻓﻲ ﺍﻟﻤﺪﺭﺳﺔ .. ﻧﻮﺭ ﻗﺎﻟﺖ ﻟﻴﻬﺎ ﺑﺲ ﻳﺎ ﺍﺳﺘﺎﺫﻩ ﺍﻧﺎﻣﺎﺑﻘﺪﺭ ﺍﺩﻱ ﻣﻮﺍﻓﻘﻪ ﺍﻻ ﺍﻛﻠﻢ ﺍﺑﻮﻱ . ﻋﻠﻰ ﺍﻻﻗﻞ ﻳﻜﻮﻥ ﺍﻣﻲ ﻋﻨﺪﻫﺎ ﺧﺒﺮ . ﻋﺸﺎﻥ ﻣﺎﻳﻐﻀﺒﻮ ﻋﻠﻲ .. ﺣﺘﻰ ﻟﻮ ﻣﺎﻋﺮﻓﻮ ﺭﺑﻨﺎ ﻣﺎﺑﺮﺿﻰ ﻣﻨﻲ ﺍﺩﺱ ﻣﻨﻬﻢ .. ﻣﺶ ﻳﺎ ﺍﺳﺘﺎﺫﻩ؟
ﻭﻃﺒﻌﺎ ﻧﻮﺭ ﺑﺘﺘﻜﻠﻢ ﺑﺮﺍﺍﺍﺍﺣﻪ ﻭﺻﻮﺗﺎ ﻭﺍﺍﻃﻲ ﺷﺪﻳﺪ . ﻭﺭﻗﻴﻖ ﻛﺪﺍ ﻭﺣﻨﻴﻦ .. ﻭﺍﻟﻤﺮﺍﺓ ﺗﻌﺎﻳﻦ ﻟﻴﻬﺎ ﺑﻲ ﺍﻧﺪﻫﺎﺵ ﻣﺘﻌﺠﺒﻪ . ﺍﻟﻤﺮﺍﺓ ﻗﺎﻟﺖ ﻟﻴﻬﺎ ﺧﻼﺹ ﻳﺎﻧﻮﺭ ﺍﻧﺎﻣﻮﺍﻓﻘﻪ .. ﻛﻠﻤﻴﻬﻢ ﻭﻧﺘﻼﻗﻰ ﺑﺎﻛﺮ .. ﻭﻧﻮﺭ ﻭﺍﻓﻘﺖ ﻭﻃﻠﻌﺖ ﻭﺍﻟﻤﺮﺍﺓ ﻓﺎﺗﺖ .. ﺍﻟﺒﻨﺎﺕ ﺭﺍﺟﻴﻦ ﻧﻮﺭ ﻟﻠﺸﻤﺎﺭ .. ﻭﻣﺎﻟﻘﻮ ﻣﻨﻬﺎ ﺍﻱ ﺷﻤﺎﺭ
ﻧﻮﺭ ﻟﻤﻦ ﻣﺸﺖ ﺍﻟﺒﻴﺖ ﺣﻜﺖ ﻻﻣﻬﺎ .. ﺍﻣﻬﺎ ﻗﺎﻟﺖ ﻟﻴﻬﺎ ﺍﻥ ﺷﺎ ﺍﻟﻠﻪ ﻳﺎﻧﻮﺭ ﺭﺑﻨﺎ ﻳﺠﻌﻞ ﻟﻴﻚ ﻓﺮﺝ . ﺍﺣﺘﻤﺎﻝ ﺗﻜﻮﻥ ﺍﻣﻚ؟ .. ﻗﺎﻟﺖ ﻟﻴﻬﺎ ﻻﻻ .. ﺍﻧﺎ ﻣﺎﺣﺴﻴﺖ ﺍﻧﻬﺎ ﻛﺪﺍ .. ﺑﺲ ﻳﺎ ﺍﻣﻲ ﺍﻧﺎ ﺍﻟﻤﺮﺍﺓ ﺩﻱ ﺃﻧﺎ ﺷﺎﻳﻔﺎﻫﺎ ﻓﻲ ﺣﺘﺔ .. ﺑﺲ ﻭﻳﻦ ﻣﺎﻗﺎﺩﺭﺓ ﺍﺗﺬﻛﺮ . ﺍﻣﻬﺎ ﻗﺎﻟﺖ ﻟﻴﻬﺎ .. ﻭﺑﺮﺿﻮ ﺍﺣﺘﻤﺎﻝ ﺗﻜﻮﻥ ﻋﺎﺭﻓﺔ ﺍﻫﻠﻚ ﺍﻻﺻﻠﻴﻴﻦ .. ﻧﻮﺭ ﻗﺎﻟﺖ ﻟﻴﻬﺎ ﻣﺎﻋﺎﺭﻓﺔ ﻳﺎ ﺍﻣﻲ .. ﻭﺍﻟﻠﻪ ﺑﺮﺿﻮ ﺍﺣﺘﻤﺎﻝ ..
ﻛﻮﺛﺮ ﺑﻘﺖ ﺗﺴﺮﺡ ﻭﺗﻔﻜﺮ .. ﻭﺗﻘﻮﻝ ﻟﻴﻬﺎ ﻳﺎﺭﺑﻲ ﺩﻱ ﻣﻨﻮ ﻭﻋﺎﻳﺰﺓ ﻣﻨﻚ ﺷﻨﻮ؟
ﺧﻼﺹ ﻳﺎﻧﻮﺭ ﻳﺎﺑﺘﻲ .. ﺍﺻﺒﺮﻱ ﻳﺠﻲ ﺍﺑﻮﻛﻲ . ﻭﻧﻜﻠﻤﻮ ﺑﻲ ﺍﻟﻜﻼﻡ ﺩﻩ . ﻭﻧﺸﻮﻑ ﺭﺍﻳﻮ ﺷﻨﻮ؟
ﻭﻫﻢ ﻣﻨﺘﻈﺮﻳﻦ ﻣﺤﻤﺪ ﻳﺠﻲ ﻣﻦ ﺍﻟﺸﻐﻞ ﻋﺸﺎﻥ ﻳﻜﻠﻤﻮﻫﻮ ..
ـــــــ
ﻟﺤﺪﻱ ﻣﺎﻳﺠﻲ ﻣﺤﻤﺪ . ﺍﻧﺎ ﺍﻛﺸﻒ ﻟﻴﻜﻢ ﺳﺮ ﺍﻟﻤﺮﺍﺓ .. ﺍﻟﻤﺮﺍﺓ ﺩﻱ ﻣﺮﺓ ﻣﺠﺮﻣﺔ ﺍﺟﺮﺍﻡ ﺷﺪﻳﺪ . ﺍﺳﻤﻬﺎ ( ﺳﻤﻴﺮﺓ ) ﻋﻨﺪﻫﺎ ﺍﺧﻮﻫﺎ ﻭﺣﻴﺪ ﺍﺳﻤﻮ ﺧﻀﺮ . ﻭﻋﺎﻳﺸﻴﻦ ﺍﻻﺗﻨﻴﻦ ﺑﺮﺍﻫﻢ . ﻭﺍﺧﻮﻫﺎ ﺑﺘﺎﻉ ﻣﺨﺪﺭﺍﺕ ﻭﻓﺴﺎﺩ .. ﻗﺒﻞ ﻓﺘﺮﺓ ﺯﻭﺟﺖ ﻟﻲ ﺍﺧﻮﻫﺎ ﺩﻩ . ﻭﺍﺣﺪﺓ ﻣﻦ ﺑﻨﺎﺕ ﺍﻟﺨﺮﻃﻮﻡ .. ﻭﺳﺎﻓﺮ ﺑﻴﻬﺎ ﺑﺮﺓ .. ﺍﻟﻌﺮﻭﺱ ﺍﻛﺘﺸﻔﺖ ﺍﻧﻬﻢ ﺳﻔﺮﻭﻫﺎ ﻋﺸﺎﻥ ﻳﺘﺎﺟﺮﻭ ﺑﻴﻬﺎ ﺩﻋﺎﺭﻩ ﻣﻊ ﺍﻻﺟﺎﻧﺐ ..
ﻭﻛﺎﻧﺖ ﻗﺼﺔ ﻣﺸﻬﻮﺭﺓ . ﻭﺍﻟﻌﺮﻭﺱ ﺷﺮﺩﺕ ﻣﻨﻬﻢ ﺑﻮﺍﺳﻄﺔ ﺍﻟﺴﻔﺎﺭﺓ . ﻭﻛﺎﻧﺖ ﻗﺼﺔ ﺟﺎﺑﻮﻫﺎ ﻓﻲ ﺍﻟﺠﺮﺍﻳﺪ . ﺑﺲ ﻫﺴﻲ ﻣﺎﻓﻲ ﺩﺍﻋﻲ ﻧﻔﺼﻞ ﻓﻴﻬﺎ . ﻭﻗﺎﻟﻮ ﺧﻀﺮ ﺩﻩ ﻋﻤﻞ ﺍﻟﻌﻤﻠﻴﺔ ﺩﻱ ﻣﻊ ﻛﻢ ﻭﺍﺣﺪﺓ .. ﻭﺍﺧﺘﻮ ﺩﻱ ﻗﻮﺍﺩﺓ ﻛﺒﻴﺮﺓ .. ﺑﺘﺠﻴﺐ ﺍﻟﺒﻨﺎﺕ ﻟﻠﺮﺟﺎﻝ ﻭﺑﺘﻜﺴﺐ ﻗﺮﻭﺵ ﻻﺣﺼﺮ ﻟﻬﺎ .. ﻭﻋﻨﺪﻫﻢ ﺑﻴﺖ ﻣﻠﻚ ﻭﻛﻞ ﻭﺍﺣﺪ ﺭﺍﻛﺐ ﻋﺮﺑﻴﺔ .. ﻣﻦ ﻗﺮﻭﺵ ﺍﻟﻔﺎﺣﺸﺔ ..
ﺍﻫﺎ ﺳﻤﻴﺮﺓ ﺍﻟﺤﻘﻴﺮﺓ ﺳﻤﻌﺖ ﺑﻲ ﺧﻄﻮﺑﺔ ﺍﺳﺘﺎﺫ ﻋﺎﺩﻝ ﻣﻦ ﻧﻮﺭ .. ﻭﺍﺧﺖ ﺍﺳﺘﺎﺫ ﻋﺎﺩﻝ ﻛﻠﻤﺘﻬﺎ ..
ﻗﺎﻟﺖ ﻟﻴﻬﺎ .. ﺍﻟﺒﺖ ﺍﻟﺨﻄﺒﻬﺎ ﻋﺎﺩﻝ ﺍﺧﻮﻱ ﻃﻠﻌﺖ ﻟﻘﻴﻄﻪ ﻭﺍﻫﻠﻲ ﺭﻓﻀﻮﻫﺎ .. ﻟﻜﻦ ﻭﺍﻟﻠﻪ ﻳﺎﺳﻤﻴﺮﺓ ﻗﺎﻟﻮ ﺟﻤﻴﻠﺔ ﺟﻤﺎﻝ .. ( ﺩﻩ ﻛﻼﻡ ﺍﺧﺖ ﺍﺳﺘﺎﺫ ﻋﺎﺩﻝ ) ..
ﻳﻼ ﻃﻮﺍﻟﻲ ﺳﻤﻴﺮﺓ ﻣﺸﺖ ﺍﺳﺘﻔﺴﺮﺕ ﻣﻦ ﻧﻮﺭ .. ﻭﻋﺮﻓﺖ ﻣﺪﺭﺳﺘﻬﺎ ﻭﻋﺎﻳﺰﺓ ﺗﺰﻭﺟﻬﺎ ﻻﺧﻮﻫﺎ ﺧﺎﻳﺐ ﺍﻟﺮﺟﺎﺀ .. ﻋﺸﺎﻥ ﺗﻜﻮﻥ ﻟﻴﻬﻢ ﻣﺼﺪﺭ ﺭﺯﻕ .. ﻃﺒﻌﺎ " ﺍﺳﺎﺳﺎ " ﻣﺎﻫﻤﻬﻢ ﺑﻴﻬﺎ ﺑﺖ ﺣﻼﻝ ﻭﻻﻣﺎﺑﺖ ﺣﻼﻝ .. ﻻﻥ ﺍﻟﺰﻭﺍﺝ ﺍﺳﺎﺳﺎ " ﺑﺎﻏﺮﺍﺽ ﻓﺎﺳﺪﺓ ..
ﻭﻓﻲ ﺣﺎﻻﺕ ﻛﺘﻴﺮﺓ ﺯﻱ ﺩﻱ ﺣﺎﺻﻠﺔ ﻧﺴﺄﻝ ﺍﻟﻠﻪ ﺍﻟﺴﺘﺮ ﻭﺍﻟﻌﺎﻓﻴﺔ ..
ﺑﺎﺧﺘﺼﺎﺭ ﺩﻩ ﻗﺼﺔ ﺳﺮ ﺍﻟﻤﺮﺍﺓ ﺍﻟﻤﺪﻫﺒﺔ ﺩﻱ .. ﻻﺑﺴﺔ ﺩﻫﺐ ﻭﻣﺘﺤﻨﻨﺔ ﻭﻫﻲ ﻣﻄﻠﻘﺔ ( ﻋﺠﺒﺎ (" ..
ــــــ
ﺍﻟﻤﻬﻢ ... ﻣﺤﻤﺪ ﺟﺎﺀ ﻭﻛﻠﻤﻮﻫﻮ ﻭﻗﺎﻝ ﻟﻴﻬﺎ ﻣﺎﻓﻲ ﻣﺸﻜﻠﺔ ﻳﺎﻛﻮﺛﺮ .. ﺧﻠﻴﻬﺎ ﺗﻤﺸﻲ ﻟﻴﻬﺎ ﻧﻮﺭ ﺯﻭﻟﺔ ﻭﺍﻋﻴﺔ ﻭﻓﺎﻫﻤﺔ .. ﻭﻣﺎﻓﻲ ﻋﻠﻴﻬﺎ ﺧﻮﻑ .. ﻛﻮﺛﺮ ﻗﺎﻟﺖ ﻟﻴﻬﻮ ﻣﺴﺘﺤﻴﻞ ﺍﺧﻠﻴﻬﺎ ﺗﻤﺸﻲ ﺑﺮﺍﻫﺎ .. ﻟﻲ ﺑﻴﺖ ﻧﺎﺱ ﻏﺮﺑﺎ .. ﻳﻘﻮﻟﻮ ﻋﻠﻴﻨﺎ ﺷﻨﻮ؟ .. ﺑﻌﺪﻳﻦ ﻳﺎﻣﺤﻤﺪ ﻓﻲ ﺍﻟﻨﻬﺎﻳﺔ ﺍﻧﺎ ﺍﻡ .. ﻭﺑﺨﺎﻑ ﻋﻠﻰ ﺑﺘﻲ ..
ﻧﻮﺭ ﺗﻌﺎﻳﻦ ﻻﻣﻬﺎ ﺑﻲ ﺍﻋﺠﺎﺏ ﻭﻣﺤﺒﺔ . ﻭﻗﺎﻟﺖ ﻟﻴﻬﺎ ﺧﻼﺹ ﻳﺎ ﺍﻣﻲ .. ﺗﻤﺸﻲ ﻣﻌﺎﻱ ﻧﺸﻮﻑ ﺍﻟﺤﺎﺻﻞ ﺷﻨﻮ . ﻟﻮ ﺍﻟﻤﺮﺍﺓ ﻣﺎﻗﺒﻠﺖ ﺗﻮﺭﻳﻨﻲ ﻋﺸﺎﻥ ﺍﻧﺘﻲ ﻣﻌﺎﻱ .. ﺍﻧﺎ ﺯﺍﺗﻲ ﻣﺎﻋﺎﻳﺰﺓ ﺍﻋﺮﻑ ﻋﻨﻬﺎ ﺷﻲ ..
ﺧﻼﺹ ﻳﺎ ﺍﻣﻲ . ﺍﻧﺎ ﺑﻤﺸﻲ ﺍﻟﻤﺪﺭﺳﺔ ﻋﺎﺩﻱ . ﻭﺍﻧﺘﻲ ﻧﻬﺎﻳﺔ ﺍﻟﻴﻮﻡ ﺗﻌﺎﻟﻲ ﻻﻗﻴﻨﻲ .
ﻧﻤﺸﻲ ﻟﻴﻬﺎ ﻣﻊ ﺑﻌﺾ .. ﻣﺤﻤﺪ ﻗﺎﻝ ﻟﻴﻬﻢ ﻃﻴﺐ ﺟﻤﻴﻞ . ﻭﺍﻧﺎ ﺑﺠﻲ ﺑﺪﺭﻱ ﻋﺸﺎﻥ ﺍﻗﻌﺪ ﻣﻊ ﺍﻟﺘﻮﻣﺎﺕ ﻟﻐﺎﻳﺔ ﻣﺎﺗﺮﺟﻌﻮ ..
ﻭﺑﻲ ﺍﺧﺘﺼﺎﺭ ( ﺳﻤﻴﺮﺓ ) ﺟﺎﺕ ﻓﻲ ﺍﻟﻤﺪﺭﺳﺔ ﺗﺎﻧﻲ ﻳﻮﻡ ﻓﻲ ﻧﻬﺎﻳﺔ ﺍﻟﺤﺼﺺ ﺑﻴﻬﻴﺌﺔ ﻣﺨﺘﻠﻔﺔ ﻭﺯﻳﻨﺔ ﻣﺨﺘﻠﻔﺔ ..
ﻭﻻﻗﺖ ﻧﻮﺭ .. ﻭﻧﻮﺭ ﻗﺎﻟﺖ ﻟﻴﻬﺎ ﺍﻧﺎ ﺍﻣﻲ ﺍﺻﺮﺕ ﺗﻤﺸﻲ ﻣﻌﺎﻱ . ﺳﻤﻴﺮﺓ ﻗﺎﻟﺖ ﻟﻴﻬﺎ ﻣﺎﻓﻲ ﻣﺸﻜﻠﺔ .. ﻭﺭﻛﺒﻮ ﻣﻌﺎﻫﺎ ﻓﻲ ﻋﺮﺑﻴﺘﻬﺎ .. ﻭﺻﻠﻮ ﺍﻟﺒﻴﺖ . ﻭﺑﻲ ﺍﺧﺘﺼﺎﺭ ﺑﺪﺕ ﺳﻤﻴﺮﺓ ﺗﺘﻜﻠﻢ .. ﻭﻛﻠﻤﺘﻬﻢ ﺍﻥ ﺍﻣﻬﺎ ﻭﺍﺑﻮﻫﺎ ﻣﺘﻮﻓﻴﻴﻦ . ﻭﺍﺧﻮﻫﺎ ﺍﻟﻮﺣﻴﺪ ﺧﻀﺮ ﺯﻭﻝ ﻣﻤﺘﺎﺯ ﻭﻧﺎﺟﺢ ﻓﻲ ﺷﻐﻠﻮ . ﻭﺯﻭﺟﺘﻮ ﺍﻃﻠﻘﺖ ﻣﻨﻪ .. ﻭﻫﻮ ﻋﺎﻳﺶ ﺣﺎﻟﺔ ﺣﺰﻳﻨﺔ . .. ﻭﻣﺤﺘﺎﺝ ﻻﻧﺴﺎﻧﺔ . ﻣﻠﺘﺰﻣﺔ ﻭﻃﻴﺒﺔ ﺗﻨﻘﺬﻩ ﻣﻦ ﺍﻟﺤﺎﻟﺔ ﺍﻟﻠﻬﻮ ﻓﻴﻬﺎ ﺩﻱ . ( ﻭﺭﻣﺖ ﻟﻴﻬﺎ ﺩﻣﻌﺘﻴﻦ ﺗﻤﺴﺎﺣﻴﺘﻴﻦ ) . . ﻭﺍﻧﺎ ﺳﻤﻌﺖ ﻋﻦ ﻧﻮﺭ ﻭﻋﻦ ﺍﺩﺑﻬﺎ . ﻭﺍﻟﺘﺰﺍﻣﻬﺎ .
ﻭﺟﻴﺖ ﺍﺳﻮﻗﺎ ﻣﻌﺎﻱ ﻋﺸﺎﻥ ﺗﺸﻮﻓﻮ ﻭﻳﺸﻮﻓﻬﺎ .. ﻟﻮ ﻣﻮﺍﻓﻘﺔ ﺑﺎﻟﻤﺒﺪﺍ ﻃﺒﻌﺎ " .
ﻃﻮﺍﻟﻲ ﻧﻮﺭ ﻗﺎﻟﺖ .. ﻳﺎﺍﻣﻲ ﺗﺴﻤﺤﻲ ﻟﻲ ﺍﺗﻜﻠﻢ؟ . ﻗﺎﻟﺖ ﻟﻴﻬﺎ ﺍﺗﻜﻠﻤﻲ .
ﻧﻮﺭ ﻗﺎﻟﺖ ﻟﻲ ﺍﻟﻤﺮﺍﺓ . ﺍﺳﻤﻌﻲ ﻳﺎﺧﺎﻟﺘﻲ . ﺍﻧﺎ ﻣﺎﻣﻌﺮﻭﻑ ﺍﺻﻠﻲ ﺷﻨﻮ ؟ ﺍﻧﺎ ﺯﻭﻟﺔ ﻣﺮﺑﻴﺔ ﻣﻊ ﻧﺎﺱ ﺍﻣﻲ ﺩﻳﻞ .. ﻭﻣﺎﻣﻌﺮﻭﻑ ﺍﻫﻠﻲ ﺍﻻﺻﻠﻴﻴﻦ .. ﻳﻌﻨﻲ ﺑﻘﻮﻟﻮ ﻋﻠﻲ ﻟﻘﻴﻄﺔ ..
ﺍﻟﻤﺮﺍﺓ ﻗﺎﻟﺖ ﻟﻴﻬﺎ ﺍﻧﺎ ﻋﺎﺭﻓﺔ ﻛﺪﺍ . ﻭ ﻣﺎﻋﻨﺪﻱ ﻣﺎﻧﻊ ﻓﻲ ﺍﻟﻤﻮﺿﻮﻉ ﺩﻩ .. ﻭﺣﺘﻲ ﺧﻀﺮ ﺍﺧﻮﻱ ﻣﺎﻋﻨﺪﻭ ﻣﺎﻧﻊ . ﺗﺎﻧﻲ ﻋﻨﺪﻛﻢ ﺣﺎﺟﺔ ؟ .
ﻛﻮﺛﺮ ﻗﺎﻟﺖ ﻟﻴﻬﺎ ﻭﻋﺮﻓﺘﻲ ﻣﻦ ﻭﻳﻦ؟؟ .. ﻗﺎﻟﺖ ﻟﻴﻬﺎ ﺣﻜﺖ ﺍﺧﺖ ﺍﺳﺘﺎﺫ ﻋﺎﺩﻝ ( ﺍﻟﻔﺎﺷﻞ ) ..
ﻫﻨﺎ ﻧﻮﺭ ﺍﺗﺬﻛﺮﺕ ﺍﻧﻬﺎ ﺷﺎﻓﺖ ﺍﻟﻤﺮﺍﺓ ﺩﻱ ﻭﻳﻦ .. ﻓﻲ ﺍﻟﺤﻠﻢ ﻃﺒﻌﺎ .."
ﻧﻮﺭ ﻗﺎﻟﺖ ﻟﻴﻬﺎ ﺑﺲ ﺍﺳﺘﺎﺫ ﻋﺎﺩﻝ ﻣﺎﺯﻭﻝ ﻓﺎﺷﻞ . ﺩﻩ ﺍﺳﺘﺎﺫﻱ ﻭﻗﺪﻭﺗﻲ ..
ﻗﺎﻟﺖ ﻟﻴﻬﺎ ﺍﻟﺰﻣﻦ ﺑﻮﺭﻳﻚ ﻟﻲ ﻗﺪﺍﻡ ﻳﺎﻧﻮﺭ .. ﻭﺑﺘﺸﻮﻓﻲ ﻋﺎﺩﻝ ﺩﻩ ﺡ ﻳﻄﻠﻊ ﺷﻨﻮ؟ ﺍﻟﻤﻬﻢ ..
ﻫﻢ ﺑﺘﻜﻠﻤﻮ ﻛﺪﺍ .. ﺩﺧﻞ ﺧﻀﺮ ﺍﺧﻮﻫﺎ ﺷﺎﺏ ﻓﻲ ﺍﻟﺘﻼﺗﻴﻦ ﻭﻭﺟﻴﻪ ﻭﻧﻈﻴﻒ ﻭﻣﺘﻌﻄﺮ .
ﻭﺣﺎﻟﺘﻮ ﻇﺎﻫﺮ ﻋﻠﻴﻬﻮ ﺍﻟﺮﺍﺣﺔ ﻭﺍﻟﻨﻐﻨﻐﺔ ﻭﺍﻟﻨﻌﻮﻣﺔ ﻭﺳﻠﻢ . ﻋﻠﻴﻬﻢ .. ﻭﻧﻮﺭ ﻣﻦ ﺳﻤﻌﺖ ﺻﻮﺗﻮ ﺟﺎﻱ ﺩﺍﺧﻞ . ﻧﺰﻟﺖ ﻧﻘﺎﺑﻬﺎ ﻋﻠﻰ ﻭﺷﻬﺎ .. ﻭﺭﺩﺕ ﺍﻟﺴﻼﻡ ﻓﻲ ﺍﺩﺏ ﻭﺣﻴﺎﺀ ..
ﺳﻤﻴﺮﺓ ﻗﺎﻟﺖ ﻟﻴﻬﺎ ﻟﻴﻪ ﻋﻄﻴﺘﻲ ﻭﺷﻚ؟؟ .. ﺩﻩ ﺣﻴﻜﻮﻥ ﺧﻄﻴﺒﻚ . ﻭﻻﺯﻡ ﻳﺸﻮﻓﻚ .. ﻧﻮﺭ ﻗﺎﻟﺖ ﻟﻴﻬﺎ ﻟﻜﻦ ﻳﺎﺧﺎﻟﺘﻮ ﺍﻧﺎﻟﺴﻪ ﻣﺎ ﻭﺍﻓﻘﺖ .. ﻭﻣﺎﻣﻤﻜﻦ ﺃﻭﺍﻓﻖ ﺍﻻ ﺍﺳﻤﻊ ﺭﺍﻱ ﺍﺑﻮﻱ ..
ﻭ ﻛﻮﺛﺮ ﺳﺎﻛﺘﺔ ﻭﻣﻬﺠﻮﻣﺔ ﻣﻦ ﺍﻟﺸﻲ ﺍﻟﺒﺤﺼﻞ ﺩﻩ ﻭﻣﺎﻗﺎﺩﺭﺓ ﺗﻔﻬﻢ ﺣﺎﺟﺔ ..
ﺍﻟﻰ ﺍﻟﻠﻘﺎﺀ
ﺍﻟﻤﺴﺆﻭﻟﻴﺔ .
ﺍﻟﺤﻠﻘﺔ 17 .
ﺑﻘﻠﻢ ﻃﺎﺭﻕ ﺍﻟﻠﺒﻴﺐ ..
ﻛﻮﺛﺮ . ﻗﺎﻟﺖ ﻟﻲ ﻧﻮﺭ ﻳﺎﻧﻮﺭ .. ﺍﻧﺘﻲ ﺷﺨﺼﻴﺎ . ﺭﺍﻳﻚ ﻓﻲ ﻛﻼﻡ ﺧﺎﻟﺘﻚ ﺩﻩ ﺷﻨﻮ ؟ ﻗﺎﻟﺖ ﻟﻴﻬﺎ ﺍﻧﺎ ﻳﺎﻣﺎﻣﺎ ﻟﻮ ﺧﻴﺮﻭﻧﻲ .. ﻣﺎﻋﺎﻳﺰﺓ ﺯﻭﺍﺝ ﻫﺴﻲ . ﻭﻻ ﻋﻨﺪﻱ ﻟﻴﻬﻮ ﺍﺳﺘﻌﺪﺍﺩ ﻧﻔﺴﻲ . ﺍﻧﺎ ﻳﺎﻣﺎﻣﺎ ﻧﻔﺴﻲ ﺍﻣﺘﺤﻦ ﻭﺍﺧﺶ ﺍﻟﺤﺎﻣﻌﺔ ..
ﺳﻤﻴﺮﺓ ﻗﺎﻟﺖ ﻟﻴﻬﺎ ﺍﻭﻻ ﻧﺤﻦ ﻣﺎ ﻣﺴﺘﻌﺠﻠﻴﻦ . ﺗﺎﻧﻲ ﺣﺎﺟﺔ ﻧﺤﻦ ﺣﻨﻘﺮﻳﻚ ﻓﻲ ﺍﺣﺴﻦ ﺟﺎﻣﻌﺔ ﻟﻮ ﻛﻠﻔﺖ ﻣﻠﻴﺎﺭ .. ﻗﺎﻟﺖ ﻟﻴﻬﺎ ﺍﻧﺎ ﻳﺎﺧﺎﻟﺘﻲ ﻣﺎ ﻋﺎﻳﺰﺓ ﺍﺣﺮﺟﻜﻢ .. ﻭﻣﺎﻋﺎﻳﺰﺓ ﺍﺧﻴﺐ ﺭﺟﺎﻛﻢ . .. ﺑﺲ ﺍﺩﻭﻧﻲ ﻓﺮﺻﺔ ﺍﻛﻠﻢ ﺍﺑﻮﻱ ﻭﺍﺳﺘﺨﻴﺮ ﺭﺑﻨﺎ ..
ﻧﻮﺭ ﻃﺒﻌﺎ ﺑﺎﻗﻴﺔ ﺑﻴﻦ ﺗﻼﺗﺔ ﺍﻣﻮﺭ .. . ﺍﻭﻻ ﻋﺎﻳﺰﺓ ﺗﻘﺮﺍ ﻭﻣﺎﻋﺎﻳﺰﺓ ﺗﺪﺧﻞ ﻓﻲ ﺍﻟﺘﺰﺍﻣﺎﺕ ﺍﺳﺮﻳﺔ .. ﻻﻧﻬﺎ ﻋﻨﺪﻫﺎ ﺭﻏﺒﺔ ﺷﺪﻳﺪﺓ ﻓﻲ ﺍﻟﺘﻌﻠﻴﻢ . ﻣﻦ ﻧﺎﺣﻴﺔ ﺗﺎﻧﻴﺔ ﻋﺎﻳﺰﺓ ﺗﺘﺰﻭﺝ ﺑﻲ ﺳﺮﻋﺔ ﻋﺸﺎﻥ ﻳﻜﻮﻥ ﻋﻨﺪﻫﺎ ﻫﻮﻳﺔ ﺷﺮﻋﻴﺔ .. ﻋﻠﻰ ﺍﻻﻗﻞ ﺗﻜﻮﻥ ﺭﺑﺔ ﺍﺳﺮﺓ ﻣﻌﺘﺮﻑ ﻓﻴﻬﺎ . ﻧﻤﺮﺓ ﺗﻼﺗﺔ ﻋﺎﻳﺰﺓ ﺗﺘﺰﻭﺝ ﺑﺴﺮﻋﺔ ﻋﺸﺎﻥ ﺗﺮﻓﻊ ﻋﻦ ﻣﺤﻤﺪ ﻭﻛﻮﺛﺮ ﺣﻤﻞ ﺍﻟﻤﺴﺆﻭﻟﻴﺔ .
ﻓﻌﺸﺎﻥ ﻛﺪﺍ ﺍﻟﺘﺮﺩﺩ ﺑﺘﺎﻋﻬﺎ ﻇﺎﻫﺮ ﺷﺪﻳﺪ ..
ﺍﻫﺎ ﺳﻤﻴﺮﺓ ﻗﺎﻟﺖ ﻟﻴﻬﻢ ﺧﻼﺹ .. ﺍﻧﺘﻮ ﻛﻠﻤﻮ ﺍﺑﻮﻛﻢ ﻭﺑﺎﻗﻲ ﺍﻻﻫﻞ . ﻭﻧﺤﻦ ﻣﻨﺘﻈﺮﻳﻦ ﺭﺩﻛﻢ .
ﻧﻮﺭ ﻭﺍﻣﻬﺎ ﺍﺧﺪﻥ ﻗﻌﺪﺗﻦ ﺩﻳﻚ ﻭﺍﺳﺎﺗﺎﺫﻧﻦ ﻭﻗﺎﺗﻦ ..
ﺍﻫﺎ ﻃﺒﻌﺎ ﻧﻮﺭﻭ ﻭﺍﻣﻬﺎ ﺑﺘﻜﻠﻤﻦ ﻓﻲ ﺍﻟﺸﺎﺭﻉ ﻣﺎﺷﺎﺕ ﻋﻠﻲ ﺍﻟﺒﻴﺖ .. . ﻧﻮﺭ ﻗﺎﻟﺖ ﻟﻴﻬﺎ ﻳﺎ ﻣﺎﻣﺎ ؟
ﻗﺎﻟﺖ ﻟﻴﻬﺎ ﺍﻳﻮﺓ ﻳﺎﻧﻮﺭ .
ﻗﺎﻟﺖ ﻟﻴﻬﺎ ﺍﻧﺎ ﺍﺗﺬﻛﺮﺕ ﺍﻟﻤﺮﺍﺓ ﺩﻱ ﺷﻔﺘﻬﺎ ﻭﻳﻦ .
ﻗﺎﻟﺖ ﻟﻴﻬﺎ ﺍﻫﺎ ﻳﺎﻧﻮﺭ ﺷﻮﻓﺘﻴﻬﺎ ﻭﻳﻦ؟
ﻗﺎﻟﺖ ﻟﻴﻬﺎ ﺩﻱ ﻧﻔﺲ ﺍﻟﻤﺮﺍﺓ ﺍﻻﻧﺎ ﺷﻔﺘﻬﺎ ﻓﻲ ﺍﻟﺤﻠﻢ ﻳﺎ ﺍﻣﻲ .. . ﻣﺎﺑﺘﺘﺬﻛﺮﻱ ﺍﻧﺎ ﺣﻜﻴﺖ ﻟﻴﻚ .. ﻭﻗﻠﺖ ﻟﻴﻚ ﺍﻟﻤﺮﺍﺓ ﻓﻲ ﺍﻟﺤﻠﻢ ﻛﺎﻥ ﺑﺘﻘﻮﻝ ﻟﻲ ﺍﺳﺘﺎﺫ ﻋﺎﺩﻝ ﺍﻟﻔﺎﺷﻞ ؟؟
ﻛﻮﺛﺮ ﻗﺎﻟﺖ ﻟﻴﻬﺎ ﻓﻌﻼ " ﻓﻌﻼ " ﺍﺗﺬﻛﺮﺕ ..
ﻧﻮﺭ ﻗﺎﻟﺖ ﻟﻴﻬﺎ ﺍﻧﺎ ﺫﺍﺗﻲ ﻣﺎﻛﻨﺖ ﻣﺘﺬﻛﺮﺓ .. ﺍﻻ ﻫﺴﻲ ﻟﻤﻦ ﻫﻲ ﻗﺎﻟﺖ ﻟﻲ ﺍﺳﺘﺎﺫ ﻋﺎﺩﻝ ﺍﻟﻔﺎﺷﻞ . ﺑﺼﺮﺍﺣﺔ ﻳﺎ ﺍﻣﻲ .. ﺍﻧﺘﻲ ﺭﺍﻳﻚ ﻓﻲ ﺍﻟﻤﺮﺍﺓ ﺩﻱ ﺷﻨﻮ ؟
ﺍﻣﻬﺎ ﻗﺎﻟﺖ ﻟﻴﻬﺎ ﻭﺍﻟﻠﻪ ﻳﺎﻧﻮﺭ ﺍﻟﻨﺎﺱ ﺩﻳﻞ ﺍﻟﻈﺎﻫﺮ ﻋﻠﻴﻬﻢ ﻣﺮﻭﻗﻴﻦ ﻭﻧﺎﺱ ﺑﺎﻟﻬﻢ ﺭﺍﺍﺍﻳﻖ ﻭﻃﻴﺒﻴﻦ ﻭﺣﻨﻴﻨﻴﻦ .. ﺑﻌﺪﻳﻦ ﺍﻫﻢ ﺣﺎﺟﺔ ﻣﺎﻋﻨﺪﻫﻢ ﻋﻘﺪ ﺷﺪﻳﺪﺓ .. ﻭﻗﺒﻼﻧﻴﻦ ﺣﺘﻰ ﺑﻲ ﺣﻴﺎﺗﻚ ﺍﻟﺤﻜﻴﺘﻲ ﻟﻴﻬﻢ ﺑﻴﻬﺎ .. ﺑﻌﺪﻳﻦ ﻳﺎﺑﺘﻲ ﻗﺎﻟﻮ ﻟﻴﻚ ﻟﻴﻚ ﺑﻮﺍﺻﻠﻮ ﻟﻴﻚ ﺩﺭﺍﺳﺘﻚ .. ﻭﻳﻘﺮﻭﻙ ﻓﻲ ﺍﺣﺴﻦ ﺍﻟﺠﺎﻣﻌﺎﺕ ..
ﺍﻧﺎ ﺩﺍﻳﺮﺓ ﺷﻨﻮ ﺗﺎﻧﻲ ﺑﻌﺪ ﺍﻃﻤﺌﻦ ﻋﻠﻴﻚ .
ﻧﻮﺭ ﻗﺎﻟﺖ ﻟﻴﻬﺎ ﻭﺍﻟﻠﻪ ﺍﻧﺎ ﻣﺎﻋﺎﺭﻓﺔ ﻳﺎﺍﻣﻲ ﺑﺲ ﺣﺎﺳﺔ ﺑﻲ ﺭﻭﺣﻲ ﻣﺎﻣﺮﺗﺎﺣﺔ . ﺍﻧﺘﻲ ﻣﺎﺷﺎﻳﻔﺔ ﺍﻟﻤﺮﺍﺓ ﺩﻱ ﺗﺼﺮﻓﺎﺗﻬﺎ ﻏﺮﻳﺒﺔ ﻏﺮﻳﺒﺔ ﻛﺪﺍ ...
ﻗﺎﻟﺖ ﻟﻴﻬﺎ ﻻﻏﺮﻳﺒﺔ ﻭﻻﺣﺎﺟﺔ .. ﺩﻩ ﺍﻧﺘﻲ ﺑﻘﻴﺘﻲ ﺗﺘﻮﻫﻤﻲ ﺳﺎﻱ .. ﻭﺍﺣﺘﻤﺎﻝ ﺻﺪﻣﺔ ﺍﺳﺘﺎﺫ ﻋﺎﺩﻝ ﻟﻐﺎﻳﺔ ﻫﺴﻲ ﻣﺄﺛﺮﺓ ﻓﻴﻚ . ﻛﺪﻱ ﻳﺎﻧﻮﺭ ﻳﺎﺑﺘﻲ ﻧﺤﻦ ﻣﺎﻧﺴﺘﻌﺠﻞ ﻧﺼﻞ ﺍﻟﺒﻴﺖ ﻧﺤﻜﻲ ﻻﺑﻮﻙ
ﻭﻧﺸﻮﻑ ﺭﺍﻳﻮ .. ﻋﺸﺎﻥ ﻟﻮ ﻛﺎﻥ ﻣﻮﺍﻓﻖ . ﻳﻤﺸﻲ ﻳﺘﺤﻘﻖ ﻟﻴﻨﺎ ﻣﻦ ﺍﻟﻨﺎﺱ ﺩﻳﻞ .
ﺍﻫﺎ ﻟﻤﻦ ﻭﺻﻠﻮ ﺍﻟﺒﻴﺖ ﻭﺣﻜﻮ ﻟﻤﺤﻤﺪ ﺍﻟﻤﻮﺿﻮﻉ ﻛﺎﻣﻞ . ﻗﺎﻝ ﻟﻴﻬﻢ ..
ﺍﻧﺎ ﻣﻦ ﺭﺍﻱ ﻣﻮﺿﻮﻉ ﺍﻟﻌﺮﺱ ﺩﻩ ﻫﺴﻲ ﻧﺼﺮﻑ ﺍﻟﻨﻈﺮ ﻋﻨﻪ .. ﻟﻐﺎﻳﺔ ﻣﺎ ﻧﻮﺭ ﺗﻤﺘﺤﻦ ﻭﻧﺸﻮﻑ ﺑﻌﺪﻳﻦ ﺍﻟﻔﻲ ﺍﻟﻜﺘﺎﺏ .
ﺑﻌﺪﻳﻦ ﺍﻧﺎ ﻓﻲ ﺣﺎﺟﺔ ﻣﺎ ﻣﺮﻳﺤﺎﻧﻲ ﺍﺑﺪﺍ " .. ﻛﻴﻒ ﺍﻧﻬﻢ ﻳﻘﺒﻠﻮ ﺑﻲ ﻧﻮﺭ ﻭﻫﻲ ﻣﺠﻬﻮﻟﺔ ﺍﻟﻨﺴﺐ ﻣﻦ ﺩﻭﻥ ﺍﻱ ﻧﻘﺎﺵ ﻭﻻ ﺗﺒﺮﻳﺮ ..
ﻋﻠﻲ ﺍﻻﻗﻞ ﻛﺎﻧﻮﺍ ﻳﺘﻨﺎﻗﺸﻮ ﻣﻌﺎﻙ ﻳﺎﻛﻮﺛﺮ .. ﻓﻲ ﺍﻧﻚ ﺍﻧﺘﻲ ﺟﺎﻳﺒﺎﻫﺎ ﻣﻦ ﻭﻳﻦ .. ﻭﻻ ﻳﻈﻬﺮﻭ ﺍﻱ ﺍﻫﺘﻤﺎﻡ .. ﻧﻮﺭ ﻗﺎﻟﺖ ﻟﻴﻬﻮ ﻛﻼﻣﻚ ﺻﺢ ﻣﻴﺔ ﻓﻲ ﺍﻟﻤﻴﺔ ﻳﺎﺑﺎﺑﺎ .. ﺍﻧﺎ ﺯﺍﺗﻲ ﺍﺳﺘﻐﺮﺑﺖ ﻓﻲ ﺍﻧﻬﻢ ﻣﺎﻣﻬﺘﻤﻴﻦ ﺑﺎﻟﻘﺼﺔ ﺩﻱ ﻣﻊ ﺍﻧﻬﺎ ﺣﺎﺟﺔ ﻣﻬﻤﺔ ﻋﻨﺪ ﻛﻞ ﺍﻟﻨﺎﺱ ..
ﺑﻌﺪﻳﻦ ﻓﻲ ﺣﺎﺟﺔ ﻣﻬﻤﺔ ﻧﺤﻦ ﻻﺯﻡ ﻧﻌﺮﻓﺎ ﺍﻟﺰﻭﻝ ﺩﻩ ﻣﺮﺗﻮ ﻃﻠﻘﺘﻮ ﻓﻲ ﺷﻨﻮ؟
ﻛﻮﻧﻮ ﺍﻟﻤﺮﺍﺓ ﺗﻄﻠﻖ ﺭﺍﺟﻠﻬﺎ .. ﻣﻌﻨﺎﻫﺎ ﻓﻴﻬﻮ ﻋﻴﺐ ﻛﺒﻴﺮ ﻻﻳﻤﻜﻦ ﻳﺘﻌﺎﻟﺞ .
ﻭﺍﻧﺎ ﻣﺎﻣﺴﺘﻌﺪ ﺍﺯﺝ ﺑﻲ ﺑﺘﻲ ﻓﻲ ﺣﺘﺔ ﻣﺎﻋﺎﺭﻑ ﺟﻮﺍﻧﺒﻬﺎ ﻛﻠﻬﺎ .
ﻳﺎ ﺍﺧﻮﺍﻧﺎ ﺍﻟﺤﻜﺎﻳﺔ ﺩﻱ ﺍﻧﺎ ﻣﺎ ﻣﺮﻳﺤﺎﻧﻲ . ﻧﻮﺭ ﻗﺎﻟﺖ ﻟﻴﻬﻮ ﻭﺍﻧﺎ ﺑﺮﺿﻮ ﻳﺎﺑﺎﺑﺎ . ﻣﻮﺵ ﻗﻠﺖ ﻟﻴﻚ ﻳﺎ ﺍﻣﻲ ؟
ﻛﻮﺛﺮ ﻗﺎﻟﺖ ﻟﻴﻬﺎ ﺍﻧﺘﻲ ﻳﺎﻧﻮﺭ ﻣﺎ ﻛﻦ ﻣﻼﺣﻈﻴﻦ ﺍﻧﻜﻢ ﺑﺘﺘﻮﻫﻤﻮ ﺳﺎﻛﺖ . ﻫﺴﻊ ﺍﻧﺘﻲ ﻗﻌﺪﺗﻲ ﻣﻊ ﺧﻀﺮ . ﻋﺮﻓﺘﻲ ﻋﻨﻪ ﺷﻨﻮ .. ؟
ﻣﺤﻤﺪ ﻗﺎﻝ ﻟﻴﻬﺎ ﻻﺗﻘﻌﺪ ﻣﻌﺎﻫﻮ ﻭﻻﺗﻌﺮﻑ ﻋﺘﻪ ﺷﻲ .. ﺍﻻ ﺍﻧﺎ ﺍﺳﺄﻝ ﻭﺍﺗﺎﻛﺪ ﻣﻦ ﺍﻟﻨﺎﺱ ﺩﻳﻞ .
ﻧﻮﺭ ﺧﺸﺖ ﻏﺮﻓﺘﻬﺎ ﻭﺻﻠﺖ ﻭﺍﺳﺘﺨﺎﺭﺕ ﻭﺩﻋﺖ ﺭﺑﻨﺎ ﻛﺘﻴﺮ ..
ﻭﻓﻮﺿﺖ ﺍﻣﺮﻫﺎ ﻟﻠﻪ ..
ﻣﺮﺕ ﺍﻻﻳﺎﻡ ﻭﻧﻮﺭ ﺑﺘﻤﺸﻲ ﻣﺪﺭﺳﺘﻬﺎ ﻋﺎﺩﻱ .. ﻭﻻﺷﻐﺎﻟﺔ ﺑﺎﻱ ﺣﺎﺟﺔ . ﻭﺑﺎﻟﻬﺎ ﻛﻠﻮ ﻓﻲ ﺩﺭﺍﺳﺘﻬﺎ ﻭﻓﻲ ﺻﻠﻮﺍﺗﻬﺎ .. ﻭﺍﻫﺘﻤﺎﻫﺎ ﻛﻠﻪ ﻫﻞ ﺍﻟﻤﺼﺤﻒ ﺍﻟﺼﻐﻴﺮ ﺍﺑﻮ ﺳﺴﺘﺔ ﻛﻞ ﻣﺮﻩ ﺗﻬﺒﺸﻮ .. ﻣﻮﺟﻮﺩ ﻓﻲ ﺷﻨﻄﺘﻬﺎ ﻭﻻ ﻻ ..
ﻭﻣﺤﻤﺪ ﻛﻞ ﻣﺎﻳﻌﺮﻑ ﺯﻭﻝ ﻋﻨﺪﻩ ﻋﻼﻗﺔ ﺑﻲ ﻧﺎﺱ ﺧﻀﺮ ﻭﺳﻤﻴﺮﺓ ﻳﻤﺸﻲ ﻳﺴﺄﻟﻪ ..
ﻭﺍﻟﻨﺎﺱ ﺑﻘﻮﻟﻮ ﻟﻴﻬﻮ ﻣﺎﺑﻨﻌﺮﻑ ﻋﻨﻬﻢ ﺷﻲ ﻛﻌﺐ .
ﻭﻓﻌﻼ ﻫﻢ ﻛﻞ ﺍﺭﺑﻌﺔ ﺷﻬﻮﺭ ﺑﺮﺣﻠﻮ ﻟﻤﻜﺎﻥ . ﻭﻣﺎ ﺑﺪﺧﻠﻮ ﻓﻲ ﺍﻟﻨﺎﺱ .. ﻻﻧﻬﻢ ﻋﺎﺭﻓﻴﻦ ﺍﻓﻌﺎﻟﻬﻢ ﻗﺬﺭﺓ ..
ﺍﻭﻝ ﻧﺎﺱ ﺍﻟﻤﻨﻄﻘﺔ ﺍﻟﺒﻜﻮﻧﻮﺍ ﺳﺎﻛﻨﻴﻦ ﻓﻴﻬﺎ ﻳﻜﺸﻔﻮ ﺍﻓﻌﺎﻟﻬﻢ .. ﻳﺮﺣﻠﻮ ﻟﺤﺘﺔ ﺗﺎﻧﻴﺔ ..
ﻗﺒﻞ ﺍﺭﺑﻌﺔ ﺷﻬﻮﺭ ﻛﺎﻧﻮ ﻓﻲ ﺑﺮﻱ .. ﻭﻫﺴﻲ ﺍﻟﻴﻮﻣﻴﻦ ﺩﻳﻞ ﺳﺎﻛﻨﻴﻦ ﻓﻲ ﺍﻟﻤﻬﻨﺪﺳﻴﻦ ﺍﻣﺪﺭﻣﺎﻥ .. ﻭﺑﻌﺪ ﻓﺘﺮﺓ ﻣﺎﻣﻌﺮﻭﻑ ﻳﺮﺣﻠﻮ ﻭﻳﻦ ..
ﻭﺍﻫﻠﻬﻢ ﻣﻦ ﻣﻨﻄﻘﺔ ﺧﺎﺭﺝ ﻭﻻﻳﺔ ﺍﻟﺨﺮﻃﻮﻡ ( ﻣﺎﻋﺎﻳﺰ ﺍﺫﻛﺮ ﺍﺳﻢ ﺍﻟﻤﻨﻄﻘﺔ ﻋﺸﺎﻥ ﻣﺎ ﺍﻭﺳﺦ ﺳﻤﻌﺘﻬﺎ )
ﻻﻧﻮ ﺳﻤﻴﺮﺓ ﻭﺧﻀﺮ ﻋﺎﺭ ﻋﻠﻰ ﻛﻞ ﺣﺎﺟﺔ ﻋﻨﺪﻫﻢ ﺑﻴﻬﺎ ﻋﻼﻗﺔ ..
ﻭﻛﺎﻧﻮﺍ ﻣﻔﺘﻜﺮﻳﻦ ﻧﻮﺭ ﻣﺎﻋﻨﺪﻫﺎ ﻭﺟﻴﻊ .. ﻋﻠﻰ ﺍﺳﺎﺱ ﺍﻧﻬﺎ ﻣﺠﻬﻮﻟﺔ ﺍﻟﻨﺴﺐ ..
ﻭﺍﻟﻨﺎﺱ ﺍﻟﺮﺑﻮﻫﺎ ﺑﻜﻮﻧﻮﺍ ﺩﺍﻳﺮﻳﻦ ﻳﺘﺨﻠﺼﻮ ﻣﻨﻬﺎ .. ﻋﺸﺎﻥ ﻛﺪﺍ ﻫﻢ ﺷﺎﻳﻔﻨﻬﺎ ﻏﻨﻴﻤﺔ ﺳﻬﻠﺔ .
ﻋﺸﺎﻥ ﻛﺪﺍ ﻛﺎﻧﻮ ﻣﺼﺮﻳﻦ . ﻳﺘﺤﺼﻠﻮ ﻋﻠﻴﻬﺎ ..
ﺍﻟﻤﻬﻢ ﻟﻤﻦ ﻣﺤﻤﺪ ﻣﺎﻋﺮﻑ ﻋﻨﻬﻢ ﺣﺎﺟﺔ .. ﻭﺍﻱ ﺯﻭﻝ ﺑﻘﻮﻝ ﻣﺎﻋﺎﺭﻑ ..
ﺟﺎﺀ ﻧﺎﺩﻯ ﻧﻮﺭ ﻗﺎﻝ ﻟﻴﻬﺎ .. ﻧﻮﺭ ﻳﺎﺑﺘﻲ ﺍﻟﻨﺎﺱ ﺩﻳﻞ ﻣﺎﻓﻲ ﺍﻱ ﺯﻭﻝ ﻋﺎﺭﻑ ﻋﻨﻬﻢ ﺣﺎﺟﺔ ..
ﻭﺍﻧﺎ ﻓﻲ ﺭﺍﻱ ﻣﺎﺗﻘﺒﻠﻲ ﺑﺎﻟﻤﻮﺿﻮﻉ ﺩﻩ .. ﻭﺗﻮﺍﺻﻠﻲ ﺩﺭﺍﺳﺘﻚ ﻭﺍﻟﻜﺎﺗﺒﻮ ﻟﻴﻚ ﺭﺑﻨﺎ ﺑﺠﻴﻚ ..
ﻧﻮﺭ ﻗﺎﻟﺖ ﻟﻴﻬﻮ ﻳﺎﺑﺎﺑﺎ .. ﺩﺍﻳﻤﺎ " ﺍﻓﻜﺎﺭﻙ ﺑﺘﺠﻲ ﻃﺒﻖ ﺍﻻﺻﻞ ﻣﻊ ﺍﻓﻜﺎﺭﻱ . .
ﻗﺎﻝ ﻟﻴﻬﺎ ﺍﻧﺘﻲ ﻧﺎﺳﻴﺔ ﺍﻧﻚ ﺗﺮﺑﻴﺘﻲ؟ ..
ﻗﺎﻟﺖ ﻟﻴﻬﻮ ﻭﺍﻧﺎ ﺑﻨﺴﻰ ﺍﻟﻠﻪ ﻳﺨﻠﻴﻚ ﻟﻲ ﻳﺎﺑﻮﻱ ..
ﻗﺎﻝ ﻟﻴﻬﺎ ﻭﻣﺎﺗﻨﺴﻲ ﻭﺍﻧﺘﻲ ﻣﺴﺆﻟﻴﺘﻲ ﺍﻣﺎﻡ ﺍﻟﻠﻪ ..
ﻭﻣﺮﺕ ﺍﻻﻳﺎﻡ ﻭﻛﻞ ﻣﺮﺓ ﺳﻤﻴﺮﺓ ﺗﺘﺼﻞ ﻋﻠﻴﻬﻢ .. ﻳﻘﻮﻟﻮ ﻟﻴﻬﺎ ﻟﺴﻊ ﻣﺎﺑﻘﻴﻨﺎ ﻋﻠﻰ ﺭﺍﻱ ..
ﻟﻐﺎﻳﺔ ﻣﺎﺟﺎﺕ ﺍﻻﺟﺎﺯﺓ .. ﻭﺧﻀﺮ ﺑﻘﻰ ﻣﺮﺓ ﻣﺮﺓ ﻳﺠﻴﻬﻢ ﺯﻳﺎﺭﺓ ﻓﻲ ﺍﻟﺒﻴﺖ .
ﻭﻧﻮﺭ ﻣﺎﻗﺎﻋﺪﺓ ﺗﻼﻗﻴﻬﻮ . ﻭﻻﺑﺘﺘﻜﻠﻢ ﻣﻌﺎﻫﻮ .. ﻭﻣﺎﻋﻨﺪﻫﺎ ﻟﻴﻬﻮ ﺍﻱ ﺷﻲ .. ﺍﺻﻼ ﻟﻮ ﻗﺒﻠﺖ ﺑﺎﻟﺰﻭﺍﺝ ﺩﻩ ﺑﺘﻘﺒﻞ ﻻﺳﺒﺎﺏ ﺍﺿﻄﺮﺍﺭﻳﺔ ..
ﻣﺎﺑﺘﺤﺒﻮ ﻧﻬﺎﺋﻲ ﺳﺒﺤﺎﻥ ﺍﻟﻠﻪ ..
ﺍﻫﺎ ﻳﻮﻡ ﻗﺎﻟﺖ ﻻﺑﻮﻫﺎ ﻳﺎﺑﻮﻱ ﺍﻟﺰﻭﻝ ﺩﻩ ﺍﻧﺎ ﻛﻞ ﻳﻮﻡ ﺑﻜﻮﻥ ﻣﻀﺎﻳﻘﺔ ﻣﻨﻪ .. ﺍﻛﺘﺮ ﻣﻦ ﺍﻟﻴﻮﻡ ﺍﻟﻘﺒﻠﻪ ﻣﺎﻋﺎﺭﻓﻪ ﻟﻴﻪ؟
ﻳﻮﻡ ﺧﻀﺮ ﺟﺎ .. ﻭﻣﺤﻤﺪ ﻃﺒﻌﺎ " ﺣﺎﺱ ﺑﻤﻀﺎﻳﻘﺔ ﻧﻮﺭ ﻣﻦ ﺟﻴﺔ ﺧﻀﺮ ﻓﻲ ﺍﻟﺒﻴﺖ .. ﻗﺎﻡ ﻗﺎﻝ ﻟﻴﻬﻮ .. ﻳﺎﺧﻀﺮ ﻳﺎﻭﻟﺪﻱ .. ﻧﻮﺭ ﻣﺼﺮﺓ ﺍﻧﻬﺎ ﺗﻘﺮﺍ ﺍﻟﺠﺎﻣﻌﺔ .. ﻟﻮ ﺑﺘﻘﺪﺭ ﺗﻨﺘﻈﺮﻫﺎ ﻟﻤﻦ ﺗﺨﻠﺺ .. ﻭﻟﻮ ﻣﺎﺑﺘﻘﺪﺭ ﺷﻮﻑ ﻟﻴﻚ ﻣﺮﺍﺓ ﺗﺎﻧﻴﺔ ﻋﺸﺎﻥ ﻣﺎﻧﻘﻴﺪﻙ ﻭﺗﻨﺘﻈﺮ ..
ﺧﻀﺮ ﻗﺎﻝ ﻟﻴﻬﻮ ﻻﻻ .. ﺑﻨﺘﻈﺮ ﺍﻧﺎ ﻭﺭﺍﻱ ﺷﻨﻮ ؟ ﺍﻧﺎ ﻋﺎﻳﺰ ﻧﻮﺭ ﻭﻣﺎﻋﺎﻳﺰ ﻏﻴﺮﻫﺎ ..
ﻣﺤﻤﺪ ﻗﺎﻝ ﻟﻴﻬﻮ ﺑﺲ ﺍﻧﺖ ﺗﻜﻮﻥ ﻋﺎﺭﻑ .. ﻧﺤﻦ ﻣﺎ ﺍﻟﺘﺰﻣﻨﺎ ﻟﻴﻚ ﺑﻲ ﺣﺎﺟﺔ .. ﻻﻧﻮ ﻧﻮﺭ ﻟﺴﻪ ﻣﺎ ﺍﺩﺗﻨﺎ ﺍﻟﻤﻮﺍﻓﻘﺔ .. ﻗﺎﻝ ﻟﻴﻬﻮ ﺧﻴﺮ ﺍﻧﺎ ﻣﻨﺘﻈﺮ ..
ﺯﻭﻝ ﻟﺼﻘﺔ ﺧﻼﺹ ﺩﻩ ﺷﻨﻮ ﺍﻟﻤﺨﻠﻮﻕ ﺍﻟﻐﺮﻳﺐ ﺩﻩ ..
ﺍﻟﻤﻬﻢ ......
ﻣﺮﺕ ﺍﻻﻳﺎﻡ .. ﻭﻧﻮﺭ ﻣﺸﻐﻮﻟﺔ ﺑﺎﻟﺘﺤﻀﻴﺮ ﻟﻠﺴﻨﺔ ﺍﻻﺧﻴﺮﺓ ﻓﻲ ﺍﻟﺜﺎﻧﻮﻱ ﻭﻫﻲ ﻣﻤﺘﺤﻨﺔ ﺍﻟﺠﺎﻣﻌﺔ ..
ﻓﻲ ﻭﺍﺣﺪ ﻣﻦ ﺍﺻﺤﺎﺏ ﻣﺤﻤﺪ ﻋﻨﺪﻩ ﺯﻭﺍﺝ ﻭﺩ ﺍﺧﺘﻪ .. ﻣﺤﻤﺪ ﻣﺸﻰ ﺍﻟﺰﻭﺍﺝ ﺩﻩ ..
ﻓﻲ ﺍﻟﺰﻭﺍﺝ ﻣﺤﻤﺪ ﺳﻤﻊ ﺧﺒﺮ .. ﻗﺎﻟﻮ ﻓﻲ ﺑﻴﺖ ﻫﻨﺎ .. ﺍﻣﺒﺎﺭﺡ ﻧﺎﺱ ﺍﻻﻣﻦ ﻋﻤﻠﻮ ﻟﻴﻬﻮ ﻣﺪﺍﻫﻤﺔ .. ﻭﻗﺒﻀﻮ ﻓﻴﻬﻮ ﺟﻤﺎﻋﺔ ﻣﻌﺎﻫﻢ ﺑﻨﺎﺕ ﻓﻲ ﺍﻭﺿﺎﻉ ﺳﻴﺌﺔ .. ﻭﻗﺒﻀﻮﻫﻢ ﺑﺎﻟﺜﺎﺑﺘﻪ ... ﻻﻧﻮ ﺍﻟﺒﻴﺖ ﻛﺎﻥ ﻣﺮﺍﻗﺐ ﻣﻦ ﻓﺘﺮﺓ ﺑﺘﺤﺼﻞ ﻓﻴﻬﻮ ﺣﺎﺟﺎﺕ ﻣﺮﻳﺒﺔ ..
ﻣﺤﻤﺪ ﻣﺎ ﺍﻫﺘﻢ ﺑﺎﻟﻤﻮﺿﻮﻉ ﺷﺪﻳﺪ .. ﺑﺲ ﺻﺎﺣﺒﻮ ﺩﻩ ﺟﺎ ﻗﻌﺪ ﺟﻨﺒﻮ .
ﻗﺎﻝ ﻟﻴﻬﻮ ..
ﻋﺎﺭﻑ ﻳﺎﻣﺤﻤﺪ ﻓﻲ ﻭﺍﺣﺪﻩ ﻣﻦ ﺍﻟﺒﻨﺎﺕ ﺍﻟﻘﺒﻀﻮﻫﻢ ..
ﺍﺧﺖ ﺍﻷﺳﺘﺎﺫ ﺍﻟﻜﺎﻥ ﻗﺎﻝ ﻋﺎﻳﺰ ﺑﺘﻚ ..
ﻗﺎﻝ ﻟﻴﻬﻮ ﻭﻫﺴﻲ ﺍﻟﺤﺼﻞ ﻟﻴﻬﻢ ﺷﻨﻮ؟ ﻗﺎﻝ ﻟﻴﻬﻮ ﻫﺴﻲ ﻓﻲ ﻣﺮﻛﺰ ﺍﻟﺸﺮﻃﺔ ﺍﻟﻔﻼﻧﻲ ..
ﻣﺤﻤﺪ ﻗﺎﻝ ﻓﻲ ﻧﻔﺴﻪ .. ﺍﻧﺎ ﺍﻟﻠﻴﻠﺔ ﻛﺎﻥ ﺍﺳﻮﻕ ﻛﻮﺛﺮ ﻭﻧﻮﺭ ﻭﻧﻤﺸﻲ ﻧﻜﻔﺮ ﻟﻴﻬﺎ ﻓﻲ ﺍﻟﺤﺮﺍﺻﺔ . ﻭﻧﻮﺭﻳﻬﻢ ﻭﺩ ﺍﻟﺤﺮﺍﻡ ﻣﻨﻮ ﻓﻴﻨﺎ
ﻣﺤﻤﺪ ﻣﺸﻰ ﻛﻠﻢ ﻧﻮﺭ .. ﻗﺎﻝ ﻟﻴﻬﺎ ﺷﻔﺘﻲ ﺍﻻﺳﺮﺓ ﺍﻟﺮﻓﻀﺘﻚ ﻻﻧﻚ ﻣﺠﻬﻮﻟﺔ ﺍﻟﻨﺴﺐ ﺍﻟﺤﺼﻞ ﻋﻠﻴﻬﻢ .. ﻭﺣﻜﻰ ﻟﻴﻬﺎ ﺍﻟﺨﺒﺮ .. ﻗﺎﻟﺖ ﻟﻴﻬﻮ .. ﻧﺤﻦ ﻣﺎﻟﻨﺎ ﺑﻴﻬﻢ ﻳﺎﺑﺎﺑﺎ .. ﺧﻠﻴﻬﻢ ﻟﻲ ﺭﺑﻬﻢ ..
ﻣﺤﻤﺪ ﻗﺎﻝ ﻟﻴﻬﺎ .. ﺑﺲ ﺍﻧﺎ ﻣﺤﺮﻭﻕ ﺷﺪﻳﺪ ﻭﺍﻟﻠﻪ .. ﻭﻻﺯﻡ ﺍﺳﻮﻕ ﻛﻮﺛﺮ ﺗﺸﻮﻑ .
ﻧﻮﺭ ﻣﺸﺖ ﻛﻠﻤﺖ ﺍﻣﻬﺎ ﺑﻜﻞ ﺍﻟﺤﺎﺻﻞ ﻭﻗﺎﻟﺖ ﻟﻴﻬﺎ .. ﻟﻮ ﺑﺎﺑﺎ ﻗﺎﻝ ﻟﻴﻚ ﻧﻤﺸﻲ .. ﺍﺗﻜﻠﻤﻲ ﻣﻌﺎﻫﻮ ﺍﻋﺘﺬﺭﻱ ﻟﻴﻬﻮ ﺑﺎﻱ ﺣﺎﺟﺔ .. ﻭﺍﻣﻨﻌﻴﻬﻮ .. ﻻﻧﻮ ﻣﺎﺻﺢ ﻧﺸﻤﺖ ﻓﻲ ﺍﻟﻨﺎﺱ ..
ﺑﻌﺪﻳﻦ ﻳﻌﻨﻲ ﻫﻢ ﺣﻴﻜﻮﻧﻮﺍ ﻣﺤﺮﺟﻴﻦ ﺍﺻﻼ .. ﻧﻤﺸﻲ ﻧﺤﺮﺟﻬﻢ ﺯﻳﺎﺩﺓ . ﻓﻲ ﺍﻟﻨﻬﺎﻳﺔ ﺩﻳﻞ ﺍﻫﻞ ﺍﺳﺘﺎﺫﻱ ﻳﺎﻣﺎﻣﺎ .. ﺣﺘﻰ ﻟﻮ ﺭﻓﻀﻮﻧﻲ ..
ﻛﻮﺛﺮ ﺍﻗﺘﻨﻌﺖ ﺑﻜﻼﻡ ﻧﻮﺭ .. ﻭﻗﺎﻟﺖ ﻟﻲ ﻣﺤﻤﺪ ﺍﻧﺤﻦ ﻣﺎﻣﺎﺷﻴﻦ .. ﻟﻮ ﺍﻧﺖ ﻣﺼﺮ ﺍﻣﺸﻲ ﺍﺷﻤﺖ ﺑﺮﺍﻙ ..
ﻣﺤﻤﺪ ﻣﺸﻰ ﻭﺗﻌﺎﻟﻮ ﺷﻮﻓﻮ ﺍﻟﻤﻔﺎﺟﺂﺕ ﺍﻟﻠﻘﺎﻫﺎ ﻋﻨﺪ ﻧﺎﺱ ﺍﻟﺸﺮﻃﺔ .
ﺍﻟﻰ ﺍﻟﻠﻘﺎﺀ
ﺍﻟﻤﺴﺆﻭﻟﻴﺔ ..
ﺍﻟﺤﻠﻘﺔ 18 .
ﺑﻘﻠﻢ ﻃﺎﺭﻕ ﺍﻟﻠﺒﻴﺐ .
ﻣﺤﻤﺪ ﻟﻤﻦ ﻭﺻﻞ ﻟﻠﻤﺮﻛﺰ .. ﻭﻣﺸﻰ ﺳﻠﻢ ﻋﻠﻰ ﺍﻟﻀﺎﺑﻂ .. ﻣﺸﻰ ﻋﻠﻴﻬﻮ . ﺑﺪﺍ ﻳﺴﺘﻔﺴﺮ ﻋﻦ ﺍﻟﻨﺎﺱ ﺍﻟﺤﺼﻠﺖ ﻣﻌﺎﻫﻢ ﺍﻟﻤﺪﺍﻫﻤﺔ ﻭﻛﺪﺍ .. ﻭﻓﺠﺄﺓ ﻋﻴﻨﻮ ﻭﻗﻌﺖ ﻋﻠﻰ ﺧﻀﺮ ﻭﻣﻌﺎﻫﻮ ﻧﻔﺮﻳﻦ ﻛﺪﺍ ﻏﺮﻳﺒﻴﻦ ﺍﻻﺷﻜﺎﻝ ... ﻓﻲ ﻧﺎﺣﻴﺔ ﻣﻦ ﺍﻟﺤﺮﺍﺻﺔ . ﻭﺳﻤﻴﺮﺓ ﻭﻣﻌﺎﻫﺎ ﺗﻼﺕ ﺑﻨﺎﺕ . ﻓﻲ ﻧﺎﺣﻴﺔ ﺗﺎﻧﻴﺔ .. ﻋﺎﻳﻦ ﻟﻴﻬﻢ ﻛﺪﺍ ﺑﻲ ﺍﺯﺩﺭﺍﺀ .. ﻟﻜﻦ ﻫﻢ ﻣﺎﺷﺎﻓﻮﻫﻮ ..
ﺍﻫﺎ .. ﻓﻲ ﻣﺮﻛﺰ ﺍﻟﺸﺮﻃﺔ . ﻓﻲ ﺷﺎﺏ ﻛﺪﺍ ﻻﺑﺲ ﻣﻠﻜﻲ . ﻋﻤﺮﻭ ﻣﺎ ﺍﻛﺘﺮ ﻣﻦ 23 ﺳﻨﻪ .. ﺷﻜﻠﻪ ﺯﻭﻝ ﻣﻬﺬﺏ ﺟﺎﺀ ﻟﻤﺤﻤﺪ .. ﻭﺳﻠﻢ ﻋﻠﻴﻬﻮ ﺳﻼﻡ ﻣﻌﺮﻓﺔ .. ﻭﻗﺎﻝ ﻟﻴﻬﻮ ﻛﻴﻒ ﺍﺣﻮﺍﻟﻚ ﻳﺎﺧﺎﻝ .. ﻃﺒﻌﺎ " ﺍﻧﺖ ﻣﺎﺑﺘﻌﺮﻓﻨﻲ .. ﻟﻜﻦ ﺍﻧﺎ ﺑﻌﺮﻓﻚ ﺷﺪﻳﺪ .. ﻭﻋﺎﺭﻓﻚ ﺟﻴﺖ ﻋﺎﻳﺰ ﺗﺸﻮﻑ ﻧﺎﺱ ﺳﻤﻴﺮﺓ ﻭﺍﺧﻮﻫﺎ .. ﻭﺍﺧﺖ ﺍﺳﺘﺎﺫ ﻋﺎﺩﻝ ..
ﺍﻧﺎ ﺍﺗﻮﻗﻌﺘﻚ ﺗﺠﻲ .. ﻭﻛﻨﺖ ﻣﻨﺘﻈﺮﻙ ..
ﻗﺎﻝ ﻟﻴﻬﻮ ﺍﻧﺖ ﻣﻨﻮ؟ .. ﻭﻋﺮﻓﺖ ﻛﻴﻒ؟ . ..
ﻗﺎﻝ ﻟﻴﻬﻮ .. ﺗﻌﺎﻝ ﻣﻌﺎﻱ ﻟﻠﻀﺎﺑﻂ ﻳﺤﻜﻲ ﻟﻴﻚ .. ﺑﺘﻌﺮﻑ ﻛﻞ ﺣﺎﺟﺔ .
ﻣﺤﻤﺪ ﻣﺸﻰ ﻣﻊ ﺍﻟﻮﻟﺪ ﺍﻟﺸﺎﺏ ﺩﻩ ﻟﻠﻀﺎﺑﻂ ..
ﺍﻟﻀﺎﺑﻂ ﻗﺎﻝ ﻟﻲ ﻣﺤﻤﺪ ..: ﻳﺎ ﺍﺳﺘﺎﺫ ﻣﺤﻤﺪ ﺍﻧﺖ ﺯﻭﻝ ﻣﺤﻈﻮﻅ ..
ﺍﻟﻨﺎﺱ ﺍﻟﻜﺎﻧﻮ ﻋﺎﻳﺰﻳﻦ ﻳﺘﺰﻭﺟﻮ ﺑﺘﻚ ﺩﻳﻞ . ﻋﺒﺎﺭﺓ ﻋﻦ ﻋﺼﺎﺑﺔ ﺑﺘﺪﻳﺮ ﻋﻤﻞ ﺍﻟﺪﻋﺎﺭﺓ ﻭﺍﻟﻤﺨﺪﺭﺍﺕ .. ﻭﻛﺎﻧﻮ ﻋﺎﻳﺰﻳﻦ ﻳﺴﺘﻐﻠﻮ ﺑﺘﻚ ﺍﺳﺘﻐﻼﻝ ﺳﺊ ..
ﻭﻟﻮ ﻣﺎ ﺍﻟﻮﻟﺪ ﺍﻟﻤﻌﺎﻙ ﺩﻩ . ﻧﺤﻦ ﻣﺎﻛﻨﺎ ﻗﺪﺭﻧﺎ ﻧﺘﺤﺼﻞ ﻋﻠﻴﻬﻢ .. ﺍﻭﻝ ﺣﺎﺟﺔ ﺍﻟﺤﺎﺻﻞ ﻛﺎﻻﺗﻲ ..
ﺍﻟﻤﺮﺓ ﺍﻻﺳﻤﻬﺎ ﺳﻤﻴﺮﺓ ﺩﻱ .. ﻣﺪﻳﺮﺓ ﻟﻠﻌﺼﺎﺑﺔ .. ﻭﺍﻟﺒﺖ ﺍﻻﺳﻤﻬﺎ ﻫﺪﻳﻞ ﺩﻱ .. ﺍﺧﺖ ﺍﺳﺘﺎﺫ ﻋﺎﺩﻝ .. ﻭﻃﺒﻌﺎ " ﺑﺖ ﻓﻼﻥ ﺍﻟﻤﻌﺮﻭﻑ ﺩﺍﻙ .. ﺑﺘﺠﻴﺐ ﺍﻟﺒﻨﺎﺕ ﻣﻦ ﺍﻟﺠﺎﻣﻌﺔ ﻓﻲ ﺑﻴﺖ
ﺳﻤﻴﺮﺓ ﻟﻤﻤﺎﺭﺳﺔ ﺍﻟﺮﺯﻳﻠﻪ .. ﻭﺍﺳﺘﺎﺫ ﻋﺎﺩﻝ ﻋﺎﺭﻓﻬﺎ ﺍﻧﻬﺎ ﻣﺎﻛﻮﻳﺴﺔ .. ﻭﺳﺎﻛﺖ ﻋﻠﻴﻬﺎ ﻋﺎﺭﻑ ﻟﻴﻪ ؟ ﻻﻧﻮ ﺑﻴﻨﺎﺗﻢ ﻣﺼﻠﺤﺔ ﻣﺸﺘﺮﻛﺔ . ﻭﻛﻞ ﻭﺍﺣﺪ ﺳﺎﺗﺮ ﺍﻟﺘﺎﻧﻲ .. ﻫﻲ ﺑﺘﺠﻴﺐ ﻟﻴﻬﻮ ﺍﻟﺒﻨﻘﻮ !!. ﺗﺼﺪﻕ ؟ ﺗﺼﺪﻕ ﺍﻧﻮ .. ﺍﺳﺘﺎﺫ ﻋﺎﺩﻝ ﻣﺪﻣﻦ ﻳﺎ ﺍﺳﺘﺎﺫ؟؟ ..
ﻭﺑﺴﺒﺐ ﺍﺩﻣﺎﻧﻪ ﻣﺎﻗﺎﺩﺭ ﻳﺘﺼﺮﻑ ﻣﻊ ﺍﺧﺘﻪ ..
ﻻﻥ ﺍﻟﻤﺼﻠﺤﺔ ﺑﻴﻨﻬﻢ ﻣﺘﺒﺎﺩﻟﺔ ﺯﻱ ﻣﺎﻗﻠﺖ ﻟﻴﻚ .. ﻣﻊ ﺍﻧﻮ ﺍﺳﺘﺎﺫ ﺗﺮﺑﻴﺔ ﺍﺳﻼﻣﻴﺔ ﻭﺯﻭﻝ ﻣﻠﺘﺰﻡ ﻟﻜﻦ ﻣﺎﻗﺎﺩﺭ ﻳﺘﺨﻠﺺ ﻣﻦ ﺍﻟﻤﺨﺪﺭﺍﺕ .. ﻗﺪﺭ ﻣﺎﺣﺎﻭﻝ . ﻭﻫﻮ ﻣﺸﻰ ﻓﻲ ﻃﺮﻳﻖ ﺍﻻﻟﺘﺰﺍﻡ ﻋﺸﺎﻥ ﻳﺘﺨﻠﺺ ﻣﻦ ﺍﻻﺩﻣﺎﻥ ﻟﻜﻦ ﻟﻼﺳﻒ ﻣﺎﻗﺪﺭ .
ﻭﺍﻫﻠﻮ ﻣﺎﻋﺎﺭﻓﻴﻦ ﺍﻻﺗﻔﺎﻗﻴﺔ ﺍﻟﺤﺎﺻﻠﺔ ﺑﻴﻨﻮ ﻭﺑﻴﻦ ﺍﺧﺘﻪ ..
ﺍﺧﺘﻪ ﻫﺪﻳﻞ ﻣﺠﺮﻣﺔ ﻛﺒﻴﺮﺓ .. ﻭﺳﻤﺴﺎﺭﺓ ﻓﻮﺍﺣﺶ .. ﻭﻗﺒﻞ ﻛﺪﺍ ﺃﺟﻬﻀﺖ ﻣﺮﺗﻴﻦ .. ﻭﻫﻲ ﺍﺧﻄﺮ ﻣﻦ ﺳﻤﻴﺮﺓ ﺯﺍﺗﻬﺎ .. ﻭﺍﻟﻌﻴﺎﺫ ﺑﺎﻟﻠﻪ ..
ﻭﺩ ﻛﻠﻮ ﻣﻮﺟﻮﺩ ﻓﻲ ﻣﺤﻀﺮ ﺍﻟﻘﻀﻴﺔ ﻭﺑﻲ ﺍﺛﺒﺎﺗﺎﺗﻪ ..
ﻧﺤﻦ ﻟﻨﺎ ﺧﻤﺴﺔ ﺍﺳﺎﺑﻴﻊ ﺳﺎﻛﻴﻦ ﺍﻟﻤﻮﺿﻮﻉ ﺩﻩ ..
ﻭﻛﻞ ﺍﻟﻤﻌﻠﻮﻣﺎﺕ ﺩﻱ ﺍﺗﺤﺼﻠﻨﺎ ﻋﻠﻴﻬﺎ ﺑﻮﺍﺳﻄﺔ ﺍﻟﻮﻟﺪ ﺩﻩ .. ﻭﺑﻲ ﺍﺩﻟﺔ ﻣﺆﻛﺪﺓ ..
ﻭﺍﻟﺴﺒﺐ ﺍﻻﺳﺎﺳﻲ ﺍﻧﻮ ﺍﻟﻮﻟﺪ ﺩﻩ .. ﺑﻴﻌﺮﻑ ﺑﺘﻚ ﻧﻮﺭ . ﻭﺑﻴﺤﺘﺮﻣﻬﺎ ﻭﺑﺤﺒﻬﺎ ﺟﺪﺍ ..
ﻭﺑﻲ ﺍﻟﺠﺪ ﺑﺘﻚ ﺩﻱ .. ﻣﺤﻈﻮﻇﺔ .. ﻣﺤﻈﻮﻇﻪ .. ﻛﻮﻧﻮ ﻳﻜﻮﻥ ﺍﻟﺰﻭﻝ ﺩﻩ ﻃﺮﻳﻘﻬﺎ ..
ﻻﻧﻮ ﺍﻟﺰﻭﻝ ﺩﻩ ﻣﻦ ﻋﺮﻑ ﺍﻧﻮ ﺑﺘﻚ ﺣﺘﻜﻮﻥ ﺿﺤﻴﺔ ..
ﺑﺪﺍ ﻳﺠﻤﻊ ﻓﻲ ﺍﻟﺨﻴﻮﻁ ﻭﻳﺘﺮﺻﺪ ﻟﻴﻬﻢ ﺑﻲ ﻧﻔﺴﻮ ...
ﻭﺍﻧﺎ ﻣﺘﺎﺑﻊ ﻣﻌﺎﻫﻮ ﻣﻦ ﺍﻭﻝ ﻳﻮﻡ ..
ﺍﻟﺰﻭﻝ ﺩﻩ ﺑﻌﺰﻛﻢ ﻣﻌﺰﺓ ﺷﺪﻳﺪﻩ ﻳﺎ ﺍﺳﺘﺎﺫ ﻣﺤﻤﺪ .. ﻭﻣﺴﺘﻌﺪ ﻳﻘﻊ ﺍﻟﻨﺎﺭ ﻋﺸﺎﻧﻜﻢ ..
( ﺩﻩ ﻛﻠﻮ ﻛﻼﻡ ﺍﻟﻀﺎﺑﻂ .. )
ﻣﺤﻤﺪ ﻣﻨﺪﻫﺶ .. ﻭﺗﺎﻧﻲ ﻣﺎﻋﺎﻳﻦ ﻋﻠﻰ ﺍﻟﺤﺮﺍﺻﺎﺕ ﺍﺑﺪﺍ .. ﻭﻻ ﺍﺷﺘﻐﻞ ﺑﻲ ﺍﻟﻨﺎﺱ ﺍﻟﻔﻴﻬﺎ ..
ﺑﺲ ﺑﻘﻰ ﻣﺸﻐﻮﻝ ﺑﺎﻟﻮﻟﺪ ﺍﻟﻐﺮﻳﺐ ﺩﻩ .. ﻳﺎﺭﺑﻲ ﺩﻩ ﻣﻨﻮ؟ ﻭﺑﻌﻤﻞ ﻛﺪﺍ ﻟﻴﻪ؟
ﺍﻫﺎ ﻃﻮﺍﻟﻲ ﺟﺎ ﻋﻠﻰ ﺍﻟﻮﻟﺪ ﺩﻩ .. ﻭﻗﺎﻝ ﻟﻴﻬﻮ ﻳﺎﺯﻭﻝ ﺗﻌﺎﻝ .. ﺍﻧﺖ ﻣﻨﻮ ؟ ﻭﻋﻼﻗﺘﻚ ﺑﻴﻨﺎ ﺷﻨﻮ؟؟
ﺍﻧﺎ ﻭﺍﻟﻠﻪ ﻟﻮ ﺍﺗﻨﺎﺯﻟﺖ ﻟﻴﻚ ﻋﻦ ﻛﻞ ﺍﻣﻼﻛﻲ .. ﻣﺎ ﺑﻘﺪﺭ ﺍﻭﻓﻴﻚ ﺣﻖ ﺧﺪﻣﺘﻚ .. ﻭﻻ ﺍﻛﺎﻓﻴﻚ ..
ﻗﺎﻝ ﻟﻴﻬﻮ ﺧﺪﻣﺔ ﺷﻨﻮ ﻳﺎﺣﺎﺝ؟ ﻧﻮﺭ ﺩﻱ ﺍﺳﺘﺎﺫﺗﻲ .. ﻭﻧﻮﺭ ﺩﻱ ﺣﻴﺎﺗﻲ .. ﻭﻧﻮﺭ ﺩﻱ .. ﻧﻮﺭﻋﻴﻮﻧﻲ ..
ﻗﺎﻝ ﻟﻴﻬﻮ ﺍﻧﺖ ﺑﺘﻌﺮﻑ ﻧﻮﺭ ﻣﻦ ﻭﻳﻦ .. ؟ ﻗﻮﻝ ﻟﻲ ..
ﺍﻟﻮﻟﺪ ﻗﻌﺪ ﺟﻨﺒﻮ .. ﻓﻲ ﻛﺮﺳﻲ ﻭﻗﺎﺑﻠﻮ ﻛﺪﺍ ﺑﻲ ﺃﺩﺏ ﺷﺪﻳﺪ .. ﻭﺍﺑﺘﺴﻢ ﻭﺩﻧﻘﺮ ﻓﻲ ﺍﻟﻮﺍﻃﻪ ﻣﺴﺎﻓﻪ . ﻭﺭﻓﻊ ﺭﺍﺳﻮ ﻭﻗﺎﻝ ﻟﻴﻬﻮ ..
ﺍﻧﺎ ﻳﺎﻋﻢ ﻣﺤﻤﺪ .. ﺍﺳﻤﻲ ﻓﺨﺮ ﺍﻟﺪﻳﻦ ﺍﻻﻣﻴﻦ .. ﺍﺻﻼ " ﻣﻦ ﺍﻟﻮﻻﻳﺔ ﺍﻟﺸﻤﺎﻟﻴﺔ ..
ﻭﺳﺎﻛﻨﻴﻦ ﻓﻲ ﺍﻷﺑﻴﺾ ... ﻗﺒﻞ ﻋﺸﺮﺓ ﺳﻨﻮﺍﺕ ﻧﺤﻦ ﻭﺍﻧﺘﻮ ﻛﻨﺎ ﺟﻴﺮﺍﻥ ﻓﻲ ﺍﻻﺑﻴﺾ ..
ﻭﻧﻮﺭ ﻛﺎﻧﺖ ﺑﺘﺠﻲ ﺗﻠﻌﺐ ﻣﻌﺎﻧﺎ ﻓﻲ ﺍﻟﺒﻴﺖ .. ﺍﻣﻲ ﺍﺳﻤﻬﺎ ﺯﻳﻨﺐ .. ﺻﺪﻳﻘﺔ ﺯﻭﺟﺘﻚ ﻛﻮﺛﺮ ..
ﻭﻧﻮﺭ ﻛﺎﻧﺖ ﺑﺎﻟﻨﺴﺒﺔ ﻟﻴﻨﺎ ﻗﺪﻭﺓ ﺻﺎﻟﺤﺔ .. ﻣﻊ ﺍﻧﻬﺎ ﻛﺎﻧﺖ ﻃﻔﻠﺔ . ﺑﺲ ﺍﻟﻌﻠﻤﺘﻨﺎ ﻟﻴﻬﻮ . ﺑﻘﻰ ﻣﻌﺎﻧﺎ ﻟﻤﻦ ﻛﺒﺮﻧﺎ .. ﻭﻣﻦ ﻳﻮﻡ ﺭﺣﻠﺘﻮ ﻧﺤﻦ ﻣﺎﻧﺴﻴﻨﺎﻫﺎ ..
ﻭﺍﻧﺎ ﻣﺎ ﻋﻨﺪﻱ ﻓﻲ ﺭﺍﺳﻲ . ﻭﻻﻓﻲ ﻗﻠﺒﻲ . ﺍﻧﺴﺎﻧﺔ ﺑﻤﻘﺪﺍﺭ ﻧﻮﺭ ..
ﻭﻫﺴﻲ ﺍﻧﺎ ﺟﻴﺖ ﺑﻘﺮﺍ ﻓﻲ ﺍﻟﺠﺎﻣﻌﺔ ﻫﻨﺎ .. ﻭﺳﺎﻛﻦ ﻣﻊ ﻧﺎﺱ ﺧﺎﻟﺘﻲ ..
ﻭﺑﺖ ﺧﺎﻟﺘﻲ ﻭﺻﺎﺣﺒﺘﻬﺎ ﺑﻴﺤﻜﻮ ﻋﻦ ﺑﺖ ﻓﻲ ﺍﻟﻤﺪﺭﺳﻪ .. ﺣﻜﺎﻳﺎﺕ ﻓﻮﻕ ﺍﻟﺨﻴﺎﻝ ﻣﻦ ﺟﻤﺎﻟﻬﺎ ﻭﺍﺩﺑﻬﺎ .. ﻗﺎﻟﻮ ﺍﺳﻤﻬﺎ ﻧﻮﺭ ..
ﻭﺻﺎﺣﺒﺔ ﺑﺖ ﺧﺎﻟﺘﻲ ﺑﺘﻘﺮﺍ ﻣﻌﺎﻫﺎ ﻓﻲ ﻧﻔﺲ ﺍﻟﻔﺼﻞ ﻭﻫﻲ ﺑﺖ ﺍﺳﺘﺎﺫﺓ ﻓﻲ ﻧﻔﺲ ﺍﻟﻤﺪﺭﺳﺔ .
.. ﻭﺍﻧﺎ ﺳﻤﻌﺘﻬﻢ ﻛﻢ ﻣﺮﺓ .. ﺑﻴﺤﻜﻮ ﻋﻦ ﻧﻮﺭ .. ﻓﻲ ﻳﻮﻡ ﻗﻠﺖ ﻟﻲ ﺑﺖ ﺧﺎﻟﺘﻲ ﺃﺳﺎﻟﻲ ﺍﻟﺒﺖ ﺩﻱ .. ﻗﻮﻟﻲ ﻟﻴﻬﺎ ﻧﻮﺭ ﺍﺑﻮﻫﺎ ﺍﺳﻤﻮ ﻣﻨﻮ؟ . ﻭﺍﻣﻬﺎ ﺍﺳﻤﻬﺎ ﻣﻨﻮ ؟ ...
ﻗﺎﻟﺖ ﻟﻲ ﺍﺑﻮﻫﺎ ﻣﺤﻤﺪ ﻭﺍﻣﻬﺎ ﻛﻮﺛﺮ ..
ﺗﺎﻧﻲ ﻳﻮﻡ ﻃﻮﺍﻟﻲ . ﺍﻧﺎ ﻣﺸﻴﺖ ﺍﻟﻤﺪﺭﺳﺔ ﻋﺸﺎﻥ ﺍﺷﻮﻑ ﻧﻮﺭ ..
ﻭﻛﺎﻥ ﺍﻟﻜﻼﻡ ﺩﻩ ﻗﺒﻞ ﻣﺎﺗﻨﺘﻘﺐ .. ﻭﻫﻲ ﻣﺎﻻﺣﻈﺖ ﻟﻲ .. ﻭﺍﻧﺎ ﺷﻔﺘﻬﺎ ﻭﺍﺗﺄﻛﺪﺕ ﻣﻨﻬﺎ ..
ﻭﻟﻘﻴﺘﻬﺎ ﻣﺎﺷﺎﺀ ﺍﻟﻠﻪ . ﺯﺍﺩﺕ ﺍﺩﺏ ﻭﺟﻤﺎﻝ .. ﻭﺍﺳﺘﺤﻴﺖ ﺍﺗﻜﻠﻢ ﻣﻌﺎﻫﺎ .. ﻋﺸﺎﻥ ﻣﺎﻋﺎﻳﺰ ﺍﺟﻴﺐ ﻟﻴﻬﺎ ﻛﻼﻣﺎﺕ ﻭﺳﻂ ﺍﻟﻄﺎﻟﺒﺎﺕ ﻭﺍﻻﺳﺎﺗﺬﺓ ..
ﺑﻘﻴﺖ ﻣﺘﺎﺑﻊ ﺍﺧﺒﺎﺭﻫﺎ .. ﻭﻋﺮﻓﺖ ﺍﻧﻮ ﺧﻄﺒﻬﺎ ﺍﺳﺘﺎﺫ ﻣﻌﺎﻫﺎ ﻓﻲ ﺍﻟﻤﺪﺭﺳﻪ ..
ﻭﺭﻓﻀﻬﺎ ﺗﺎﻧﻲ ﻳﻮﻡ ﻣﻦ ﺍﻟﺨﻄﻮﺑﺔ .. ﻭﻫﻲ ﺍﺗﺎﻟﻤﺖ ﺷﺪﻳﺪ ﻭﺍﺗﺎﺛﺮﺕ . ﻭﻓﻲ ﺍﻻﻭﻝ ﻣﺎﻛﻨﺖ ﻋﺎﺭﻑ ﺍﻟﺴﺒﺐ ﺍﻟﺮﻓﻀﻬﺎ ﺑﻴﻬﻮ .. ﻭﺑﻘﻴﺖ ﻣﺘﺎﺑﻊ ﺍﻻﺳﺘﺎﺫ ﻋﺸﺎﻥ ﺍﻟﻘﻰ ﻟﻲ ﻓﺮﺻﺔ ..
ﻭﺍﻭﺭﻳﻬﻮ ﻧﻮﺭ ﺩﻱ ﺗﻄﻠﻊ ﺷﻨﻮ؟ ﻭﻫﻮ ﻣﻨﻮ ﺯﺍﺗﻮ ﻋﺸﺎﻥ ﻳﺮﻓﺾ ﻧﻮﺭ ؟
ﻓﻲ ﺍﺛﻨﺎﺀ ﻣﺘﺎﺑﻌﺘﻲ ﻟﻼﺳﺘﺎﺫ ﺍﺗﺼﺎﺩﻓﺖ ﺑﻲ ﺍﺧﺘﻪ ﻭﺍﺗﻌﺮﻓﺖ ﺑﻴﻬﺎ ﺍﺳﻤﻬﺎ ﻫﺪﻳﻞ ..
ﻭﻣﺎ ﻭﺭﻳﺘﻬﺎ ﺍﻧﺎ ﺑﻌﺮﻑ ﻧﻮﺭ .. ﻛﻨﺖ ﻋﺎﻳﺰﻫﺎ ﺗﺤﻜﻲ ﻟﻲ ﺑﺮﺍﻫﺎ .. ﻭﻓﻌﻼ ﺩﺭﺩﻗﺘﻬﺎ ﻟﻤﻦ ﺣﻜﺖ ﻟﻲ .. ﻗﺎﻟﺖ ﺍﻧﻬﻢ ﺭﻓﻀﻮ ﻧﻮﺭ ﻻﻧﻬﺎ .. ﻣﺮﺑﻴﺔ ﻣﻌﺎﻛﻢ ﻭﻣﺎﻣﻌﺮﻭﻑ ﺍﻫﻠﻬﺎ ..
ﻗﺎﻟﺖ ﻟﻲ ﺍﻟﺒﺖ ﻃﻠﻌﺖ ﻟﻘﻴﻄﺔ ..
ﻭﺑﺎﻟﻤﻨﺎﺳﺒﺔ ﻫﺪﻳﻞ ﺩﻱ ﺍﻱ ﺯﻭﻝ ﺗﻼﻗﻴﻬﻮ ﺗﻜﻠﻤﻮ .. ﺗﻘﻮﻝ ﻟﻴﻮ ﻋﺎﺩﻝ ﺍﺧﻮﻱ ﻃﻠﺐ ﺑﺖ ﻭﺧﻼﻫﺎ ﻻﻧﻬﺎ ﻟﻘﻴﻄﺔ .. ﻭﺍﻧﺎ ﻛﻨﺖ ﻣﺘﻐﺎﻳﻆ ﻣﻨﻬﺎ ﺟﺪﺍ .. ﻭﻣﻦ ﺣﺒﻬﺎ ﻟﻨﺸﺮ ﺍﻻﺧﺒﺎﺭ ﻭﺍﻟﻔﻀﺎﻳﺢ .. ﻭﻛﻨﺖ ﺩﺍﻳﺮ ﻟﻲ ﻓﻴﻬﺎ ﻓﺮﺻﺔ ﺍﺭﺑﻴﻬﺎ .. ﻭﺍﻭﺭﻳﻬﺎ ﺍﻟﻄﻔﺎ ﺍﻟﻨﻮﺭ ﻣﻨﻮ .
ﻭﻻﺣﻈﺖ ﻓﻲ ﺳﻠﻮﻛﻴﺎﺕ ﻫﺪﻳﻞ ﺧﻠﻞ ﻛﺒﻴﺮ .. ﻭﻋﻨﺪﻫﺎ ﻋﻼﻗﺎﺕ ﻣﻊ ﺍﻟﺸﻔﺎﺗﺔ ﻭﺍﻟﺼﻌﺎﻟﻴﻖ ﻭﺑﺘﺘﻜﻠﻢ ﻓﻲ ﺍﻟﺘﻠﻔﻮﻥ ﺍﻛﺘﺮ . ﻣﻦ ﻣﻮﻇﻒ ﺧﺪﻣﺎﺕ ﺍﻟﻤﺸﺘﺮﻛﻴﻦ .. ﺑﻘﻴﺖ ﺑﻼﻗﻴﻬﺎ ﻃﻮﺍﻟﻲ ﻭﻫﺪﻓﻲ ﺍﻛﻮﻥ ﻋﺎﺭﻑ ﻫﻲ ﺑﺘﻌﻤﻞ ﻓﻲ ﺷﻨﻮ ﺑﺎﻟﻀﺒﻂ ..
ﺍﻫﺎ ﺑﻌﺪ ﻓﺘﺮﺓ . ﻫﺪﻳﻞ ﻧﻔﺴﻬﺎ ﺍﻟﻜﻠﻤﺘﻨﻲ ﻭﻗﺎﻟﺖ ﻟﻲ : ﺍﻟﺒﺖ ﺍﻟﻠﻘﻴﻄﺔ ﺣﻴﺘﺰﻭﺟﻬﺎ ﻭﺍﺣﺪ ﺍﺳﻤﻮ ﺧﻀﺮ .. ﻭﺡ ﻳﺸﻐﻠﻬﺎ ﻧﻘﺎﻃﺔ .. ( ﺷﻮﻑ ﺍﻟﻠﻔﻈﺔ ﻧﻘﺎﻃﺔ ) ..
ﻭﻗﺎﻟﺖ ﺍﺣﺘﻤﺎﻝ ﺑﻌﺪ ﻳﺰﻭﺟﻬﺎ ﻳﺴﻔﺮﻭﻫﺎ ﺑﺮﺓ ﻻﻧﻬﺎ ﻋﻤﻠﺔ ﺣﺮﺓ ﺑﺘﺠﻴﺐ ﺩﻭﻻﺭ ..
ﻭﻛﻢ ﻣﺮﺓ ﻫﺪﻳﻞ ﺩﻱ ﺑﺘﻘﻮﻝ ﻟﻲ .. ﺍﺭﺡ ﻣﻌﺎﻱ ﻟﺒﻴﺖ ﻧﺎﺱ ﺳﻤﻴﺮﺓ .. ﻋﺸﺎﻥ ﺗﺮﻓــﻪ ﻋﻦ ﺭﻭﺣﻚ .. ﻭﺗﺴﺘﻤﺘﻊ .. ﻭﻋﺮﻓﺖ ﺍﻧﻮ ﻓﻲ ﺑﻴﺖ ﺳﻤﻴﺮﺓ .. ﺣﺎﺻﻞ ﺣﺎﺻﻞ .. ﻭﺧﻔﺖ ﺷﺪﻳﺪ ﻋﻠﻰ ﻧﻮﺭ ﺍﻧﻬﺎ ﺗﻘﻊ ﻓﻲ ﺍﻟﻮﺭﻃﺔ ﺩﻱ .. ﻭﻳﻮﻡ ﻟﻘﻴﺖ ﺍﺳﺘﺎﺫ ﻋﺎﺩﻝ ﻭﺍﻗﻒ ﻗﺪﺍﻡ ﺑﻴﺖ ﺳﻤﻴﺮﺓ .. ﻭﻃﻠﻌﺖ ﺍﺧﺘﻮ ﻭﻣﺪﺕ ﻟﻴﻬﻮ ﺣﺎﺟﺔ ﻭﻟﻤﻦ ﺍﺳﺘﻔﺴﺮﺕ ﻣﻨﻬﺎ ﻗﺎﻟﺖ ﻟﻲ .. ﻋﺎﺩﻝ ﻣﺪﻣﻦ ﺍﻟﺒﻨﻘﻮ ﻳﺎ ﻓﺨﺮﻱ ..
ﻭﻣﻊ ﺍﻧﻮ ﻣﻠﺘﺰﻡ ﻣﺎﻗﺎﺩﺭ ﻳﺘﺨﻠﺺ ﻣﻨﻪ .. ﻭﻫﻮ ﻻﻧﻮ ﻋﺎﻣﻞ ﻓﻴﻬﺎ ﻣﻮﻻﻧﺎ .. ﻣﺎﺑﻘﺪﺭ ﻳﺘﺤﺼﻞ ﻋﻠﻴﻬﻮ ﺍﻻ ﺍﺟﻴﺒﻮ ﻟﻴﻬﻮ ﺍﻧﺎ ﻣﻦ ﺧﻀﺮ ﺍﺧﻮ ﺳﻤﻴﺮﺓ ..
ﻫﻨﺎ ﺍﻧﺎ ﻓﺮﺣﺖ ﻓﺮﺡ ﺷﺪﻳﺪ ﺍﻧﻮ ﻧﻮﺭ ﺭﺑﻨﺎ ﻧﺠﺎﻫﺎ ﻣﻦ ﻋﺎﺩﻝ ﻭﺍﺳﺮﺗﻮ ﺍﻟﻮﺳﺨﺔ ﺩﻱ ..
ﻟﻜﻦ ﻛﻨﺖ ﺧﺎﻳﻒ ﺍﻧﻜﻢ ﺗﻮﺍﻓﻘﻮ ﻋﻠﻰ ﺯﻭﺍﺝ ﻧﻮﺭ ﻟﻲ ﺧﻀﺮ ﺍﻟﻔﺎﺳﻖ ﺍﻟﻤﻨﺤﻞ ..
ﺑﺲ ﺍﻟﺤﻤﺪ ﻟﻠﻪ ﻋﺮﻓﺖ ﺍﻧﻜﻢ ﻃﻠﺒﺘﻮ ﻓﺘﺮﺓ ﺯﻣﻨﻴﺔ ﻟﻠﺘﺸﺎﻭﺭ .. ﺍﻧﺎ ﺍﺳﺘﻐﻠﻴﺖ ﺍﻟﻔﺮﺻﺔ ﺩﻱ ﻃﻮﺍﻟﻲ ..
ﻭﺣﻜﻴﺖ ﻟﻲ ﺟﻨﺎﺑﻮ ( ﻋﻤﺎﺭ ) ﻛﻞ ﺗﻔﺎﺻﻴﻞ ﺍﻟﻤﻮﺿﻮﻉ .. ﻭﻫﻮ ﻣﺸﻜﻮﺭ ﺩﻋﻤﻨﻲ ﺩﻋﻢ ﻛﺒﻴﺮ ..
ﻭﺍﻧﺎ ﺑﻘﻴﺖ ﻣﺘﻠﺰﻕ ﻣﻊ ﻫﺪﻳﻞ ﻭﻋﺮﻓﺘﻨﻲ ﻋﻠﻲ ﺳﻤﻴﺮﺓ ..
ﻟﻐﺎﻳﺔ ﻣﺎ ﺧﻠﻴﺘﻬﻢ ﻳﻄﻤﺌﻨﻮ ﻟﻲ
ﻭﻗﺎﻟﻮ ﻟﻲ ﺍﻟﻠﻴﻠﺔ ﺟﺎﻳﺒﻴﻦ ﺑﻨﺎﺕ ﻭﻋﻨﺪﻧﺎ ﻗﻌﺪﺓ ﺗﻌﺎﻝ ﻟﻴﻨﺎ .. ﻭﺍﻧﺎﻭ ﺍﻓﻘﺖ ..
ﺑﺮﺿﻮ ﺍﺳﺘﻐﻠﻴﺖ ﺍﻟﻈﺮﻑ ﻭﺳﻘﺖ ﻣﻌﺎﻱ ﺟﻨﺎﺑﻮ ﻋﻤﺎﺭ ﻭﺳﺎﻕ ﻣﻌﺎﻫﻮ ﺍﻟﺘﻴﻢ ﺍﻻﻣﻨﻲ .. ﻭﺩﺧﻠﻮ ﻗﺒﻀﻮﻫﻢ ﺑﺎﻟﺜﺎﺑﺘﺔ .. ﻭﺑﻜﺮﺓ ﺍﻟﺴﺒﺖ ﺧﺒﺮﻫﻢ ﺣﻴﻄﻠﻊ ﻓﻲ ﺍﻟﺠﺮﺍﻳﺪ ..
ﻻﻧﻬﺎ ﺍﻟﻘﻀﻴﺔ ﺑﻘﺖ ﻗﻀﻴﺔ ﺭﺍﻱ ﻋﺎﻡ .. ﺩﻳﻞ ﻳﺎﻋﻢ ﻣﺤﻤﺪ ﻋﺼﺎﺑﺔ ﻣﻔﺴﺪﺓ .
ﻭﻧﻮﺭ ﺍﻟﺤﻤﺪ ﻟﻠﻪ ﻃﻠﻌﺖ ﻣﻨﻬﺎ ﺯﻱ ﺍﻟﺴﺒﻴﺒﺔ ﻣﻦ ﺍﻟﻌﺠﻴﻦ ..
ﻭﺍﻧﺎ ﻛﺪﺍ ﺍﺩﻳﺖ ﺍﻟﻌﻠﻲ .. ﻭﻣﺎﺷﻲ .. ﺳﻠﻢ ﻟﻲ ﻋﻠﻰ ﻧﻮﺭ ﻭﻋﻠﻰ ﺧﺎﻟﺘﻮ ﻛﻮﺛﺮ ..
ﺍﻟﻰ ﺍﻟﻠﻘﺎﺀ
ﺍﻟﻤﺴﺆﻭﻟﻴﺔ .
ﺍﻟﺤﻠﻘﻪ .19
ﺑﻘﻠﻢ ﻃﺎﺭﻕ ﺍﻟﻠﺒﻴﺐ ..
ﻣﺤﻤﺪ ﻗﺎﻝ .. ﻟﻲ ﻓﺨﺮﻱ ﻃﻴﺐ ﻳﺎﻓﺨﺮﻱ ﺍﻧﺖ ﻫﺴﻲ ﻣﺎﺷﻲ ﻭﻳﻦ؟ ﻭﺭﻳﻨﻲ ﺑﺲ ﻋﻠﻲ ﺍﻻﻗﻞ ﺳﺎﻛﻦ ﻭﻳﻦ ﻭﻋﻨﻮﺍﻧﻚ ﺭﻗﻢ ﺗﻠﻔﻮﻥ ﺍﻱ ﺣﺎﺟﻪ ..
ﻗﺎﻝ ﻟﻴﻬﻮ ﻣﺎﺗﺸﻴﻞ ﻫﻢ ﻳﺎﺧﺎﻝ ﺍﻥ ﺷﺎﺀ ﺍﻟﻠﻪ ﻧﺘﻼﻗﻰ ..
ﺑﺲ ﻫﺴﻲ ﺍﻧﺎ ﻣﺴﺘﻌﺠﻞ ﺷﺪﻳﺪ ﻋﻨﺪﻱ ﻣﺤﺎﺿﺮﺓ .. ﻭﻃﻠﻊ ﻃﻮﺍﻟﻲ ﻣﺸﻰ ..
ﻭﻣﺤﻤﺪ ﻣﺸﻰ ﺍﻟﺒﻴﺖ ﻭﺍﻟﺪﻫﺸﺔ ﻣﺎﻟﻴﻪ ﺭﺍﺳﻮ ﻛﻠﻮ ﻛﻠﻮ ..
ﺍﻫﺎ ﺍﻭﻝ ﻣﺎ ﻭﺻﻞ ﺍﻟﺒﻴﺖ ﻗﺎﻝ ﻳﺎﻛﻮﺛﺮ .. ﻳﺎﻧﻮﺭ .. ﺗﻌﺎﻟﻮ ﺗﻌﺎﻟﻮ ﺷﻮﻓﻮ ﺍﻟﺤﺎﺻﻞ ..
ﻭﺍﻟﻠﻪ ﺍﻧﺎ ﻣﺎﻗﺎﺩﺭ ﺍﺻﺪﻕ ﺑﻲ ﺍﻟﺒﺤﺼﻞ ﺩﻩ ﻧﻬﺎﺋﻲ ..
ﻛﻮﺛﺮ ﻗﺎﻟﺖ ﻟﻲ ﺳﺠﻤﻲ ﻣﺎﻟﻚ ؟ ﻓﻲ ﺷﻨﻮ؟ .. ﺑﺲ ﺍﻥ ﺷﺎﺀ ﺍﻟﻠﻪ ﺧﻴﺮ .. ﻗﺎﻝ ﻟﻴﻬﺎ ﺧﻴﺮ ﻭﺍﻟﻒ ﺧﻴﺮ ﺑﺲ ﺑﺘﻚ ﺩﻱ ﺯﻭﻟﺔ ﺻﺎﻟﺤﺔ ﻭﺭﺑﻨﺎ ﺣﺎﻓﻈﻬﺎ ..
ﻗﺎﻟﺖ ﻟﻴﻬﻮ ﺍﺣﻜﻲ ﺍﻟﺤﺼﻞ ﺷﻨﻮ .. ﻭﺑﺪﺍ ﻳﺤﻜﻲ ﻟﻴﻬﻢ ﻓﻲ ﺍﻟﺤﺎﺻﻞ ﻧﻮﺭ ﻗﺎﻋﺪﻩ ﻓﻲ ﻃﺮﻑ ﺍﻟﺴﺮﻳﺮ ﻭﺗﺴﻤﻊ ﻓﻲ ﺍﻟﺮﻭﺍﻳﺔ ﻟﻤﻦ ﺟﺎﺏ ﻟﻴﻬﻢ ﺳﻴﺮﺓ ﻓﺨﺮﻱ ..
ﺍﻻﺗﻨﻲ ﻗﺎﻟﻦ ﻳﺤﻠﻴﻠﻮ .. ( ﻧﻮﺭ ﻗﺎﻟﺖ ﻟﻴﻬﻮ . ﺳﺒﺤﺎﻥ ﺍﻟﻠﻪ ﺑﻘﺮﺍ ﻫﻨﺎ ﺟﻨﺒﻨﺎ ﻭﻧﺤﻦ ﻣﺎﻋﺎﺭﻓﻴﻦ . ؟
ﻗﺎﻝ ﻟﻴﻬﺎ ﺟﺎ ﻭﺷﺎﻓﻚ ﻓﻲ ﺍﻟﻤﺪﺭﺳﺔ .. ﻗﺎﻟﺖ ﻟﻴﻬﻮ ﻣﻌﻘﻮﻝ ﻭﻻﺳﻠﻢ ﻋﻠﻲ؟ .. ﺍﺻﺒﺮ ﻟﻲ ﻟﻴﻬﻮ . ﻛﻮﺛﺮ ﻗﺎﻟﺖ ﻟﻴﻬﻮ ﺍﻫﺎ ﻭﺍﺻﻞ ﻳﺎﻣﺤﻤﺪ ..
ﺍﻟﻤﻬﻢ ﺣﻜﺎ ﻟﻴﻬﻢ ﺍﻟﺤﺼﻞ .. ﻣﻦ ﻃﻖ ﻃﻖ ﻟﻠﺴﻼﻡ ﻋﻠﻴﻜﻢ ..
ﺑﺲ ﻓﻲ ﺣﺎﺟﺘﻴﻦ ﻣﺎﺣﻜﺎﻫﻦ . ﺣﻜﺎﻳﺔ ﺍﻻﺟﻬﺎﺽ . ﻭﺍﻧﻮ ﻫﺪﻳﻞ ﺑﺘﺸﺘﻐﻞ ﺳﻤﺴﺎﺭﻩ .
ﻭﻟﻤﻦ ﺣﻜﺎ ﺣﻘﻴﻘﺔ ﺍﺳﺘﺎﺫ ﻋﺎﺩﻝ .. ﻧﻮﺭ ﺧﺘﺖ ﻳﺪﻳﻨﻬﺎ ﻓﻮﻕ ﺧﺸﻤﻬﺎ .. ﻭ ﺍﻧﺰﻋﺠﺖ ﺍﻧﺰﻋﺎﺝ ﺷﺪﻳﺪ ﺧﻼﺹ .. ﻭﺑﻘﺖ ﺗﺒﻜﻲ ..
ﻭﻗﺎﻟﺖ ﻟﻴﻬﻮ .. ﻣﺴﻜﻴﻦ ﺍﺳﺘﺎﺫ ﻋﺎﺩﻝ ﺍﻟﺮﻣﺎﻫﻮ ﻓﻲ ﺍﻟﻤﺼﺎﻳﺐ ﺩﻱ ﺷﻨﻮ؟
ﻭﻫﺪﻳﻞ ﺍﺧﺘﻪ ﻳﺎﺣﺮﺍﻡ .. ﻫﺴﻲ ﺍﺳﺘﺎﺫ ﻋﺎﺩﻝ ﻓﻲ ﺍﻟﺴﺠﻦ؟
ﻧﺎﺱ ﺍﻟﺒﻴﺖ ﻛﻠﻬﻢ ﺳﻴﺮﺗﻬﻢ ﺣﺘﺒﻘﻰ ﻋﻠﻰ ﻟﺴﺎﻥ ﺍﻟﻴﺴﻮﻯ ﻭﺍﻟﻤﺎﻳﺴﻮﻯ .
ﻭﺗﺎﻧﻲ ﺣﻴﻜﻮﻧﻮﺍ ﺧﺠﻼﻧﻴﻦ ﻣﻦ ﺍﻟﻨﺎﺱ .. ﻭﻭﺍﺻﻠﺖ ﻧﻮﺭ ﺗﺘﻜﻠﻢ ﺑﺤﺎﻟﺔ ﻫﺴﺘﻴﺮﻳﺔ ..
ﻣﻌﻘﻮﻝ ﺍﻟﻨﺎﺱ ﺩﻱ ﺑﺘﻌﻤﻞ ﻛﺪﺍ ﺑﺪﻭﻥ ﺧﻮﻑ ﻣﻦ ﺍﻟﻠﻪ .. ﻭﻣﺎﻋﺎﺭﻓﻴﻦ ﻧﺘﺎﻳﺞ ﺍﻓﻌﺎﻟﻬﻢ ..
ﻣﻌﺎﻧﺎﺗﻲ ﻭﺣﻴﺎﺗﻲ ﻭﺍﻟﺤﺎﺻﻞ ﻋﻠﻲ ﺩﻩ ﻛﻠﻮ ﻭﻋﻠﻰ ﺍﺑﺮﻳﺎﺀ ﻛﺘﻴﺮﻳﻦ ﺯﻱ ﺣﺎﻟﺘﻲ ..
ﻣﻦ ﺍﻓﻌﺎﻝ ﺯﻱ ﺩﻱ ﻳﺎﺟﻤﺎﻋﺔ .. ﻟﻮ ﻣﺎﻓﻲ ﺧﻮﻑ ﻣﻦ ﺭﺏ ﺍﻟﻌﺎﻟﻤﻴﻦ .. ﻣﺎﻓﻲ ﻗﻠﻮﺏ ﺭﺣﻴﻤﻪ ؟؟
ﺣﺴﺒﻲ ﺍﻟﻠﻪ .. ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ .. ﻭﺳﻜﺘﺖ ﻣﺴﺎﻓﺔ ..
ﻭﻗﺎﻟﺖ ﻟﻴﻬﻮ .. ﻳﺎ ﺑﺎﺑﺎ ﺍﻋﻤﻞ ﺣﺎﺟﺔ ﺍﻟﻠﻪ ﻳﺨﻠﻴﻚ ﻛﻠﻢ ﻧﺎﺱ ﺍﻟﺒﻮﻟﻴﺲ ﺑﻼﺵ ﻣﻦ ﺍﻟﺠﺮﺍﻳﺪ ﻭﺍﻟﻔﻀﺎﻳﺢ .. ﻣﻤﻜﻦ ﻳﺴﻤﻌﻮﺍ ﻛﻼﻣﻚ .. ﺧﻠﻴﻬﻢ ﻳﻌﺎﻗﺒﻮﻫﻢ ﻋﻠﻰ ﻓﻌﻠﻬﻢ ﺑﺲ ﺑﺎﻟﺴﺘﺮﻩ . ﺭﺑﻨﺎ ﺍﻣﺮ ﺑﺎﻟﺴﺘﺮ ﻳﺎ ﺑﺎﺑﺎ ..
ﻣﻦ ﺳﺘﺮ ﻣﺴﻠﻤﺎ " ﺳﺘﺮﻩ ﺍﻟﻠﻪ ﻓﻲ ﺍﻟﺪﻧﻴﺎ ﻭﺍﻻﺧﺮﺓ ﻭﻓﻲ ﺍﻟﻨﻬﺎﻳﺔ ﺑﺎﺏ ﺍﻟﺘﻮﺑﺔ ﻣﻔﺘﻮﺡ ..
ﺭﺑﻨﺎ ﻳﺴﺘﺮﻙ ﻭﻳﻬﺪﻳﻚ ﻳﺎ ﺍﺳﺘﺎﺫ ﻋﺎﺩﻝ ﻭﻳﻬﺪﻱ ﻛﻞ ﻋﺎﺻﻲ ( ﺩﻩ ﻛﻠﻮ ﻛﻼﻡ ﻧﻮﺭ ) .
ﻣﺤﻤﺪ ﻗﺎﻝ ﻟﻴﻬﺎ .. ﺍﻧﺘﻲ ﺯﻭﻟﻪ ﻏﺮﻳﺒﻪ ﺑﺎﻟﺠﺪ ﻳﺎﻧﻮﺭ . ﺑﺪﻝ ﺗﻔﺮﺣﻲ ﺍﻧﻮ ﺭﺑﻨﺎ ﻧﺠﺎﻙ .
ﺷﺎﻳﻠﻪ ﻟﻲ ﻫﻢ ﺍﺳﺘﺎﺫ ﻋﺎﺩﻝ ؟
ﻗﺎﻟﺖ ﻟﻴﻬﻮ ﻭﺍﻟﻠﻪ ﻳﺎ ﺑﺎﺑﺎ .. ﺍﻧﺎ ﺑﺘﺼﻮﺭ ﻓﻲ ﺍﻟﺒﻴﺤﺼﻞ ﻋﻠﻴﻬﻢ . ﻟﻤﻦ ﺧﻮﻓﺖ .
ﺍﻧﺎ ﻳﺎﺑﺎ ﺍﺻﻠﻮ ﻣﺎ ﻃﺎﻟﺒﻪ ﻣﻨﻚ ﺣﺎﺟﺔ ﻏﻴﺮ .. ﺍﻧﻚ ﺗﺤﺎﻭﻝ ﺗﻮﻗﻒ ﻗﺼﺔ ﺍﻟﺠﺮﺍﻳﺪ ﺩﻱ ..
ﻭﺍﻣﻬﺎ ﻣﺘﻤﺤﻨﻪ ﺗﻌﺎﻳﻦ ﻟﻴﻬﺎ ..
ﻣﺤﻤﺪ ﻗﺎﻝ ﻟﻴﻬﺎ ﺑﺲ ﻳﺎﻧﻮﺭ ﺍﻟﻤﻮﻭﺿﻮﻉ ﺩﻩ ﺑﻘﻰ ﻓﻲ ﻳﺪ ﺍﻟﺤﻜﻮﻣﺔ ..
ﻗﺎﻟﺖ ﻟﻴﻬﻮ ﻟﻜﻦ ﻳﺎﺑﺎ . ﺍﻧﺎ ﺑﻜﻮﻥ ﻣﻜﺴﻮﺭﺓ ﻭﺧﺠﻼﻧﺔ ﺍﻧﻮ ﺍﺳﺘﺎﺫﻱ ﻳﻜﻮﻥ ﻛﺪﺍ ..
ﻃﻴﺐ ﻧﺤﻦ ﻧﺤﺎﻭﻝ ﻧﻌﻤﻞ ﺣﺎﺟﺔ ..
ﻳﺎﺑﺎﺑﺎ .. ﺍﻧﺎ ﺍﻱ ﺣﺎﺟﺔ ﺑﻄﻠﺒﻬﺎ ﻣﻨﻚ ﺍﻧﺖ ﻣﺎ ﻗﺎﻋﺪ ﺗﺮﺩ ﻟﻲ ﻃﻠﺐ ﺑﺲ ﻟﺒﻲ ﻃﻠﺒﻲ ﺩﻩ ..
ﺍﻧﺎ ﻋﺎﻳﺰﺓ ﺍﻋﻤﻞ ﺣﺎﺟﺔ .. ﻭﺩﻳﻨﻲ ﻟﻠﻀﺎﺑﻂ ﺩﻩ ﺍﺗﻜﻠﻢ ﻣﻌﺎﻫﻮ ..
ﻻﻻ ﻻ .. ﺍﻗﻮﻝ ﻟﻴﻚ ﺣﺎﺟﻪ؟ .. ﺩﻗﻴﻘﺔ .. ﺧﺸﺖ ﺟﻮﻩ ﻭﻣﺰﻋﻮﺟﻪ ﺟﺪﺍ ..
ﺟﺎﺑﺖ ﻭﺭﻗﺔ ﻭﺑﺪﺕ ﺗﻜﺘﺐ ..
ﻣﺤﻤﺪ ﻗﺎﻝ ﻟﻴﻬﺎ ﺑﺘﻜﺘﺒﻲ ﻓﻲ ﺷﻨﻮ؟
ﻗﺎﻟﺖ ﻟﻴﻬﻮ ﻋﺎﻳﺰ ﺍﻛﺘﺐ ﻭﺭﻗﺔ ﻟﻠﻀﺎﺑﻂ .. ﺑﺘﻮﺩﻳﻬﺎ ﻟﻴﻬﻮ ؟ ﻋﻠﻴﻴﻴﻚ ﺍﻟﻠﻪ ﻋﻠﻴﻴﻴﻴﻴﻚ ﺍﻟﻠﻪ ﻳﺎ ﺍﺑﺎﺑﺎ ..
ﻗﺎﻝ ﻟﻴﻬﺎ ﺣﺎﺿﺮ ﻳﺎﻧﻮﺭ ﺣﺎﺿﺮ ﺍﻛﺘﺒﻲ ﻭﺍﻟﻠﻪ ﺍﻭﺻﻠﻬﺎ ..
ﻛﺘﺒﺖ :
ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ .
ﺍﻟﻲ ﺣﻀﺮﺓ ﺍﻟﻀﺒﻂ ﺍﻟﻤﺤﺘﺮﻡ . ﺍﻟﺴﻼﻡ ﻋﻠﻴﻜﻢ ﻭﺭﺣﻤﺔ ﺍﻟﻠﻪ
ﺍﻛﺘﺐ ﺍﻟﻴﻚ ﻫﺬﺍ ﺍﻟﺨﻄﺎﺏ ﻭﻛﻠﻲ ﺍﻣﻞ ﺍﻧﻚ ﻻ ﺗﺨﻴﺐ ﺭﺟﺎﺋﻲ ..
ﺍﻧﺎ ﻧﻮﺭ ﻣﺤﻤﺪ ﺍﻟﺘﻲ ﺗﻌﺮﻑ ﺍﺳﻤﻲ ﻣﻦ ﻓﺨﺮ ﺍﻟﺪﻳﻦ .
ﺍﻃﻠﺐ ﻣﻨﻚ ﺍﻥ ﺗﺴﺘﺮ ﻫﻮﻻﺀ ﺍﻟﻨﺎﺱ ﺭﺑﻨﺎ ﻳﺴﺘﺮﻙ ﻓﻲ ﺍﻟﺪﻧﻴﺎ ﻭﺍﻻﺧﺮﺓ
ﻭﻳﺴﺘﺮ ﺍﺳﺮﺗﻚ ﻭﺑﻨﺎﺗﻚ ﻳﺎﺭﺏ ﺍﻟﻌﺎﻟﻤﻴﻦ .
ﻭﻻﺗﺴﻤﺢ ﻟﻠﺠﺮﺍﺋﺪ ﺍﻥ ﺗﻜﺘﺐ ﺍﺧﺒﺎﺭﻫﻢ . ﻭﺣﺎﻭﻝ ﺑﻘﺪﺭ ﺍﻟﻤﺴﺘﻄﺎﻉ ﺍﻥ ﻻﺗﺬﻛﺮ ﺍﺳﻢ ﺍﺳﺘﺎﺫﻱ ﻋﺎﺩﻝ ﻓﺎﻧﺘﻢ ﻟﻢ ﺗﺠﺪﻭ ﻋﻠﻴﻪ ﺑﻴﻨﺔ .
ﻭﺍﻧﺎ ﻻ ﺍﻣﻨﻌﻚ ﺍﻥ ﺗﻄﺒﻖ ﺍﻟﻘﺎﻧﻮﻥ ﻋﻠﻰ ﺍﻟﻤﺬﻧﻴﺒﻦ .
ﻭﻟﻜﻦ ﺍﻱ ﻃﺮﻳﻘﺔ ﺗﻠﻘﻰ ﻓﻴﻬﺎ ﺳﺘﺮﺓ . ﺍﺳﺘﺮ ﺭﺑﻨﺎ ﻳﺴﺘﺮﻙ
ﺍﺑﻨﺘﻚ ﻧﻮﺭ .
ﻭﻃﺒﻘﺖ ﺍﻟﻮﺭﻗﺔ ﻭﻗﺎﻟﺖ ﻟﻴﻬﻮ ﻋﺸﺎﻥ ﺧﺎﻃﺮﻱ ﻳﺎﺑﺎﺑﺎ ﻭﺻﻞ ﺍﻟﻮﺭﻗﺔ ﺩﻱ ﻟﻠﻀﺎﺑﻂ .
.
ﺍﻟﻤﺴﺆﻭﻟﻴﺔ
ﺍﻟﺤﻠﻘﺔ 20
ﺑﻘﻠﻢ ﻃﺎﺭﻕ ﺍﻟﻠﺒﻴﺐ ..
ﻣﺤﻤﺪ ﺷﺎﻝ ﺍﻟﻮﺭﻗﺔ ﻭﻗﺎﻝ ﻟﻴﻬﺎ .. ﺍﻧﺎ ﺑﻤﺸﻲ ﻳﺎﻧﻮﺭ ﻟﻜﻦ ﺃﻧﺎ ﻣﺎﻣﺴﺆﻝ ﻣﻦ ﺍﻟﻨﺘﻴﺠﺔ
ﻗﺎﻟﺖ ﻟﻴﻬﻮ ﺧﻼﺹ ﻳﺎ ﺍﺑﺎﺑﺎ ﻣﺎﻣﺴﺆﻝ .
ﻭﻫﻮ ﻣﺸﻰ ..
ﻭﻫﻲ ﺑﻘﺖ ﺗﻘﻮﻝ ﻳﺎﺭﺏ ﺳﺘﺮﻙ .. ﻳﺎﺭﺏ ﺳﺘﺮﻙ .
ﻳﺎﺭﺏ ﺗﻬﺪﻳﻬﻢ .. ﻫﻢ ﻣﺎﻋﺎﺭﻓﻴﻦ ﻧﺘﻴﺠﺔ ﺍﻟﺒﻌﻤﻠﻮ ﻓﻴﻬﻮ ﺩﻩ .. ﺧﻠﻴﻬﻢ ﻳﺠﻮ ﻳﺴﺄﻟﻮﻧﻲ ﺍﻧﺎ
ﻭﻳﺸﻮﻓﻮ ﺍﺣﺴﺎﺳﻲ ﺑﺎﻟﺤﻴﺎﺓ ﻋﺎﻣﻞ ﻛﻴﻒ ؟
ﻟﻮ ﻋﺎﺭﻓﻴﻦ ﺍﻟﻤﺼﺎﻳﺐ ﺍﻟﺒﺘﺤﺼﻞ ﻣﻦ ﻋﻤﺎﻳﻠﻬﻢ ﻣﺎﺑﻌﻤﻠﻮﻫﺎ ﻳﺎﺭﺏ ﺗﻬﺪﻳﻬﻢ .
ﻭﺍﻣﻬﺎ ﺗﻌﺎﻳﻦ ﻟﻴﻬﺎ ﺑﺎﺳﺘﻐﺮﺍﺏ ..
ﻣﺤﻤﺪ ﻭﺻﻞ ﺷﺎﻳﻞ ﺍﻟﻮﺭﻗﺔ .. ﻭﻻﻗﻰ ﺍﻟﻀﺎﺑﻂ .. ﻭﺣﻜﻰ ﻟﻴﻬﻮ ﻣﻮﻗﻒ ﻧﻮﺭ ..
ﻭﺍﺩﺍﻫﻮ ﺍﻟﻮﺭﻗﺔ .. ﺍﻟﻀﺎﺑﻂ ﻗﺮﺍ ﺍﻟﻮﺭﻗﺔ .. ﻭﺑﻘﻰ ﻳﻤﺴﺢ ﻓﻲ ﺩﻣﻮﻋﻪ .. ﺳﺒﺤﺎﻥ ﺍﻟﻠﻪ ..
ﻗﺎﻝ ﻟﻴﻬﻮ .. ﻗﻮﻝ ﻟﻴﻬﺎ .. ﻗﺎﻝ ﻟﻴﻚ .. ﻣﺎﻓﻲ ﺟﺮﻳﺪﺓ ﺑﺘﺠﻲ ﻫﻨﺎ ﺩﻩ ﻭﻋﺪ ..
ﻭﺣﻨﺤﺎﺳﺒﻬﻢ ﻓﻲ ﻛﻞ ﺳﺮﻳﺔ .. ﻭﻧﺮﺍﻗﺒﻬﻢ ﻃﻮﻝ ﺣﻴﺎﺗﻬﻢ .. ﻭﺍﻟﻘﺎﻧﻮﻥ ﻳﺠﺮﻱ ﻣﺠﺮﺍﻫﻮ .
ﻭﺍﺳﺘﺎﺫ ﻋﺎﺩﻝ ﺯﻭﻝ ﺟﺎﻳﺐ ﺳﻴﺮﺗﻮ ﻣﺎﻓﻲ .. ﺩﻩ ﻭﻋﺪ ﻣﻨﻲ ﻟﻲ ﻧﻮﺭ ﻳﺎ ﻣﺤﻤﺪ ..
ﻭﺍﻟﻀﺎﺑﻂ ﺷﺎﻝ .. ﺍﻟﻮﺭﻗﺔ ﻭﻣﺸﻰ ﻗﺮﺍﻫﺎ ﻟﻠﻤﺠﺮﻣﻴﻦ ﺍﻟﺴﻔﻠﻪ .. ﺍﻟﻤﺰﻟﻮﻟﻴﻦ ﻓﻲ ﺍﻟﺤﺮﺍﺻﺎﺕ .
ﻭﻗﺎﻝ ﻟﻴﻬﻢ ﺷﻮﻓﻮ ﺍﻟﻤﻔﺎﺭﻗﺎﺕ ﺷﻮﻓﻮ ﺍﻧﺘﻮ ﻧﺎﻭﻳﻦ ﻟﻴﻬﺎ ﺑﺸﻨﻮ؟ ﻭﻫﻲ ﺑﺘﻌﻤﻞ ﻓﻲ ﺷﻨﻮ ..
ﺑﺎﻟﺠﺪ ﺍﻧﺘﻮ ﻧﺎﺱ ﺧﻨﺎﺯﻳﺮ ..
ﻭﺍﻟﻀﺎﺑﻂ ﺣﺎﻭﻝ ﻳﺴﺘﺮ ﺑﻘﺪﺭ ﺍﻟﻤﺴﺘﻄﺎﻉ .. ﺑﺲ ﺍﻟﺨﺒﺮ ﻭﺻﻞ ﺍﺳﺮﺓ ﻧﺎﺱ ﻋﺎﺩﻝ .
ﻭﺍﺗﺴﺮﺏ ﻣﻦ ﻳﻮﻡ ﺍﻟﻤﺪﺍﻫﻤﺔ . ﻓﻲ ﺍﻟﺤﻠﻪ ﻛﻠﻬﺎ ..
ﻟﻜﻦ ﻓﻲ ﺍﻟﻨﻬﺎﻳﺔ ﻋﺮﻓﻮ ﺍﻧﻮ ﻧﻮﺭ ﻛﺘﺒﺖ ﻟﻠﻀﺎﺑﻂ ﻭﻣﻨﻌﺖ ﺍﻟﺠﺮﺍﻳﺪ .
ﻭﻗﺎﻟﻮ ﻫﺪﻳﻞ ﺟﻠﺪﻭﻫﺎ ﺟﻠﺪ ﺍﻟﺒﻘﺮ ... ﻭﺗﺎﺑﺖ ﺗﻮﺑﺔ ﺣﻠﻮﻑ ﻣﻦ ﺍﻟﺠﺮﻭﻑ .
ﻭﻋﺎﺩﻝ ﻣﺎﻓﻲ ﺯﻭﻝ ﺟﺎﺏ ﻟﻴﻬﻮ ﺧﺒﺮ ﻭﻫﺪﻳﻞ ﻛﻠﻤﺖ ﺍﻫﻠﻬﺎ ﺑﻌﻤﻠﻴﺔ ﻧﻮﺭ ..
ﻭﻗﺎﻟﺖ ﻣﺘﻤﻨﻴﺔ ﺗﺸﻮﻑ ﻧﻮﺭ . ﻭﻏﺎﻳﺘﻮ ﺣﺎﻟﻬﺎ ﺍﻧﻌﺪﻝ .. ﻭﺗﺼﺮﻑ ﻧﻮﺭ ﺑﻘﺎ ﻟﻴﻬﺎ ﺑﻬﺪﺍﻳﻪ .
ﻭﺑﻘﺖ ﻧﺪﻣﺎﻧﻪ ﻃﻮﻝ ﻋﻤﺮﻫﺎ .
ﻭﺍﻟﺨﻨﺰﻳﺮﻳﻦ ﺍﻟﺘﺎﻧﻴﻦ ﺩﻳﻚ ﻣﺎﻣﻌﺮﻭﻑ ﺳﻮﻭ ﻟﻴﻬﻦ ﺷﻨﻮ ﻭﺧﺒﺮﻫﻢ ﺍﻧﻘﻄﻊ ﻣﻨﻨﺎ ..
ﺍﻫﺎ ﻃﺒﻌﺎ ﺍﻻﻳﺎﻡ ﺩﻱ ﻧﻬﺎﻳﺔ ﺍﻻﺟﺎﺯﺓ ..
ﻭﻧﻮﺭ ﻋﺎﻳﺰﺓ ﻟﻤﺘﻴﻦ ﺗﻨﺘﻬﻲ ﺍﻻﺟﺎﺯﺓ ﻋﺸﺎﻥ ﺗﻼﻗﻲ ﺍﺳﺘﺎﺫﻋﺎﺩﻝ ..
ﻭﺗﻤﻨﻌﻮ ﻣﻦ ﺍﻟﺴﻜﻪ ﺍﻟﻤﺎﺷﻲ ﻓﻴﻬﺎ ﺩﻱ . ﻭﻣﻦ ﻣﺤﺎﺳﻦ ﺍﻻﻗﺪﺍﺭ .
ﻓﻲ ﻳﻮﻡ ﻣﻦ ﺍﻻﻳﺎﻡ ﺍﻟﺒﺎﺏ ﺩﻗﻪ .. ﻭﻟﻘﻮﻫﻮ ﺩﻩ ﺍﺳﺘﺎﺫ ﻋﺎﺩﻝ ﻭﻣﻌﺎﻫﻮ ﺍﺧﻮﻫﻮ ..
ﺑﺮﺍﺍﺍﺍﺍﺍﺍﻫﻮ ﺟﺎ ﻋﺸﺎﻥ ﻳﺸﻜﺮ ﻧﻮﺭ .. ﻋﻠﻰ ﺍﻟﻌﻤﻠﺘﻪ ﻣﻌﺎﻫﻮ .. ﻃﺒﻌﺎ ﻟﻐﺎﻳﺔ ﻫﺴﻲ ﻣﺎﻓﻲ ﺯﻭﻝ ﻋﺎﺭﻑ ﻋﻦ ﺍﺳﺘﺎﺫ ﻋﺎﺩﻝ ﺍﻻ ﻓﻲ ﺍﻟﻨﻄﺎﻕ ﺍﻟﻀﻴﻖ .. ﻭﺩﻩ ﻛﻠﻪ ﺑﺴﺒﺐ ﻭﺭﻗﺔ ﻧﻮﺭ .. ﻻﻧﻮ ﻛﺎﻧﻮ ﺍﻟﻤﻔﺮﻭﺽ ﻳﺠﺮﺟﺮﻭﻫﻮ ﻓﻲ ﺍﻟﻘﻀﻴﺔ ..
ﺍﻫﺎ ﺟﺎ ﺷﺎﻳﻞ ﻣﻌﺎﻫﻮ ﻣﺼﺤﻒ ﻭﻗﺎﻝ ﻟﻤﺤﻤﺪ . ﺍﻧﺎ ﺟﻴﺖ ﻋﺎﻳﺰ ﺍﺗﻮﺏ ﻗﺪﺍﻡ ﻧﻮﺭ .. ﻻﻧﻬﺎ ﻧﻮﺭ ﺣﻔﻈﺖ ﺳﻤﻌﺘﻲ . ﻭﺳﻤﻌﺔ ﺍﺳﺮﺗﻲ .. ﻭﺟﺎﺕ ﻧﻮﺭ ﻭﺳﻠﻤﺖ ﻋﻠﻴﻬﻮ ﺑﻜﻞ ﺍﺩﺏ ﻭﺍﺣﺘﺮﺍﻡ .. ﻛﺎﻧﻮ ﻣﺎﻋﺎﻣﻞ ﺣﺎﺟﺔ .. ﻛﻤﺎﻥ ﻗﺎﻟﺖ ﻟﻴﻬﻮ ﻳﺎ ﺍﺳﺘﺎﺫﻱ .. ﻭﻫﻮ ﻣﻨﻜﺴﺮ ﺍﻧﻜﺴﺎﺭ ﻏﺮﻳﺐ ﻭﻣﺎﻗﺎﺩﺭ ﻳﺮﻓﻊ ﺭﺍﺳﻮ ..
ﻗﺎﻡ ﺍﺗﻮﺿﺎ ﻭﺧﺖ ﺍﻟﻤﺼﺤﻒ ﻗﺪﺍﻣﻬﻢ .. ﻭﺣﻠﻒ ﺍﻧﻮ ﺗﺎﻧﻲ ﻣﺎﻳﻘﺮﺏ ﺍﻟﺤﺎﺟﺔ ﺩﻱ ﻃﻮﻝ ﻋﻤﺮﻩ ..
ﺑﺲ ﺷﺨﺼﻴﺘﻮﻭ ﺍﻫﺘﺰﺕ ﻗﺪﺍﻡ ﻧﻮﺭ .. ﻭﺑﻘﻰ ﺧﺠﻼﻥ ﻭﻣﺪﻧﻘﺮ ..
ﻧﻮﺭ ﻗﺎﻟﺖ ﻟﻴﻬﻮ ﺍﻟﺘﺎﺋﺐ ﻣﻦ ﺍﻟﺬﻧﺐ ﻛﻤﻦ ﻻﺫﻧﺐ ﻟﻪ ﻳﺎ ﺍﺳﺘﺎﺫ .. ﺣﺴﻨﺎﺗﻚ ﻭﺗﺪﺭﻳﺴﻚ ﻟﻴﻨﺎ
ﻭﺗﻮﺟﻴﻬﺎﺗﻚ ﻛﻠﻬﺎ ﺭﺑﻨﺎ ﺑﻀﻴﻌﻬﺎ ﻟﻴﻚ .. ﻭﺭﺑﻨﺎ ﺑﻔﺮﺡ ﺑﺘﻮﺑﺔ ﺍﻟﺘﺎﺋﺐ ..
...........
ﻭﺩﻱ ﺻﻔﺤﺔ ﺍﻧﻄﻮﺕ ﻣﻦ ﺣﻴﺎﺓ ﻧﻮﺭ ﻭﺍﻧﺘﻬﺖ ﺑﻲ ﺧﻴﺮﻫﺎ ﻭﺷﺮﻫﺎ ..
ﻭﻣﺮﺭﺭﺭﺭﺭﺕ ﺍﻻﻳﺎﻡ . ﻳﻮﻡ ﻣﻦ ﺫﺍﺕ ﺍﻻﻳﺎﻡ .. ﻓﻲ ﻭﺍﺣﺪﻩ ﻣﻦ ﺍﻟﻄﺎﻟﺒﺎﺕ ﺍﻟﺒﻘﺮﻭ ﻣﻊ ﻧﻮﺭ ﺣﺼﻞ ﻟﻴﻬﺎ ﺣﺎﺩﺙ
ﺿﺮﺑﺘﻬﺎ ﺭﻛﺸﻪ ﻛﺴﺮﺕ ﻛﺮﺍﻋﻬﺎ .. ﻭﻧﻮﺭ ﻃﻠﺒﺖ ﻣﻦ ﺍﺑﻮﻫﺎ ﻳﻮﺩﺩﻳﻬﺎ ﻟﻴﻬﺎ ..
ﻣﺸﺖ ﺗﻜﻔﺮ ﻟﻴﻬﺎ ﻭﺗﺤﻤﺪ ﻟﻴﻬﺎ ﺍﻟﺴﻼﻣﺔ .. ﻭﻟﻘﺖ ﻣﻌﺎﻫﺎ ﻛﻤﻴﺔ ﻣﻦ ﺍﻟﻄﺎﻟﺒﺎﺕ ..
ﺍﻟﻜﻼﻡ ﺩﻩ ﻛﺎﻥ ﻗﺒﻞ ﻣﺎﺗﻔﺘﺢ ﺍﻟﻤﺪﺭﺳﺔ ﺑﻲ ﺍﻳﺎﻡ . ﺍﻫﺎ ﻧﻮﺭ ﻟﻤﻦ ﻭﺻﻠﺖ .. ﻭﻭﺣﻤﺪﺕ ﺍﻟﺴﻼﻣﻪ . ﺣﺴﺖ ﺍﻧﻮ ﺍﻟﺒﻨﺎﺕ ﺑﺘﻮﺳﻮﺳﻦ ﻭﺑﺘﻨﺴﻨﺴﻦ
ﺳﺄﻟﺖ ﺍﻗﺮﺏ ﻭﺍﺣﺪﺓ ﻟﻲ ﻗﻠﺒﻬﺎ ﻣﻨﻬﻢ .. ﻗﺎﻟﺖ ﻟﻴﻬﺎ ﻓﻲ ﺷﻨﻮ ؟ ﺍﻟﺒﺖ ﻭﺭﺗﻬﺎ ﻗﺎﻟﺖ ﻟﻴﻬﺎ ﻓﻲ ﻧﺎﺱ ﺑﻘﻮﻟﻮ ﺍﻧﻚ ﻟﻘﻴﻄﻪ . ..
ﺑﺲ ﻧﺤﻦ ﻣﺎﻣﺼﺪﻗﻴﻦ ﻭﻣﺎﻗﺎﺩﺭﻳﻦ ﻧﺴﺄﻟﻚ .. ﻧﻮﺭ ﻃﻮﺍﻟﻲ ﺍﻟﻌﺒﺮﺓ ﺳﺪﺕ ﺣﻠﻘﻬﺎ ﻭﻃﻠﻌﺖ .
ﻣﺸﺖ ﺍﻟﺒﻴﺖ .. ﻭﻃﻠﺒﺖ ﻣﻦ ﺍﺑﻮﻫﺎ ﺗﺘﺤﻮﻝ ﻣﻦ ﺍﻟﻤﺪﺭﺳﺔ .. ﻭﻃﻠﺒﺖ ﺍﻧﻬﺎ ﺗﻤﺘﺤﻦ ﻣﻦ ﻣﺪﺭﺳﺔ ﺗﺎﻧﻴﺔ .. ﻓﻲ ﺍﻟﻨﺎﺣﻴﺔ ﺍﻟﺸﺮﻗﻴﺔ ﻣﻦ ﺍﻟﻔﺘﻴﺤﺎﺏ .. ﻭﻣﺎﺣﻜﺖ ﻻﺑﻮﻫﺎ ﻭﻻ ﻻﻣﻬﺎ ﺍﻟﺴﺒﺐ ﺩﻩ . .
ﻭﻧﻮﺭ ﺭﺟﻌﺖ ﺗﺸﻌﺮ ﺑﺎﻟﻤﺮﺍﺭﺓ ﻓﻲ ﻗﻠﺒﻬﺎ .. ﺑﻌﺪ ﻣﺎ ﻓﺎﺭﻗﻬﺎ ﺍﻻﺣﺴﺎﺱ ﺩﻩ ﺯﻣﻦ .
ﻧﻮﺭ ﻓﻲ ﻟﺤﻈﺔ ﻣﻦ ﺍﻟﻘﻬﺮ ﻭﺍﻟﺒﺆﺱ .. ﻣﺴﻜﺖ ﻣﺼﺤﻔﻬﺎ ﻗﺮﺕ ﺷﻮﻳﻪ .. ﻭﻓﺠﺄﺓ ﻗﺎﻟﺖ ﻻﺑﻮﻫﺎ .. ﻳﺎﺑﺎﺑﺎ ﻭﻳﻦ ﻓﺨﺮﻱ ؟
ﻭﻟﻴﻪ ﻣﺎﺟﺎﻧﺎ . ﺍﻧﺎ ﻋﺎﻳﺰﺓ ﻋﻠﻰ ﺍﻻﻗﻞ ﺍﺷﻜﺮﻩ . ﻭﻋﺎﻳﺰﺓ ﺍﺣﻜﻲ ﻟﻴﻬﻮ ﺣﺎﺟﺎﺕ ﻛﺘﻴﺮﻩ .
ﻭﻋﺎﻳﺰﺓ ﺍﺷﻮﻓﻮ ﺑﻌﺪ ﻛﺒﺮ . ﺍﻧﺎ ﻟﺴﻪ ﻣﺘﺨﻴﻠﻪ ﻓﺨﺮﻱ ﺍﻟﻄﻔﻞ .. ( ﺑﻌﺪ ﻣﺎﻛﺎﻧﺖ ﻣﻘﻬﻮﺭﺓ ﺍﺗﺒﺴﻤﺖ ) .
ﺍﺑﻮﻫﺎ ﻗﺎﻝ ﻟﻴﻬﺎ ﺍﻻ ﺍﻣﺸﻲ ﺍﺳﺎﻝ ﻣﻨﻪ ﺟﻨﺎﺑﻮ ﻋﻤﺎﺭ .. ﻫﻮ ﺍﻟﻤﻤﻜﻦ ﻳﻮﺭﻳﻨﻲ ..
ﻃﺒﻌﺎ " ﻃﻴﻠﺔ ﺍﻟﻔﺘﺮﺓ ﺩﻱ .. ﺍﻣﻜﻦ ﻣﺮﺕ ﺷﻬﺮ ﻭﻧﺺ ﻋﻠﻰ ﺍﻟﻘﻀﻴﺔ . ﻭﻓﺨﺮﻱ ﻣﺎﻣﻨﻮ ﺍﻱ ﺧﺒﺮ .
ﻟﻜﻦ ﻧﻮﺭ ﺩﺍﻳﻤﺎ " ﻣﺘﺬﻛﺮﺍﻫﻮ . ﻭﺑﺘﺪﻋﻲ ﻟﻴﻬﻮ ﺑﺎﻟﺨﻴﺮ .
ﻭﻣﺘﻮﻗﻌﻪ ﻓﻲ ﺍﻱ ﻟﺤﻈﻪ ﻳﺠﻴﻬﻢ .. ﻛﻮﺛﺮ ﻧﻔﺲ ﺍﻟﺸﻲ ﻗﺎﻟﺖ ﻟﻲ ﻣﺤﻤﺪ .. ﻣﺎﺻﺢ ﻣﻨﻨﺎ ﻳﺎ ﻣﺤﻤﺪ ﻻﺯﻡ ﺗﺪﻋﻲ ﻓﺨﺮﻱ ﻋﻠﻰ ﺍﻟﺒﻴﺖ ﻳﻮﻡ .. ﻧﻌﺰﻣﻮ ﻏﺪﺍ ﻭﻻ ﺷﺎﻱ ﻣﻐﺮﺏ .. ﻋﻠﻰ ﺍﻻﻗﻞ ﻳﺤﺲ ﺍﻧﻮ ﻧﺤﻦ ﻧﺤﻦ ﺷﻜﺮﻧﺎﻫﻮ ﻭﺣﺎﻓﻈﻴﻦ ﻟﻴﻬﻮ ﺍﻟﺠﻤﻴﻞ ﻋﻠﻰ ﺍﻟﻘﺎﻡ ﺑﻴﻬﻮ ﻣﻌﺎﻧﺎ ..
ﻣﺤﻤﺪ ﻃﺒﻌﺎ ﻧﻌﻢ ﺍﻻﺏ ﻭﻧﻌﻢ ﺍﻟﺰﻭﺝ . ﻣﺸﻰ ﻃﻮﺍﻟﻲ ﺳﺄﻝ .. ﻭﻭﺻﻞ ﻟﻠﺒﻴﺖ ﺍﻟﺴﺎﻛﻦ ﻓﻴﻬﻮ
ﻓﺨﺮﻱ ﺍﻟﻠﻬﻮ ﺑﻴﺖ ﺧﺎﻟﺘﻮ . ﻗﺎﻟﻮ ﻟﻴﻬﻮ ﻓﺨﺮﻱ ﺳﺎﻓﺮ ﺍﻻﺑﻴﺾ .
ﺧﺎﻟﺔ ﻓﺨﺮﻱ ﻗﺎﻟﺖ ﻟﻴﻬﻮ . ﻧﻘﻮﻝ ﻟﻴﻬﻮ ﻣﻨﻮ؟ ..
ﻗﺎﻝ ﻟﻴﻬﺎ ﻗﻮﻟﻲ ﻟﻴﻬﻮ ﻣﺤﻤﺪ ﺍﺑﻮ ﻧﻮﺭ .. ﻗﺎﻟﺖ ﻟﻴﻬﻮ ﺍﻧﺖ ﺍﺑﻮ ﻧﻮﺭ ﺯﺍﺗﻬﺎ .. ﻗﺎﻝ ﻟﻴﻬﺎ ﻧﻌﻢ .. ﻗﺎﻟﺖ ﻟﻴﻬﻮ ﺧﺶ ﺍﻧﺎ ﻋﺎﻳﺰﺍﻙ .. ﻓﻲ ﻛﻼﻡ ﻣﻬﻢ ﺷﺪﻳﺪ ﻋﻦ ﻓﺨﺮﻱ ﻋﺎﻳﺰﺓ ﺍﻗﻮﻟﻮ ﻟﻴﻚ ﺍﻟﺤﻤﺪ ﻟﻠﻪ ﺍﻧﻚ ﺟﻴﺖ .. ..
ﺍﻟﻰ ﺍﻟﻠﻘﺎﺀ.
المتابعة والشير احبتي
ليست هناك تعليقات:
إرسال تعليق