رواية المسئولية الحلقات 21"22"23"24"25 بقلم الشيخ طارق اللبيب

 رواية المسؤولية الحلقات 21"22"23"24"25

ﺍﻟﻤﺴﺆﻭﻟﻴﺔ

ﺍﻟﺤﻠﻘﺔ 21

ﺑﻘﻠﻢ ﻃﺎﺭﻕ ﺍﻟﻠﺒﻴﺐ ..

ﺩﺧﻞ ﻣﺤﻤﺪ ﻣﻊ ﻓﺎﻃﻤﺔ ﺣﺎﻟﺔ ﻓﺨﺮﻱ .. ﻭﻋﻨﺪﻫﺎ ﺑﺘﻴﻦ ﻭﺍﺣﺪﺓ ﻓﻲ ﻋﻤﺮ ﻧﻮﺭ . ﻭﺍﻟﺘﺎﻧﻴﺔ ﺻﻐﻴﺮﺓ ﻳﻤﻜﻦ ﺳﺒﻌﺔ ﺳﻨﺔ ﺗﻘﺮﻳﺒﺎ ..

ﺑﻌﺪ ﻣﺎ ﺍﻛﺮﻣﺘﻮ ﻓﻀﻠﺔ ﺧﻴﺮﻛﻢ ﻣﻮﻳﺔ ﻭﺷﺎﻱ ﻭﻛﺪﺍ ..

ﻗﺎﻟﺖ ﻟﻴﻬﻮ ﺍﺳﻤﻊ ﻳﺎﺍﻣﺤﻤﺪ .. ﺍﻧﺎﻃﺒﻌﺎ ﻓﺎﻃﻤﺔ ﺧﺎﻟﺔ ﻓﺨﺮﻱ . ﺩﻛﺘﻮﺭﻩ ﻭﺍﺳﺘﺎﺫﺓ ﻓﻲ ﺍﻟﺠﺎﻣﻌﺔ . ﻭﺍﻟﺤﻤﺪ ﻟﻠﻪ .. ﻭﺍﻧﺎ ﻭﺑﺘﻲ ﻣﺘﺒﺎﺑﻌﻴﻦ ﻛﻞ ﺻﻐﻴﺮﺓ ﻭﻛﺒﻴﺮﺓ ﻣﻦ ﻗﺼﺔ ﻧﻮﺭ ﺑﺘﻚ

ﻭﺍﻟﺤﺎﺻﻞ ﻋﻠﻴﻬﺎ ﻣﻦ ﺍﻻﻟﻒ ﻟﻠﻴﺎﺀ ..

ﻳﺎ ﻣﺤﻤﺪ ﻣﺎ ﺍﻟﻤﻔﺮﻭﺽ ﺍﻧﺘﻮ ﺗﺨﺠﻠﻮ ﻣﻦ ﺍﻧﻮ ﻧﻮﺭ ﻣﺎﻋﻨﺪﻫﺎ ﺍﻫﻞ ..

ﺍﻧﺘﻮ ﺍﻫﻠﻬﺎ ﻳﺎﻣﺤﻤﺪ ﻭﻧﺤﻦ ﺍﻫﻠﻬﺎ .. ﻭﻧﻮﺭ ﺿﺮﺑﺖ ﻟﻠﻨﺎﺱ ﻣﺜﻞ .. ﺍﻧﻮ ﻣﻤﻜﻦ ﺍﻧﺴﺎﻥ .

ﻳﺘﺮﺑﻰ ﻣﻊ ﺍﻫﻞ ﻏﻴﺮ ﺍﻫﻠﻮ .. ﻭﻳﻜﻮﻥ ﺍﻧﺒﻞ ﻭﺍﺷﺮﻑ ﻣﻦ ﻛﻞ ﺍﻟﻨﺎﺱ ﺍﻟﺤﻮﻟﻪ .

ﻭﻣﻤﻜﻦ ﺯﻭﻝ ﺗﺎﻧﻲ ﻳﻜﻮﻥ ﻣﻌﺮﻭﻑ ﺍﻻﺳﺮﺓ . ﺯﻱ ﻧﺎﺱ ﺳﻤﻴﺮﺓ ﻭﻫﺪﻳﻞ

ﻭﻳﻜﻮﻥ ﺍﺳﻮﺀ ﻣﻦ ﺍﻟﺸﻴﻄﺎﻥ ..

ﻓﺨﺮﻱ ﺑﺤﺐ ﻧﻮﺭ ﻣﺤﺒﺔ ﻓﻮﻕ ﻣﺎﺗﺘﺼﻮﺭ .. ﻭﻣﺴﺘﺤﻴﻞ ﻳﻘﺪﺭ ﻳﻌﻴﺶ ﻣﻦ ﺩﻭﻧﻬﺎ ..

ﻭﻟﻤﻦ ﻋﺮﻑ ﻇﺮﻭﻓﻬﺎ ﺍﻻﺳﺮﻳﺔ .. ﺍﺻﺮ ﺍﺻﺮﺍﺭ ﺷﺪﻳﺪ ﺍﻧﻮ ﻳﻜﻮﻥ ﻟﻴﻬﺎ ﻋﻮﻥ ﻋﻠﻰ ﺍﻟﺰﻣﻦ ﻭﺍﻟﻤﺠﺘﻤﻊ ..

ﻭﻳﺪﻳﻬﺎ ﺷﺨﺼﻴﺔ ﺷﺮﻋﻴﺔ ﻣﻌﺘﺒﺮﺓ ﻓﻲ ﺍﻟﻤﺠﺘﻤﻊ ..

ﻭﺍﻧﺎ ﻃﺒﻌﺎ " ﺩﺍﻋﻤﺎﻫﻮ ﺩﻋﻢ ﺷﺪﻳﺪ .. ﻣﻊ ﺍﻧﻲ ﻛﻨﺖ ﺑﺘﻤﻨﺎﻫﻮ ﻟﻲ ﺑﺘﻲ ..

ﺍﻧﺎ ﻣﺸﻴﺖ ﻣﺮﺗﻴﻦ ﻟﻤﺪﺭﺳﺔ ﻧﻮﺭ ﻣﻊ ﺻﺪﻳﻘﺘﻲ ﺍﺳﺘﺎﺫﺓ ﻫﻨﺎﻙ . ﻭﺷﻔﺖ ﻧﻮﺭ ..

ﻭﻻﺣﻈﺖ ﻟﻲ ﺍﺧﻼﻗﻬﺎ ﻭﻃﺒﺎﺋﻌﻬﺎ ﻭﻣﺴﺘﻮﺍﻫﺎ ﺍﻟﺪﺭﺍﺳﻲ ﻭﺍﻻﻛﺎﺩﻳﻤﻲ ..

ﻭﺍﺗﻤﻨﻴﺖ ﺍﻧﻮ ﻳﻜﻮﻥ ﻋﻨﺪﻱ ﻭﻟﺪ . ﻭﻧﻮﺭ ﺗﻜﻮﻥ ﻣﺮﺓ ﻭﻟﺪﻱ ..

ﻟﻜﻦ ﻟﻮ ﺑﻘﺖ ﻣﻦ ﻧﺼﻴﺐ ﻓﺨﺮﻱ ﻫﻮ ﺑﺮﺿﻮ ﻭﻟﺪﻱ ..

ﺑﺲ ﻓﻲ ﻣﺸﻜﻠﺔ .. ﻓﺨﺮﻱ ﺍﺑﻮﻫﻮ ﺍﺗﻮﻓﻰ ﺍﻟﺴﻨﺔ ﺍﻟﻔﺎﺗﺖ ﻓﻲ ﺍﻟﺴﻌﻮﺩﻳﺔ .

ﻭﻫﻮ ﻛﺒﻴﺮ ﺍﻟﺒﻴﺖ . ﻭﺍﻣﻪ ﺯﻭﻟﺔ ﻋﻨﻴﺪﻩ ﻭﺭﺍﺳﻬﺎ ﻗﻮﻱ ..

ﻭﻧﺤﻦ ﺧﺎﻳﻔﻴﻦ ﺍﻧﻬﺎ ﻣﺎﺗﻮﺍﻓﻖ ﻋﻠﻰ ﻧﻮﺭ .. ﻭﻓﺨﺮﻱ ﻫﺴﻲ ﻣﺸﻰ ﺍﻻﺑﻴﺾ ﻭﻋﻨﺪﻭ ﺧﻄﺔ ﻣﻌﻴﻨﺔ ﺣﻴﻤﺸﻲ ﻋﻠﻴﻬﺎ .. ﻟﻮ ﻧﺠﺢ ﻓﻴﻬﺎ ﺑﺠﻲ ﻳﺨﻄﺒﻬﺎ ﻣﻨﻜﻢ ..

ﻭﻳﺨﻠﻴﻬﺎ ﺗﻜﻤﻞ ﺩﺭﺍﺳﺘﻬﺎ .. ﻭﻟﻮ ﻣﺎﻧﺠﺢ ﻣﺎ ﺣﻴﺠﻴﻜﻢ ..

ﻭﺍﻟﺨﻄﺔ ﺍﻟﺒﺪﻳﻠﺔ ﺑﻌﺪ ﻣﻮﺍﻓﻘﺘﻜﻢ ﻃﺒﻌﺎ " .. ﻧﺤﻦ ﺣﻨﺨﻔﻲ ﺣﻘﻴﻘﺔ ﻧﻮﺭ ﻋﻠﻰ ﺯﻳﻨﺐ .

ﻓﻨﺤﻦ ﻟﻮ ﺑﻘﻴﻨﺎ ﻋﻠﻰ ﺍﻟﺨﻄﺔ ﺍﻻﺧﻴﺮﺓ ﻭﺍﻟﺒﺪﻳﻠﺔ ﻋﺎﻳﺰﻧﻜﻢ ﺍﻧﺘﻮ ﻭﻧﻮﺭ

ﺑﻘﺪﺭ ﺍﻟﻤﺴﺘﻄﺎﻉ ﺗﺨﻔﻮ ﺣﻘﻴﻘﺔ ﻧﻮﺭ ﻋﻠﻰ ﺯﻳﻨﺐ . ﻭﻣﺎﺗﻌﺮﻑ ﻋﻨﻬﺎ ﺍﻱ ﺷﻲ ..

ﻣﺤﻤﺪ ﻗﺎﻝ ﻟﻴﻬﺎ .. ﻃﻴﺐ ﻳﺎ ﺩﻛﺘﻮﺭﺓ .. ﺍﻭﻻ ﻧﺤﻦ ﻫﺴﻲ ﻗﺮﺭﻧﺎ ﺍﻧﻮ ﻧﻮﺭ ﺗﻮﺍﺻﻞ ﺩﺭﺍﺳﺘﻬﺎ ..

ﻭﺗﻤﺘﺤﻦ ..

ﻭﺍﻧﺎ ﻣﺎﻋﺎﺭﻑ ﻓﺨﺮﻱ ﻭﺻﻞ ﻭﻳﻦ .. ﻟﻜﻦ ﺷﻜﻠﻪ ﺑﺮﺿﻮ ﻟﺴﻪ ﺑﺪﺭﺱ .

ﺍﻟﻤﻬﻢ ﻫﺴﻲ ﺍﻧﺘﻲ ﻗﻮﻟﻲ ﻟﻔﺨﺮﻱ ﻣﺎ ﻳﻔﺘﺢ ﻟﻨﻮﺭ ﺍﻱ ﻣﻮﺿﻮﻉ .. ﻻﻧﻬﺎ ﻣﻤﺘﺤﻨﻪ ﻭﻧﺤﻦ ﻋﺎﻳﺰﻧﻬﺎ ﺗﺨﻠﻲ ﺑﺎﻟﻬﺎ ﻓﻲ ﺩﺭﺍﺳﺘﻬﺎ ..

ﻭﻟﻲ ﻗﺪﺍﻡ ﺍﻥ ﺷﺎ ﺍﻟﻠﻪ ﻳﺤﺼﻞ ﻛﻞ ﺧﻴﺮ .. ﻭﺧﻠﻴﻪ ﻳﺘﺄﻛﺪ ﺍﻧﻮ ﻣﺎﻓﻲ ﺯﻭﻝ ﺣﻴﺪﺧﻞ ﻓﻲ ﺣﻴﺎﺗﻬﺎ .. ﺩﻩ ﺍﻋﺘﺒﺮﻭﻫﻮ ﻭﻋﺪ ﻣﻨﻲ ..

ﻭﺣﺘﻲ ﻟﻮ ﺟﺎﻧﺎ ﻓﻲ ﺍﻟﺒﻴﺖ .. ﺍﻧﺎ ﻣﺎﻋﺎﻳﺰﻩ ﻳﻔﺘﺢ ﻣﻮﺿﻮﻉ ﺯﻱ ﺩﻩ ﻣﻊ ﻧﻮﺭ ﺑﺘﺎﺗﺎ ..

ﺛﻢ ﺍﻧﻮ ﻓﻲ ﺣﺎﺟﺔ ﻣﻬﻤﺔ ﻻﺯﻡ ﺍﻧﺘﻮ ﺗﻜﻮﻧﻮﺍ ﻋﺎﺭﻓﻨﻬﺎ ..

ﻧﻮﺭ ﻣﺎﺣﺘﻘﺒﻞ ﺑﻤﻮﺿﻮﻉ ﺍﺧﻔﺎﺀ ﺣﻘﻴﻘﺔ ﺣﻴﺎﺗﻬﺎ .. ﻻﻧﻬﺎ ﺍﻧﺴﺎﻧﺔ ﻭﺍﺿﺤﺔ .. ﻭﻣﺎ ﺑﺘﻌﺮﻑ ﺗﻜﺬﺏ ﻭﺗﻨﻜﺮ ﺍﻟﺤﻘﺎﻳﻖ .. ﺧﺼﻮﺻﺎ ﻟﻲ ﺍﻡ ﺯﻭﺟﻬﺎ .. ﻭﺍﻧﺎ ﺯﺍﺗﻲ ﻣﺎﺑﻘﺒﻞ ﺍﻧﻮ ﻧﺨﺪﻉ ﺯﻳﻨﺐ ﺧﺪﻋﺔ ﻗﺪﺭ ﺩﻱ .. ﺍﻧﺘﻲ ﻣﻌﺎﻱ ؟؟

ﻓﻠﻮ ﺯﻳﻨﺐ ﻣﺎﻭﺍﻓﻘﺖ ﻋﻠﻴﻬﺎ ﺑﺤﺎﻟﺘﻬﺎ ﺍﻟﺮﺍﻫﻨﺔ .. ﻳﺒﻘﻰ ﻣﺎﻓﻲ ﺑﻴﻨﺎﺗﻨﺎ ﺍﻱ ﺍﺗﻔﺎﻕ ..

ﻗﺎﻟﺖ ﻟﻴﻬﻮ ﻭﺍﻟﻠﻪ ﻳﺎﻣﺤﻤﺪ ﻛﻤﻴﺔ ﺍﻻﺻﺮﺍﺭ ﺍﻟﺸﺎﻳﻔﺎﻫﺎ ﻓﻲ ﻓﺨﺮﻱ ..

ﺍﻥ ﺷﺎ ﺍﻟﻠﻪ ﻳﻘﺪﺭ ﻳﻘﻨﻊ ﺍﻣﻪ ﻣﻦ ﺩﻭﻥ ﻣﺎﻳﺤﻮﺟﻨﺎ ﻟﻲ ﻛﺬﺏ ﻭﺍﺧﻔﺎﺀ ﺣﻘﺎﻳﻖ ..

ﻭﺯﻱ ﻣﺎﺷﺎﻳﻔﻴﻦ ﻛﻤﻴﺔ ﺍﻟﻌﻮﺍﻳﻖ ﻓﻲ ﻃﺮﻳﻖ ﻓﺨﺮﻱ ..

ﺍﻡ ﻋﻨﻴﺪﺓ ﻭﺭﺍﺳﻬﺎ ﻗﻮﻱ ﻭﻛﻠﻤﺘﻬﺎ ﺯﻱ ﺍﻟﺴﻴﻒ .. ﻭﻧﻮﺭ ﺻﺎﺩﻗﺔ ﻭﻣﺎ ﻣﻤﻜﻦ ﺗﺨﻔﻲ ﺣﻘﻴﻘﺔ ﺭﻭﺣﻬﺎ ..

ﻭﺍﻟﺘﺤﺪﻱ ﻗﺪﺍﻡ ﻓﺨﺮﻱ ﻛﺒﻴﺮ ﺟﺪﺍ ..

ﻣﺤﻤﺪ ﻭﺩﻉ ﺩﻛﺘﻮﺭﺓ ﻓﺎﻃﻤﺔ ﻭﻃﻠﻊ ..

ﺍﻫﺎ ﻧﺤﻦ ﺑﻘﻴﻨﺎ ﺑﻴﻦ ﺍﻣﺮﻳﻦ ﻫﺴﻲ ..

ﻧﻤﺸﻲ ﻣﻊ ﻣﺤﻤﺪ ﺍﻟﺒﻴﺖ .. .. ﻭﻻﻧﺴﺎﻓﺮ ﺍﻻﺑﻴﺾ ﻟﻲ ﻓﺨﺮﻱ ؟؟

ﻃﻴﺐ ..

ﺧﻠﻮﻧﺎ ﻫﺴﻲ ﻣﻊ ﻣﺤﻤﺪ .. ﻭﻣﻦ ﻫﻨﺎﻙ ﻧﺴﺎﻓﺮ ﺍﻻﺑﻴﺾ ..

ﻣﺤﻤﺪ ﺭﺟﻊ ﺍﻟﺒﻴﺖ ﻭﻟﻘﻰ ﻛﻮﺛﺮ .. ﻗﺎﻝ ﻟﻴﻬﺎ ﻓﺨﺮﻱ ﺳﺎﻓﺮ ﺍﻻﺑﻴﺾ .. ﻭﺑﺠﻲ ﺍﻻﺳﺒﻮﻉ ﺍﻟﺠﺎﻱ ﺍﻥ ﺷﺎﺀ ﺍﻟﻠﻪ .. ﻻﻧﻪ ﺩﻱ ﺳﻨﺘﻮ ﺍﻻﺧﻴﺮﺓ ﻓﻲ ﺍﻟﺠﺎﻣﻌﺔ .. ﻭﻋﻨﺪﻭ ﺍﻣﺘﺤﺎﻧﺎﺕ ﺍﺧﻴﺮﺓ ..

ﻧﻮﺭ ﻭﻳﻨﻬﺎ؟؟ .. ﻗﺎﻟﺖ ﻟﻴﻬﻮ ﻧﻮﺭ ﺑﻴﻐﺎﺩﻱ .. ﻣﺤﻤﺪ ﺣﻜﻰ ﻟﻜﻮﺛﺮ ﻛﻞ ﺍﻟﺪﺍﺭ ﺑﻴﻨﻪ ﻭﺑﻴﻦ ﺩﻛﺘﻮﺭﺓ ﻓﺎﻃﻤﺔ ﺧﺎﻟﺔ ﻓﺨﺮﻱ ..

ﻭﻗﺎﻟﺖ ﻟﻴﻬﻮ ﻛﻼﻣﻚ ﻛﻠﻮ ﻛﻼﻡ ﻋﻘﻞ ﻭﺻﺤﻴﺢ .. ﻟﻜﻦ ﻓﻲ ﻣﺸﻜﻠﺔ ..

ﻟﻮﻓﺨﺮﻱ ﻣﺎ ﻛﻠﻢ ﻧﻮﺭ . ﺑﻲ ﺍﺣﺴﺎﺳﻮ ﺗﺠﺎﻫﺎ .. ﺍﺣﺘﻤﺎﻝ ﻧﻮﺭ ﺗﻠﻢ ﻓﻲ ﻭﺍﺣﺪ ﺗﺘﻌﻠﻖ ﻓﻴﻬﻮ ﻭﻓﺨﺮﻱ ﻳﻜﻮﻥ ﺭﺍﺡ ﺑﻴﻦ ﺍﻟﻤﻮﺟﺎﺕ ..

ﻭﺍﻧﺎ ﻳﺘﺨﻴﻠﻲ ﻧﻮﺭ ﻟﺴﻪ ﻣﺘﻌﻠﻘﺔ ﺑﺎﺳﺘﺎﺫ ﻋﺎﺩﻝ . ﻭﺟﻴﺘﻮ ﻓﻲ ﺍﻟﺒﻴﺖ ﺩﻱ ﻣﻌﻨﺎﻫﺎ ﺑﻜﻮﻥ ﻟﻘﻰ ﺿﻮﺀ ﺍﺧﻀﺮ ﻣﻦ ﺍﻫﻠﻮ . ﻭﻻﺭﺍﻳﻚ ﺷﻨﻮ؟

ﻗﺎﻝ ﻟﻴﻬﺎ ﻛﻮﺛﺮ ﺍﻧﺘﻲ ﻣﺎﻧﺼﻴﺤﺔ؟ ﻋﺎﺩﻝ ﺷﻨﻮ؟ ﻭﺍﻟﻠﻪ ﻋﺎﺩﻝ ﻟﻮ ﻧﻄﻂ ﺗﺎﻧﻲ ﻣﺎﺑﺪﻳﻬﻮ ﻧﻮﺭ ..

ﺩﻗﻴﻘﺔ ﺍﻧﺎ ﺍﻧﺎﺩﻱ ﻧﻮﺭ .. ﻣﺸﻰ ﻟﻘﺎﻫﺎ ﻻﻓﺔ ﻓﻲ ﺍﻟﺠﻨﻴﻨﺔ ﺍﻟﺒﻲ ﻭﺭﺍ . ﻭﻣﺎﺳﻜﺔ ﻣﺼﺤﻔﻬﺎ ﺍﻟﺼﻐﻴﺮ ﻭﺗﻘﺮﺍ ..

ﺑﺎ ﻫﻤﺘﻤﺎﻡ ﺯﻱ ﺍﻟﺰﻭﻝ ﺍﻟﻤﻤﺘﺤﻦ ..

ﺍﻟﺒﺖ ﺷﻜﻠﻬﺎ ﺑﺘﺤﻔﻆ ﻓﻲ ﺍﻟﻘﺮﺍﻥ .. ﻭﻧﺤﻦ ﻣﺎﺟﺎﻳﺒﻴﻦ ﺧﺒﺮ ..

ﻧﺎﺩﺍﻫﺎ .. ﻗﺎﻝ ﻟﻴﻬﺎ .. ﻳﺎﻧﻮﺭ .. ﺍﻧﺎ ﺑﺴﺄﻟﻚ ﺳﺆﺍﻝ . ﻟﻮ ﺍﺳﺘﺎﺫ ﻋﺎﺩﻝ ﺭﺟﻊ ﻟﻴﻚ ﻭﻗﺎﻝ ﺍﻫﻠﻮ ﻭﺍﻓﻘﻮ ﺑﻴﻚ

ﺭﺍﻳﻚ ﺷﻨﻮ؟ ﻗﺎﻟﺖ ﻟﻴﻬﻮ .. ﻳﺎﺑﺎﺑﺎ ﺻﺮﺍﺣﺔ .. ﺍﺳﺘﺎﺫ ﻋﺎﺩﻝ ﻣﺎﻓﻴﺶ ﻓﻲ ﻗﻠﺒﻲ ﺍﻵﻥ ..

ﻭﻣﺎﻻﻗﻴﺔ ﻟﻴﻬﻮ ﺍﻱ ﺍﺣﺴﺎﺱ ﺟﻮﺍﻱ ﻏﻴﺮ ﺍﻧﻮ ﺍﺳﺘﺎﺫﻱ ﻭﺑﺤﺘﺮﻣﻪ ..

ﺃﻣﺎ ﻣﺸﺎﻋﺮﻱ ﺍﻻﻭﻟﻰ ﺍﺗﻼﺷﺖ ﻟﻤﻦ ﺍﻧﺎ ﻣﺴﺘﻐﺮﺑﺔ . ﺑﻌﺪﻳﻦ ﺍﻧﺎ ﻧﺎﺱ ﺭﻓﻀﻮﻧﻲ ﻓﻲ ﺍﻻﻭﻝ .. ﻣﺴﺘﺤﻴﻞ ﺍﻗﺒﻞ ﺑﻴﻬﻢ ﺗﺎﻧﻲ .. ﺍﻧﺎ ﻳﺎﻫﺎ ﻧﻮﺭ ﺯﺍﺗﻬﺎ .. ﺍﻟﻔﻲ ﺍﻻﻭﻝ ﻗﺎﻟﻮ ﻣﺎﻋﺎﻳﺰﻧﻬﺎ ..

ﻟﻮ ﺟﺎﻙ ﺍﺳﺘﺎﺫ ﻋﺎﺩﻝ .. ﺍﻗﻨﻌﻪ ﺑﺎﺳﻠﻮﺏ ﺣﻠﻮ ﻭﻣﺤﺘﺮﻡ .. ﺍﻧﻮ ﺍﻧﺎ ﻣﺎﻋﺎﻳﺰﺍﻫﻮ ..

ﻗﺎﻝ ﻟﻴﻬﺎ ﻻﻻ ﻫﻮ ﻣﺎﺟﺎﻧﻲ .. ﻟﻜﻦ ﺑﺴﺄﻝ ﺑﺲ ..

ﻗﺎﻟﺖ ﻟﻴﻬﻮ .. ﻳﺎﺑﺎﺑﺎ . ﺍﻧﺎ ﺑﻔﻬﻤﻚ ﻛﻮﻳﺲ ﻻﺯﻡ ﻳﻜﻮﻥ ﻓﻲ ﺳﺒﺐ ﻟﻠﺴﺆﺍﻝ ﺩﻩ ..

ﻳﻼ ﻣﺤﻤﺪ ﺍﺳﺘﻐﻞ ﻓﺮﺻﺔ ﺍﻟﺴﺆﺍﻝ ﻋﺸﺎﻥ ﻳﺪﻳﻬﺎ ﺧﺒﺮ ﺑﺎﻟﻤﻮﺿﻮﻉ ..

ﻗﺎﻝ ﻟﻴﻬﺎ ﻓﻌﻼ ﻓﻲ ﺳﺒﺐ .. ﺍﻧﺎ ﺻﺮﺍﺣﺔ ﻳﺎﻧﻮﺭ .. ﺣﺒﻴﺖ ﻓﺨﺮﻱ ﺷﺪﻳﺪ ..

ﻭﺍﺗﻤﻨﻴﺖ ﻳﻜﻮﻥ ﻣﻦ ﻧﺼﻴﺒﻚ ..

ﻋﺸﺎﻥ ﻛﺪﺍ ﻛﻨﺖ ﺧﺎﻳﻒ ﺍﻧﻚ ﺗﻜﻮﻧﻲ ﻟﺴﻪ ﻣﺘﻌﻠﻘﺔ ﺑﺎﺳﺘﺎﺫ ﻋﺎﺩﻝ ..

ﻗﺎﻟﺖ ﻟﻴﻬﻮ ﻓﺨﺮﻱ؟؟؟ ﻓﺨﺮﻱ ﻭﺩ ﺯﻳﻨﺐ ؟ .. ﻣﺴﺘﺤﻴﻞ !!!

ﺩﻩ ﺑﺎﻟﺬﺍﺕ ﺍﻧﺎ ﻣﺴﺘﺤﻴﻞ ﺍﺭﺗﺒﻂ ﺑﻴﻬﻮ .. ﻣﺎﻋﺎﻳﺰﺍﻫﻮ ﻧﻬﺎﺋﻲ ..

ﻳﺎ ﺑﺎﺑﺎ ﺍﻧﺎ ﻗﻠﺖ ﻟﻴﻚ ﻋﺎﻳﺰﺓ ﺍﻗﺮﺍﺍﺍﺍ .. ﻭﻧﺤﻦ ﺍﺗﻔﻘﻨﺎ ﻋﻠﻰ ﻛﺪﺍ ..

ﺍﻟﻰ ﺍﻟﻠﻘﺎﺀ 

ﺍﻟﻤﺴﺆﻭﻟﻴﻪ ..

ﺍﻟﺤﻠﻘﺔ 22

ﺑﺜﻠﻢ ﻃﺎﺭﻕ ﺍﻟﻠﺒﻴﺐ ..

ﻣﺤﻤﺪ ﺍﻧﺰﻋﺞ ﺟﺪﺍ . ﻣﻦ ﺭﺩﺓ ﺍﻟﻔﻌﻞ . ﺍﻟﺤﺼﻠﺖ ﻣﻦ ﻧﻮﺭ . ﻟﻤﻦ ﺟﺎﺕ ﺳﻴﺮﺓ ﻓﺨﺮﻱ . ﻭﻗﺎﻝ ﻟﻴﻬﺎ ﺍﻟﺤﺎﺻﻞ ﺷﻨﻮ ﻳﺎﻧﻮﺭ ؟ .. !! . ﺍﻭﻝ ﻣﺮﺓ ﺗﺮﻓﻀﻲ ﺭﻓﺾ ﺯﻱ ﺩﻩ .. ﻭﻣﺎﻟﻚ ﻫﺴﻲ ﻣﻨﻔﻌﻠﺔ ﻛﺪﻱ؟ .. ﻗﺎﻟﺖ ﻟﻴﻬﻮ .. ﺍﺳﻔﺔ ﻳﺎ ﺑﺎﺑﺎ .. ﺑﺲ ﻓﺨﺮﻱ ﺩﻩ ﻻ ..

ﻗﺎﻝ ﻟﻴﻬﺎ ﺍﻧﺘﻲ ﻫﺴﻊ ﻻﺷﻮﻓﺘﻴﻬﻮ ﻻ ﺍﺗﻌﺮﻓﺘﻲ ﻋﻠﻴﻬﻮ . ﻛﻴﻒ ﻃﻮﺍﻟﻲ ﺑﺘﺪﻱ ﻗﺮﺍﺭ ﺯﻱ ﺩﻩ؟ .. ﻭﺍﻧﺘﻲ ﺍﻟﻘﻠﺘﻲ ﻟﻲ ﻣﺸﺘﺎﻗﺔ ﺗﻼﻗﻴﻬﻮ .. ﻭﻟﻤﻦ ﻧﺘﻜﻠﻢ ﻋﻨﻪ ﺑﺘﻜﻮﻧﻲ ﻣﺒﺴﻮﻃﻪ ..

ﻗﺎﻟﺖ ﻟﻴﻬﻮ ﺍﻳﻮﺓ ﻓﺨﺮﻱ .. ﺯﻭﻝ ﻛﻮﻳﺲ ﻭﻃﻴﺐ ﻭﺻﺪﻳﻖ ﻣﺜﺎﻟﻲ ﻣﻦ ﺍﻟﻄﻔﻮﻟﺔ ..

ﻭﻣﺸﺘﺎﻗﺔ ﺍﺷﻮﻓﻪ .. ﻛﻠﻪ ﺻﺢ .. ﺑﺲ ﺣﻜﺎﻳﺔ ﺍﺭﺗﺒﺎﻁ ﻣﻌﺎﻫﻮ ﺩﻱ ..

ﻣﺎﻋﺎﻳﺰﺍﻫﺎ ﻳﺎﺑﺎﺑﺎ ﻋﺸﺎﻥ ﺧﺎﻃﺮﻱ ..

ﻭﺍﻧﺎ ﻫﺴﻲ ﺩﺍﻳﺮﻩ ﺍﻭﺍﺻﻞ ﻗﺮﺍﻳﺘﻲ ﺍﻧﺖ ﻣﺶ ﻗﻠﺖ ﻛﺪﺍ؟ ..

ﻗﺎﻝ ﻟﻴﻬﺎ ﺍﻧﺎ ﻣﺎﻗﻠﺖ ﻟﻴﻚ ﺗﻌﺮﺳﻴﻬﻮ ﻫﺴﻲ ﺍﻧﺎ ﺑﺲ .. ﺑﺪﻳﻚ ﺍﻗﺘﺮﺍﺡ ..

ﻃﻴﺐ ﻣﻤﻜﻦ ﺗﻮﺭﻳﻨﻲ ﺍﻟﺴﺒﺐ ؟

ﻗﺎﻟﺖ ﻟﻴﻬﻮ ﻣﻦ ﺩﻭﻥ ﺍﻱ ﺍﺳﺒﺎﺏ . ﺑﺲ ﻛﺪﺍ . ﻣﺎﻋﺎﻳﺰﺓ . ﻣﺶ ﺍﻟﺤﻜﺎﻳﺔ ﺩﻱ ﺭﻏﺒﻪ؟ .

. ﺍﻧﺎ ﻣﺎﻋﻨﺪﻱ ﺭﻏﺒﺔ ﻭﺑﺲ ..

ﻗﺎﻝ ﻟﻴﻬﺎ ﺧﻴﺮ ﻳﺎﻧﻮﺭ . ﺍﻧﺘﻲ ﻋﺎﺭﻓﺔ ﺍﻧﺎ ﻣﺎﻣﻤﻜﻦ ﺍﺟﺒﺮﻙ ﻋﻠﻲ ﺣﺎﺟﺔ ﺍﻧﺘﻲ ﻣﺎﻋﺎﻳﺰﺍﻫﺎ .. ﺑﺲ ﻓﺨﺮﻱ ﺍﻧﺎ ﺑﺤﺒﻮ ﺟﺪﺍ ﻭﻭﺍﺛﻖ ﻓﻴﻬﻮ ..

ﻗﺎﻟﺖ ﻟﻴﻬﻮ : ﺍﻧﺎ ﺑﺮﺿﻮ ﻳﺎﺑﺎﺑﺎ .. ﺑﺤﺒﻮ ﺟﺪﺍ ﻭﻭﺛﻘﻪ ﻓﻴﻬﻮ ..

ﻭﺍﻟﻌﻤﻠﻮ ﻣﻌﺎﻱ ﻣﺎﺑﻘﺪﺭ ﺍﻭﻓﻴﻬﻮ ﻟﻴﻪ ﻃﻮﻝ ﺣﻴﺎﺗﻲ ..

ﻣﺤﻤﺪ ﻗﺎﻝ ﻟﻴﻬﺎ ﻭﺍﻟﻠﻪ ﺩﻱ ﺣﻜﺎﻳﺔ ﻏﺮﻳﺒﺔ ﺷﺪﻳﺪ .. ﺍﻭﻝ ﻣﺮﺓ ﻳﺎﻧﻮﺭ ﺗﺤﻴﺮﻳﻨﻲ ﻭﺍﻛﻮﻥ ﻣﺎﻓﺎﻫﻢ ﺣﺎﺟﺔ .

ﺍﻟﻤﻬﻢ ﻣﺤﻤﺪ ﻣﺸﻰ ﻣﻨﻬﺎ ﻭﺍﻟﺤﻴﺮﺓ ﻣﺎﻟﻴﺔ ﺭﺍﺳﻮ ..

ﺑﺘﻜﻠﻢ ﻣﻊ ﻛﻮﺛﺮ .. ﻭﺣﻜﺎ ﻟﻴﻬﺎ .. ﻻﻧﻮ ﻛﻮﺛﺮ ﻣﺎ ﻛﺎﻧﺖ ﺣﺎﺿﺮﺓ ﺍﻟﻨﻘﺎﺵ ﺩﻩ ..

ﻗﺎﻟﺖ ﻟﻴﻬﻮ .. ﺑﺲ ﻫﺴﻲ ﺑﺘﻜﻮﻥ ﺑﻄﻨﻬﺎ ﻃﺎﻣﺔ ﻣﻦ ﺳﻴﺮﺓ ﺍﻟﻤﻮﺿﻮﻉ .. ﺑﻌﺪ ﺻﺪﻣﺔ ﻋﺎﺩﻝ .

ﺍﺩﻳﻬﺎ ﻳﻮﻣﻴﻦ ﺗﻼﺗﺔ ﻛﺪﺍ .. ﻭﺑﺮﺍﻫﺎ ﺑﺘﺠﻲ ﺗﻘﻮﻝ ﺩﺍﻳﺮﺍﻫﻮ ..

ﻗﺎﻝ ﻟﻴﻬﺎ ﺍﻟﻤﺸﻜﻠﺔ .. ﻟﻮ ﺍﺻﺮﺕ ﻋﻠﻰ ﺍﻟﺮﻓﺾ .. ﻭﺍﻧﺎ ﻭﻋﺪﺕ ﺧﺎﻟﺔ ﻓﺨﺮﻱ . ﻗﻠﺖ ﻟﻴﻬﺎ ﻭﻋﺪ ﻣﻨﻲ ﺯﻭﻝ ﺑﺪﺧﻞ ﺣﻴﺎﺓ ﻧﻮﺭ ﻏﻴﺮ ﻓﺨﺮﻱ ﻣﺎﻓﻲ ..

ﻭﻫﺴﻲ ﻫﻲ ﺗﻘﻮﻝ ﻣﺎﻋﻨﺪﻫﺎ ﺭﻏﺒﺔ ﻓﻲ ﺍﻻﺭﺗﺒﺎﻁ ﺑﻴﻬﻮ ..

ﻛﻮﺛﺮ ﻗﺎﻟﺖ ﻟﻴﻬﻮ .. ﺍﻧﺎ ﻗﻠﺖ ﻟﻴﻚ ﺍﻧﺖ ﺑﺲ ﺍﺻﺒﺮ .. ﻭﺧﻠﻲ ﺍﻟﻤﻮﺿﻮﻉ ﺩﻩ ﻋﻠﻲ ..

ﺍﺩﻳﻨﻲ ﻓﺮﺻﺔ ﺍﻳﺎﻡ ﺑﺲ ﺗﻨﺴﻰ ﺍﺳﺘﺎﺫ ﻋﺎﺩﻝ ﺩﻩ ﻭﺻﺪﻣﺘﻪ ..

ﻫﻨﺎ ﻧﻮﺭ ﺟﺎﺕ ﺩﺍﺧﻠﺔ ﺳﻤﻌﺖ ﻃﺮﻑ ﺍﻟﻜﻼﻡ ..

ﺭﺩﺕ ﻟﻲ ﺍﻣﻬﺎ .. ﻗﺎﻟﺖ ﻟﻴﻬﺎ ﻣﺎﻣﺎ ﺣﺒﻴﺒﺘﻲ .. ﺍﻟﻤﻮﺿﻊ ﺩﻩ ﻣﻨﺘﻬﻲ .. ﻭﻣﺎﻋﻨﺪﻭ ﻋﻼﻗﺔ ﺑﻲ ﺻﺪﻣﺔ ﻋﺎﺩﻝ .. ﺣﺘﻰ ﻟﻮ ﻣﻮﺿﻮﻉ ﻋﺎﺩﻝ ﻛﺎﻥ ﻣﺎﻓﻲ .. ﺩﻩ ﻫﻮ ﺣﻴﻜﻮﻥ ﻧﻔﺲ ﻣﻮﻗﻔﻲ ..

ﺍﻟﻤﻬﻢ ﺳﻜﺘﻮ ﻣﻨﻬﺎ .. ﻭﻣﺤﻤﺪ ﻗﺎﻝ ﻟﻴﻬﺎ ﻭﻻﻳﻬﻤﻚ ﻳﺎﻧﻮﺭ .. ﻣﺎﻓﻲ ﺣﺎﺟﺔ ﺑﺘﺤﺼﻞ ﻏﺼﺒﺎ " ﻋﻨﻚ ..

ﻗﺎﻟﺖ ﻟﻴﻬﻮ ﻳﺎﺑﺎﺑﺎ ﻳﺎﺭﻳﺖ ﻣﺎﺗﺰﻋﻞ ﻣﻨﻲ .. ﻋﻠﻴﻚ ﺍﻟﻠﻪ ﻟﻮ ﺯﻋﻠﺖ ﻣﻨﻲ ﺍﻧﺎ ﺑﻌﻴﺎ ..

ﻗﺎﻝ ﻟﻴﻬﺎ ﻻﻻ .. ﺍﺯﻋﻞ ﻣﻨﻚ ﻓﻲ ﺷﻨﻮ؟ .. ﺍﻧﺘﻲ ﻗﻠﺘﻲ ﺭﺍﻳﻚ ﻭﻻﻳﻬﻤﻚ ﺧﻼﺹ .. ﺍﻟﻤﻮﺿﻮﻉ ﺩﻩ ﻧﻘﻔﻠﻮ ﻛﺪﺍ ﺍﻭﻛﻲ؟

ﻫﻢ ﻗﻔﻠﻮ ﺍﻟﻤﻮﺿﻮﻉ ﻋﻠﻰ ﻛﺪﺍ ..

ﻭﻧﺤﻦ ﻟﺴﻪ ﻣﺎﻋﺎﺭﻓﻴﻦ ﺍﻟﺴﺒﺐ ﺍﻟﻠﻬﻲ ﺭﻓﻀﺖ ﺑﻴﻬﻮ ﻓﺨﺮﻱ ﻫﻮ ﺷﻨﻮ ..

ﻭﻧﺤﻦ ﻣﺸﻴﻨﺎ ﻋﻠﻰ ﺍﻻﺑﻴﺾ ..

ﻓﻲ ﺍﻻﺑﻴﺾ ﻓﺨﺮﻱ ﻭﺻﻞ ﺍﻟﺒﻴﺖ ﻟﻴﻬﻮ ﺍﺳﺒﻮﻉ ﺗﻘﺮﻳﺒﺎ " .

ﻭﻣﻤﺎ ﺟﺎ .. ﺗﺎﻧﻲ ﻳﻮﻡ ﻃﻮﺍﻟﻲ .. ﺳﺄﻝ ﺍﻣﻪ ﺳﺆﺍﻝ .. ﻗﺎﻝ ﻟﻴﻬﺎ .. ﻳﺎ ﺍﻣﻲ .. ﺍﻧﺎ ﻫﺴﻲ ﻟﻮ ﺍﺗﻌﺮﻓﺖ ﻟﻲ ﺑﻲ ﺍﻧﺴﺎﻧﺔ .. ﻗﻤﺔ ﺍﻻﺩﺏ ﻭﺍﻟﺘﺪﻳﻦ .. ﻭﻛﻞ ﺍﻟﺼﻔﺎﺕ ﺍﻟﺴﻤﺤﺔ ﻓﻴﻬﺎ .. ﻭﺍﺗﻌﻠﻘﺖ ﺑﻴﻬﺎ ﺷﺪﻳﺪ .. ﺑﺲ ﻓﻲ ﻟﺤﻈﺔ ﺍﻛﺘﺸﻔﺖ .. ﺍﻧﻬﺎ ﻣﺎﻋﻨﺪﻫﺎ ﺍﻫﻞ .. ﻭﻣﺮﺑﻴﺔ ﻣﻊ ﻧﺎﺱ ﺑﺲ .. ﻭﺍﺻﻠﻬﺎ ﻣﺎﻣﻌﺮﻭﻑ .. ﻭﺣﺴﻴﺖ ﺍﻧﻲ ﻣﺎﺣﻘﺪﺭ ﺍﺗﺨﻠﻰ ﻋﻨﻬﺎ .. ﻟﻮ ﺍﺗﺰﻭﺟﺘﻬﺎ ﺣﺮﺍﻡ؟؟

ﻗﺎﻟﺖ ﻟﻴﻬﻮ ﻭﺍﻟﻠﻪ ﻳﺎﻓﺨﺮﻱ ﻫﻲ ﻣﺎﺣﺮﺍﻡ .. ﻟﻜﻦ ﺍﻟﻤﺠﺘﻤﻊ ﻣﺎﺡ ﻳﺮﺣﻤﻚ .. ﻭﻻﻳﺮﺣﻤﻬﺎ ﻫﻲ .. ﻭﻻﻳﺮﺣﻢ ﺍﻭﻻﺩﻙ .. ﻭﺗﺒﻘﻰ ﻟﺒﻨﺎﻧﺔ ﻓﻲ ﺍﻟﺴﻨﺔ ﺍﻟﻨﺎﺱ .. ﻭﺩﻱ ﺣﻜﺎﻳﺔ ﺍﺧﻴﺮ ﻣﻨﻬﺎ ﺗﻘﻌﺪ ﺑﻼ ﻋﺮﺱ ..

ﻗﺎﻝ ﻟﻴﻬﺎ ﻭﺍﻟﻠﻪ ﺩﻱ ﻣﺸﻜﻠﺔ ﻛﺒﻴﺮﺓ .. ﻭﻗﺎﻡ ﻣﺸﻰ ﺳﺮﻳﻊ ﻭﻣﻨﺰﻋﺞ ﻣﻦ ﺍﺟﺎﺑﺘﻬﺎ .. ﻭﻋﺮﻑ ﺍﻧﻬﺎ ﻣﺴﺘﺤﻴﻞ ﺗﻮﺍﻓﻖ .. ﻭﻓﻲ ﻧﻔﺲ ﺍﻟﻴﻮﻡ ﻓﺨﺮﻱ ﺭﻓﺾ ﺍﻻﻛﻞ ﻭﺍﻟﺸﺮﺍﺏ ..

ﻭﺑﻘﻰ ﻳﺴﺮﺡ .. ﻭﻣﺮﺍﺕ ﻳﺘﻜﻠﻢ ﺑﺮﺍﻫﻮ .. ﻭﻳﺘﻮﺳﻮﺱ .. ﻭﺑﺎﻟﻠﻴﻞ ﻳﻘﻮﻡ ﻳﺤﻮﻡ ﺑﺎﻟﺒﻴﺖ .. ﻣﺎﺑﻨﻮﻡ ﻧﻬﺎﺋﻲ .. ﻭﺍﻣﻪ ﻻﺣﻈﺖ ﻟﻠﻘﺼﺔ ﺩﻱ ..

.. ﻓﻲ ﺍﻻﻭﻝ ﻣﺎ ﺧﺘﺖ ﺑﺎﻟﻬﺎ .. ﺑﺲ ﻟﻤﺎ ﺍﻟﻤﺴﺄﻟﺔ ﻛﺘﺮﺕ .. ﻭﺑﻘﺖ ﻣﻠﻔﺘﺔ ﺳﺄﻟﺘﻪ ..

ﻗﺎﻟﺖ ﻟﻴﻬﻮ ﺍﻧﺖ ﻳﺎﻓﺨﺮﻱ ﻣﺎﻟﻚ ﺍﺣﻜﻲ ﻟﻲ .. ﻗﺎﻝ ﻟﻴﻬﺎ ﻣﺎﻓﻲ ﺣﺎﺟﺔ ﺍﻧﺎ ﻛﻮﻳﺲ ﺷﺪﻳﺪ ..

ﺍﻧﺎ ﺑﻘﻴﺖ ﺭﺋﻴﺲ ﺍﻟﺠﻤﻬﻮﺭﻳﺔ .. ﺗﺎﻧﻲ ﻓﻲ ﺷﻨﻮ؟

ﺍﻧﺎ ﺍﺣﺴﻦ ﺯﻭﻝ ﺍﻧﺎ ﺻﺎﺣﺒﻲ ﺻﻼﺡ ﺍﻟﺪﻳﻦ ﺍﻻﻳﻮﺑﻲ ﺑﺘﻌﺮﻓﻴﻬﻮ ؟ ﻭﺟﺎﺍﺍﺍﺩﻱ ﻓﻲ ﻛﻼﻣﻪ ..

ﺍﻣﻮ ﻗﺎﻟﺖ ﻟﻴﻬﻮ ﺳﺠﻤﻲ ﻭﺍﻟﺮﻣﺎﺩ ﻛﺎﻝ ﺧﺸﻤﻲ ..

ﻃﻮﺍﻟﻲ ﺟﺎﺑﺖ ﺍﻟﺮﻗﺸﺔ .. ﻭﻭﺩﺗﻪ ﺍﻟﺪﻛﺘﻮﺭ ﻭﻋﻤﻠﺖ ﻟﻴﻬﻮ ﻓﺤﻮﺻﺎﺕ ﻭﺗﺤﺎﻟﻴﻞ .. ﻭﺷﻔﻘﺎﻧﺔ ﺷﺪﻳﺪ .. ﺍﻟﺪﻛﺘﻮﺭ ﻗﺎﻝ ﻟﻴﻬﺎ ﺍﻟﺰﻭﻝ ﺩﻩ ﺳﻠﻴﻢ ﻣﺎﻋﻨﺪﻭ ﺣﺎﺟﺔ ﺍﺣﺘﻤﺎﻝ ﺗﻜﻮﻥ ﺣﺎﻟﺔ ﺍﻛﺘﺌﺎﺑﻴﺔ ..

ﺣﺎﻭﻟﻮ ﺷﻮﻓﻮ ﻣﺸﻜﻠﺘﻪ ﺷﻨﻮ ﺣﻠﻮﻫﺎ ﻟﻴﻬﻮ ..

ﺍﻧﺎ ﻣﺎﺑﺼﺮﻑ ﻟﻴﻬﻮ ﺍﻱ ﺍﺩﻭﻳﺔ ﻓﻲ ﺍﻟﻔﺘﺮﺓ ﺩﻱ .. ﺟﻴﺒﻲ ﻟﻴﻬﻮ ﺍﻟﻤﻨﻮﻡ ﺩﻩ .. ﻟﻮ ﻣﺎﻧﺎﻡ ﺧﻠﻴﻬﻮ ﻳﺒﻠﻊ ﺣﺒﺔ .. ﻭﺣﺎﻭﻟﻲ ﺍﺗﻜﻠﻤﻲ ﻣﻌﺎﻭ ﻓﻲ ﺍﻟﺼﺒﺎﺣﻴﺔ .. ﺑﻜﻮﻥ ﻣﺠﻤﻊ ﺍﻛﺘﺮ ..

ﻭﺍﻥ ﺷﺎﺀ ﺍﻟﻠﻪ ﻳﻜﻮﻥ ﻛﻮﻳﺲ ..

ﺍﻣﻪ ﻃﻮﺍﻟﻲ ﻋﺮﻓﺖ ﺍﻧﻪ ﻭﻟﺪﻫﺎ ﻭﻗﻊ ﻓﻲ ﺣﺐ ﻭﺍﺣﺪﺓ .. ﻣﺠﻬﻮﻟﺔ ﺍﻻﺻﻞ .. ﻭﻣﺮﺗﺒﻚ ﻭﺗﻌﺒﺎﻥ ﻣﻦ ﺍﻟﺤﺘﺔ ﺩﻱ .. ﻭﺯﻳﻨﺐ ﺍﻟﻤﺴﻜﻴﻨﺔ .. ﺑﻘﺖ ﺑﻴﻦ ﻧﺎﺭﻳﻦ ﻳﺎ ﺍﻣﺎ ﺗﻘﺒﻞ ﺯﻭﺍﺝ ﺍﻟﺒﺖ ﺍﻟﻤﺬﻛﻮﺭﺓ .. ﻳﺎ ﺍﻣﺎ ﺗﻔﻘﺪ ﻭﻟﺪﻫﺎ ﺍﻟﻜﺒﻴﺮ ..

ﺍﻫﺎ ﺑﺎﻟﻠﻴﻞ ﺭﺍﻗﺒﺘﻪ ﺷﺪﻳﺪ .. ﻭﻟﻘﺘﻮ ﻣﺎﻧﺎﻡ ﻣﺸﺖ ﺟﺎﺑﺖ ﻟﻴﻬﻮ ﻛﺒﺎﻳﺔ ﺣﻠﻴﺐ .. ﻭﻣﺎﺻﺖ ﻓﻴﻬﺎ ﺍﻟﺤﺒﺔ ..

ﻭﺍﺩﺗﻬﺎ ﻟﻴﻬﻮ ﺷﺮﺑﻬﺎ ﻧﺎﻡ ﻓﺪ ﻧﻮﺭﻣﺔ ﻗﺎﻡ ﺍﻟﺴﺎﻋﺔ 11 ﺻﺒﺎﺣﺎ ..

ﻭﻫﻲ ﺷﻔﻘﺎﻧﺔ ﻋﻠﻴﻬﻮ ﺷﺪﻳﺪ ﻭﻗﻠﺒﻬﺎ ﻣﻘﻄﻮﻉ ..

ﻟﻤﻦ ﺻﺤﻰ ﺟﺎﺗﻪ .. ﻗﺎﻟﺖ ﻟﻴﻬﻮ ﻳﺎ ﻓﺨﺮﻱ ﺍﻧﺎ ﻋﺎﻳﺰﺓ ﺍﺳﺄﻟﻚ ﺳﺆﺍﻝ ..

ﻗﺎﻝ ﻟﻴﻬﺎ ﺍﺗﻔﻀﻠﻲ ﻳﺎ ﺍﻣﻲ .. ‏( ﻭﻋﻴﻮﻧﻮ ﻣﻮﺭﻣﺎﺕ ﻭﻟﺴﺎﻧﻮ ﺗﻘﻴﻞ ﻣﻦ ﻛﺘﺮﺓ ﺍﻟﻨﻮﻡ ﻭﺗﺎﺛﻴﺮ ﺍﻟﺤﺒﺔ ‏)

ﻗﺎﻟﺖ ﻟﻴﻬﻮ ﺍﻧﺖ ﻗﺒﻞ ﻛﻢ ﻳﻮﻡ ﺳﺄﻟﺘﻨﻲ .. ﻋﻦ ﺍﻟﺒﺖ ﺍﻟﻘﻠﺖ ﻣﺎﻋﻨﺪﻫﺎ ﺍﻫﻞ ﺩﻱ ..

ﻃﻴﺐ ﻳﺎﻓﺨﺮﻱ . ﻣﺎﺩﺍﻡ ﻫﻲ ﺯﻭﻟﺔ ﻛﻮﻳﺴﺔ ﻭﻣﺘﺪﻳﻨﺔ . ﻓﻴﻬﺎ ﺷﻨﻮ ﻳﻌﻨﻲ ﺍﻟﺰﻭﻝ ﻟﻮ ﺍﺗﺰﻭﺟﻬﺎ ﻋﻠﻰ ﺳﻨﺔ ﺍﻟﻠﻪ ﻭﺭﺳﻮﻟﻪ؟ .. ﺍﻧﺎ ﺷﺎﻳﻔﻪ .. ﻣﻤﻜﻦ ﺍﻟﺮﺍﺟﻞ ﻳﺘﺰﻭﺟﻬﺎ ﺑﺲ ﻣﺎﻳﺴﻜﻦ ﺑﻴﻬﺎ ﺟﻨﺐ ﺍﻟﻨﺎﺱ ﺍﻟﻌﺎﺭﻓﻴﻦ ﻋﻨﻬﺎ ﺣﺎﺟﺔ ..

ﻗﺎﻝ ﻳﺎ ﺍﻣﻲ ﺑﺘﺘﺬﻛﺮﻱ ﻧﻮﺭ ﺑﺖ ﻛﻮﺛﺮ .. ؟؟

ﻗﺎﻟﺖ ﻟﻴﻬﻮ ﻧﻮﻭﻭﻭﻭﻭﺭ ؟ !! .. ﺣﺒﻴﺘﻲ ﻭﺍﻧﺎ ﺍﻧﺴﺎﻫﺎ ﻛﻴﻒ ﻧﻮﺭ .. ﻣﺎﻟﻬﺎ ؟ ..

ﻗﺎﻝ ﻟﻴﻬﺎ ﻧﻮﺭ ﻛﺒﺮﺕ ﻳﺎ ﺍﻣﻲ .. ﻭﺑﻘﺖ ﻗﺪﺭ ﻟﺒﻨﻰ ﺍﺧﺘﻲ ﺩﻱ .. ﻭﻣﻠﺘﺰﻣﺔ ﻭﻣﻨﻘﺒﺔ ﻭﺟﻤﻴﻠﺔ ﺟﻤﺎﻝ ﻣﺎﻃﺒﻴﻌﻲ .. ﻭﺍﻧﺎ ﺣﺒﻴﺘﻬﺎ ﺷﺪﻳﺪ .. ﺑﺲ ﻳﺎ ﺍﻣﻲ ﺍﻧﺎ ﺍﻟﻤﺤﻄﻤﻨﻲ ﺍﻛﺘﺸﻔﺖ ﺍﻧﻬﺎ ﻣﺎ ﺑﺘﻬﻢ .. ﻭﻫﻢ ﺟﺎﻳﺒﻨﻬﺎ ﻣﻦ ﺩﺍﺭ ﺍﻟﺮﻋﺎﻳﺔ ﻭﺭﺑﻮﻫﺎ ..

ﻭﺍﻧﺎ ﺗﻌﺒﺎﻥ ﺷﺪﻳﺪ ﻭﻣﺤﻄﻢ ﻣﻦ ﺍﻟﺤﻜﺎﻳﺔ ﺩﻱ .. ﻻﻧﻲ ﺣﺎﺱ ﺍﻧﻲ ﻣﺎﺑﻘﺪﺭ ﺍﻋﻴﺶ ﻣﻦ ﺩﻭﻧﻬﺎ ..

ﻗﺎﻟﺖ ﻟﻴﻬﻮ .. ﻣﻌﻘﻮﻭﻭﻭﻭﻭﻭﻭﻭﻭﻝ؟ ﻧﻮﺭ ﻛﺪﺍ ؟؟ ﻳﺤﻠﻴﻼ .. ﻣﺴﻜﻴﻨﻪ .

ﺑﺲ ﻧﻮﺭ ﺑﺖ ﻣﺤﻤﺪ ﻭﺑﺖ ﻛﻮﺛﺮ .. ﻗﺎﻝ ﻟﻴﻬﺎ ﻻﻻ .. ﻫﻢ ﻣﺮﺑﻴﻨﻬﺎ ﺑﺲ ..

ﺯﻳﻨﺐ ﺳﻜﺘﺖ ﻣﺴﺎﻓﺔ .. ﻭﻗﺎﻟﺖ ﻟﻴﻬﻮ .. ﺑﺲ ﻧﻮﺭ ﺩﻱ ﺑﺘﺨﺘﻠﻒ ﻣﻦ ﺍﻟﻨﺎﺱ .. ﻣﻦ ﻳﻮﻣﻬﺎ ﻭﺯﻣﺎﻧﻬﺎ ﺭﺑﻨﺎ ﻫﺎﺩﻳﻬﺎ .. ﻭﺍﻧﺎ ﺣﺎﺳﻪ ﺑﻴﻬﺎ ﺯﻱ ﺑﺘﻲ ﻳﻌﻠﻢ ﺍﻟﻠﻪ . ﺍﻧﺖ ﻳﺎﻓﺨﺮﻱ ﻣﻤﻜﻦ ﺗﺴﺘﺮﻫﺎ ﻭﺗﺘﺰﻭﺟﻬﺎ ﻭﺗﺠﻴﺒﻬﺎ ﻫﻨﺎ ﻣﻌﺎﻧﺎ ﻓﻲ ﺍﻟﺒﻴﺖ ﺩﻩ .. ﻭﺯﻭﻭﻭﻭﻝ ﻳﻜﻮﻥ ﻋﺎﺭﻑ ﻋﻨﻬﺎ ﺣﺎﺟﺔ ﻣﺎﻓﻲ .. .. ﺑﺲ ﺍﻧﺖ ﻣﺎﺗﻘﻮﻝ ﻟﺰﻭﻝ ﺍﻟﻜﻼﻡ ﺩﻩ .. ﻧﻮﺭ ﺩﻱ ﻃﻴﻠﺔ ﺍﻟﻔﺘﺮﺓ ﺍﻟﻜﺎﻧﺖ ﻣﻌﺎﻧﺎ ﻓﻲ ﺍﻻﺑﻴﺾ ﻫﻨﺎ .. ﻣﺎﻋﺮﻓﻨﺎ ﻋﻨﻬﺎ ﺣﺎﺟﺔ . ﻳﺎﺍﺍﺍﺍﺣﻴﻼ ﻧﻮﺭ .. ﻋﻠﻴﻚ ﺍﻟﻠﻪ ﻭﺻﻔﻬﺎ ﻟﻲ ﺑﻘﺖ ﻛﻴﻒ ..

ﻗﺎﻝ ﻟﻴﻬﺎ :

ﺯﻱ ﻓﺮﻳﻊ ﺍﻟﻤﻨﻘﺎ ﻣﺎﻳﺴﻪ ..

ﻭﺍﻟﺜﻤﺎﺭ ﺍﻟﻔﻮﻗﺎ ﻭﺍﻓــــﺮ ..

ﻣﻨﻬﺎ ﺍﻻﻣــــﺎﻝ ﺑﺘﻨﺒﻊ ..

ﻭﺍﻟﺴﻤﺎﺡ ﻣﻦ ﺭﻭﺣﺎ ﺩﺍﻓﺮ ..

ﺍﻟﻌﻴﻮﻥ ﻛﺎﻥ ﺟﺎﺕ ﺗﻌﺎﻳﻦ ..

ﺍﻟﻬﻤﻮﻡ ﻣﻨﻚ ﺗﺴﺎﻓﺮ ..

ﺯﻱ ﺯﻫﻮﺭ ﻓﻲ ﻋﺰ ﺻﺒﺎﺣﺎ .

ﻭﺯﻱ ﻏﺰﺍﻝ ﻓﻲ ﺍﻟﺒﻴﺪﺍ ﻧﺎﻓﺮ .

ﺗﺸﺮﺡ ﺍﻟﻘﻠﺐ ﺍﻟﻤﻌﺬﺏ ..

ﻭ ﻳﺴﻠﻢ ﺍﻟﻜﺎﻥ ﻗﻠﺒﻮ ﻛﺎﻓﺮ ..

ﻧﻮﺭ ﺩﻱ ﺣﺎﺟﻪ ﺗﺎﻧﻴﺔ ﻳﺎ ﺣﺠﻪ ﻣﺎﺑﺘﺘﻮﺻﻒ .. ﻣﺎﺑﺘﺘﻮﺻﻒ ..

..

ﺍﻣﻮ : ﻗﺎﻟﺖ .. ﻛﺮﻋﻠﻲ ﻳﺎﻳﻤﻪ .. ﺃﺗﺎﺭﻳﻚ ﺍﻧﺖ ﻛﺎﻥ ﺟﻨﻴﺖ ﻣﺎﺧﺎﺗﻲ ..

ﺍﻧﺎ ﻳﺎﻓﺨﺮﻱ ﻣﻦ ﺯﻣﺎﺍﺍﺍﺍﻥ ﺍﻟﺒﺖ ﺩﻱ ﺑﺮﻳﺪﻫﺎ ﺭﻳﺪﺓ ﺷﺪﻳﺪﺓ .. ﺑﺲ ﺍﻧﺖ ﻣﺎﺗﺸﻴﻞ ﻫﻢ ﺍﻟﻤﻮﺿﻮﻉ ﺩﻩ ﺡ ﻳﺘﻢ ﻋﺎﺩﻱ ﻻﺩﻩ ﺷﺎﻑ ﻻﺩﻩ ﺳﻤﻊ ..

ﻭﺍﻧﺎ ﺑﻮﻋﺪﻙ ﺡ ﺍﻗﻴﻒ ﻣﻌﺎﻙ ﻭﻗﻔﺔ ﺷﺪﻳﺪﺓ ..

ﺑﺲ ﺍﻧﺖ ﻣﺎﺗﻔﻜﺮ ﻛﺘﻴﺮ . ﻭﻣﺎﺗﻬﺘﻢ ﻣﺎﻓﻲ ﺯﻭﻝ ﺑﻌﺮﻑ ﺣﺎﺟﺔ ..

ﺣﺘﻰ ﻟﺒﻨﻰ ﻭﺳﺎﺭﺓ ﻣﺎ ﺗﻜﻠﻤﻬﻢ ..

ﻗﺎﻝ ﻟﻴﻬﺎ ﻟﺒﻨﻰ ﻋﺎﺭﻓﺔ .. ﻭﺣﻜﻴﺖ ﻟﻴﻬﺎ ﻧﺤﻦ ﻛﻨﺎ ﺧﺎﻳﻔﻴﻦ ﺍﻧﺘﻲ ﻣﺎ ﺗﻮﺍﻓﻘﻲ .

ﻗﺎﻟﺖ ﻟﻴﻬﻮ ﺍﻧﺎ ﻣﻮﺍﻓﻘﻪ . ﺑﺲ ﺍﻧﺖ ﺍﺗﺨﺮﺝ ﻭﺍﻣﺴﻚ ﺷﻬﺎﺩﺗﻚ ..

ﻭﺍﻧﺎ ﺑﻤﺸﻲ ﺍﻃﻠﺒﻬﺎ ﻟﻴﻚ ..

ﻓﺨﺮﻱ ﻗﺎﻡ ﻣﻦ ﺟﻨﺐ ﺍﻣﻮ ﻓﺮﺣﺎﻥ ﻳﺘﺒﺴﻢ ﻭﻗﺎﻝ ﺑﺮﺍﺍﺍﺣﻪ ﻛﺪﺍ ..

‏( ﻳﺴﺴﺴﺲ .. ﺍﻟﺨﻄﺔ ﻧﺠﺤﺖ ﻧﺠﺎﺡ ﺍﻟﺪﻟﻴﺐ ﻓﻲ ﻛﺮﻳﻤﻪ ‏)

ﻃﺒﻌﺎ ﻓﺨﺮﻱ .. ﻛﺎﻥ ﺑﻤﺜﻞ ﺳﺎﻛﺖ .. ﻻﻫﻮ ﻋﻴﺎﻥ ﻭﻻﺣﺎﺟﺔ ..

ﻫﻨﺎ ﺍﻟﺘﻠﻔﻮﻥ ﺿﺮﺏ ﻭﻓﺨﺮﻱ ﻓﺘﺢ ﺍﻟﺨﻂ .. ﻟﻘﺎﻫﺎ ﺩﻱ ﺧﺎﻟﺘﻮ ﺍﻟﺪﻛﺘﻮﺭﺓ ﻓﺎﻃﻤﺔ ..

ﻭﻗﺎﻟﺖ ﻟﻴﻬﻮ ﻳﺎﻓﺨﺮﻱ .. ﺣﻈﻚ ﻣﻜﺎﺟﺮ .. ﺍﻧﺎ ﺟﺎﻧﻲ ﻣﺤﻤﺪ ﺍﺑﻮ ﻧﻮﺭ ...

ﻭﻗﺎﻝ ﻧﻮﺭ ﻣﺎ ﻣﻮﺍﻓﻘﺔ ﺑﻴﻚ ..

ﻣﺎﺗﺘﻌﺐ ﻧﻔﺴﻚ ﺳﺎﻱ ﻓﻲ ﺍﻗﻨﺎﻉ ﺍﻣﻚ ..

ﺍﻟﻰ ﺍﻟﻠﻘﺎﺀ ..

١٥ / ٠٣ / ٢٠١٤

ﺍﻟﻤﺴﺆﻭﻟﻴﺔ ..

ﺍﻟﺤﻠﻘﺔ 23

ﺑﻘﻠﻢ ﻃﺎﺭﻕ ﺍﻟﻠﺒﻴﺐ ..

ﻓﺨﺮﻱ ﺍﻭﻝ ﻣﺎﺳﻤﻊ ﻛﻼﻡ ﺧﺎﻟﺘﻮ ﻓﻲ ﺍﻟﺘﻠﻔﻮﻥ . ﻗﺎﻝ ﻟﻴﻬﺎ .. ﺍﻧﺘﻲ ﻣﺎﺗﻨﺰﻋﺠﻲ ﺍﺑﺪﺍ " ﻳﺎﺧﺎﻟﺘﻲ ﻣﻦ ﺍﻟﻤﻮﺿﻮﻉ ﺩﻩ .. ﺍﺻﺒﺮﻱ ﺑﺲ ﺧﻠﻴﻨﻲ ﺍﻧﺎ ﺍﺟﻲ ﻫﻨﺎﻙ .. ﻭﺍﻥ ﺷﺎﺀ ﺍﻟﻠﻪ ﺍﻻﻣﻮﺭ ﺗﻨﻈﺒﺖ ﻭﻫﻨﺎ ﻫﺴﻲ ﺍﻟﻮﺿﻊ ﺗﻤﺎﻡ .. ﻭﺍﻟﻮﺍﻟﺪﺓ ﺍﻗﺘﻨﻌﺖ

ﻓﻲ ﺍﺛﻨﺎﺀ ﻣﺎﻫﻮ ﺑﺘﻜﻠﻢ ﻣﻌﺎﻫﺎ .. ﺯﻳﻨﺐ ﺟﺎﺕ ﻭﻗﻔﺖ ﻭﺭﺍﻫﻮ .. ﻭﻫﻮ ﻣﺎﺷﺎﻳﻔﻬﺎ ..

ﻭﻣﻮﺍﺻﻞ ﻓﻲ ﻛﻼﻣﻮ .. ﺑﺘﻜﻠﻢ ﻣﻊ ﺧﺎﻟﺘﻮ ﻓﻲ ﺍﻟﺘﻠﻔﻮﻥ .. ﻗﺎﻝ ﻟﻴﻬﺎ .. ﺗﺼﺪﻗﻲ ﺍﻧﺎ ﻳﻮﻣﻴﻦ ﻣﺎ ﺍﻛﻠﺖ ﺍﻻ ﺑﺎﻟﺪﺱ .. ﻭﺍﻟﻠﻪ ﺍﻟﺘﻤﺜﻴﻠﻴﺔ ﺩﻱ ﻣﺮﻫﻘﺔ ﺧﻼﺹ .. ﻟﻜﻦ ﺟﺎﺑﺖ ﻧﺘﻴﺠﺘﻬﺎ ﺗﺐ .. ﻭﻫﺴﻲ ﺍﻣﻲ ﺍﻟﺤﺒﻴﺒﻪ ﻭﺍﻓﻘﺖ ﺑﻲ ﺭﻏﺒﺔ ﻛﻤﺎﻥ .. ﺍﻣﺎ ﻣﻮﺿﻮﻉ ﻧﻮﺭ ﺩﻩ ﻣﺎﻳﻬﻤﻚ ..

ﺍﻣﻮ ﺳﻤﻌﺖ ﻛﻼﻣﻮ ﻛﻠﻮ .. ﻭﻋﺮﻓﺖ ﺍﻧﻮ ﻛﺎﻥ ﺑﻤﺜﻞ ﻋﻠﻴﻬﺎ ..

ﺑﺮﺍﺣﺔ ﻣﺸﺖ ﻣﻦ ﺟﻨﺒﻮ .. ﻋﺸﺎﻥ ﻣﺎﻳﺤﺲ ﺑﻴﻬﺎ .. ﻛﻤﻞ ﻛﻼﻣﻪ ﻣﻊ ﺧﺎﻟﺘﻮ .. ﻭﻓﺮﺣﺎﺍﺍﺍﻥ ﺑﺎﻻﻧﺠﺎﺯ ﺍﻟﻌﻤﻠﻮ .. ﻭﻣﺎﻋﺎﺭﻑ ﺍﻧﻮ ﺯﻳﻨﺐ ﻛﺸﻔﺘﻪ ..

ﻳﻼ ﻗﺎﻡ ﻗﺎﻝ ﻟﻲ ﺍﻣﻮ .. ﺍﻧﺎ ﻛﻨﺖ ﺑﺘﻤﻨﻰ ﺗﻤﺸﻲ ﻣﻌﺎﻱ ﺍﻟﺨﺮﻃﻮﻡ ﻭﺗﻘﺎﺑﻠﻲ ﻧﻮﺭ .. ﻭﺗﺸﻮﻓﻴﻬﺎ ..

ﺑﺲ ﻻﻧﻪ ﻟﺒﻨﻰ ﻣﻤﺘﺤﻨﺔ .. ﻭﻣﺪﺭﺳﺘﻬﺎ ﻓﺘﺤﺖ .. ﺍﻭﻝ ﺍﺟﺎﺯﺓ ﺣﺎﻭﻟﻲ ﺗﻌﺎﻟﻲ .. ﻋﺪﻱ ﻟﻴﻚ ﻣﻌﺎﻧﺎ ﺍﻳﺎﻡ .. ﻗﺎﻟﺖ ﻟﻴﻬﻮ ﺍﻥ ﺷﺎﺀ ﺍﻟﻠﻪ ..

ﻗﺎﻝ ﻟﻴﻬﺎ ﺍﻧﺎ ﺑﻜﺮﺓ ﺑﻌﺪ ﺑﻜﺮﺓ ﻣﺴﺎﻓﺮ .. ﻗﺎﻟﺖ ﻟﻴﻬﻮ ﺧﻼﺹ ﺭﺑﻨﺎ ﻳﻌﺪﻝ ﻋﻠﻴﻨﺎ ﻭﻋﻠﻴﻚ ..

ﻭﺍﺻﻼ " ﺍﺑﺖ ﺗﻮﺭﻳﻬﻮ ﺍﻧﻬﺎ ﻛﺸﻔﺘﻪ .. ﻟﻜﻦ ﻧﻴﺘﻬﺎ ﺷﻨﻮ؟ .. ﻣﺎ ﻣﻌﺮﻭﻑ ﺭﺑﻚ ﻳﺴﺘﺮ ..

ﺍﻟﻤﻬﻢ .. ﻓﺨﺮﻱ ﺳﺎﻓﺮ ..

ﻭﻧﺰﻝ ﻋﻨﺪ ﻧﺎﺱ ﺧﺎﻟﺘﻪ .. ﻭﺑﺴﺄﻝ ﻓﻲ ﺧﺎﻟﺘﻮ ﻣﻦ ﺗﻔﺎﺻﻴﻞ ﺍﻟﺤﺼﻞ ..

ﺣﻜﺖ ﻟﻴﻬﻮ ﺍﻧﻮ .. ﻣﺤﻤﺪ ﺍﻭﻝ ﺣﺎﺟﺔ ﺟﺎﺀ ﺑﻴﺴﺄﻝ ﻣﻨﻚ .. ﻭﺍﻧﺎ ﻋﻜﺴﺖ ﻟﻴﻬﻮ ﺭﻏﺒﺘﻚ ﻓﻲ ﻧﻮﺭ ..

ﻭﻫﻮ ﺍﻇﻨﻪ ﻣﺸﻰ ﺷﺎﻭﺭﻫﺎ ﻭﻫﻲ ﺭﻓﻀﺖ ..

ﻓﺨﺮﻱ ﻗﺎﻝ ﻟﻴﻬﺎ .. ﺑﺲ ﻣﺎﻭﺭﺍﻙ ﺳﺒﺐ ﺍﻟﺮﻓﺾ ﺑﺘﺎﻋﻬﺎ ﺷﻨﻮ؟

ﻗﺎﻟﺖ ﻟﻴﻬﻮ .. ﻗﺎﻝ ﺑﺪﻭﻥ ﺍﻱ ﺍﺳﺒﺎﺏ .

ﻓﺨﺮﻱ ﻗﺎﻝ ﻟﻴﻬﺎ ﻻﺯﻡ ﺍﻧﺎ ﺍﻣﺸﻲ ﻟﻴﻬﻢ ﻓﻲ ﺍﻟﺒﻴﺖ .

ﻭﺍﺳﺠﻞ ﻟﻴﻬﻢ ﺯﻳﺎﺭﺓ .. ﻭﺳﺄﻟﻬﺎ ﻭﺟﻬﺎ " ﻟﻮﺟﻪ ﺍﻟﺒﺖ ﻣﺎﺷﺎﻓﺘﻨﻲ .. ﺗﺮﻓﻀﻨﻲ ﺑﻼﺳﺒﺐ؟ ..

ﺍﻧﺎ ﻣﺎ ﺑﺨﻠﻴﻬﺎ ﺍﻻ ﺑﻲ ﺳﺒﺐ ﻭﺍﺣﺪ ﺑﺲ .. ﻟﻮ ﻋﻨﺪﻫﺎ ﺯﻭﻝ ﻓﻲ ﺣﻴﺎﺗﻬﺎ ..

ﺍﻫﺎ ﻓﺨﺮﻱ ﻛﻞ ﻣﺎ ﻳﻨﻮﻱ ﻳﻤﺸﻲ ﻟﻴﻬﻢ ﺯﻳﺎﺭﺓ ﻓﻲ ﺍﻟﺒﻴﺖ .. ﺑﺘﺠﻴﻬﻮ ﺧﻮﻓﺔ ﻛﺪﺍ ﻣﻦ ﺍﻟﻤﺠﻬﻮﻝ ﻭﺑﻐﻴﺮ ﺭﺍﻳﻮ .. ‏( ﺑﻜﻮﻥ ﺧﺎﻳﻒ ﻣﻦ ﻣﻮﺍﺟﻬﺔ ﺍﻟﻮﺍﻗﻊ ‏) .. ﻛﻢ ﻳﻮﻡ ﻣﺎﻗﺪﺭ ﻣﺸﻰ ..

ﻭﻧﻮﺭ ﻣﺪﺭﺳﺘﻬﺎ ﻓﺘﺤﺖ .. ﻭﺑﺪﺃﺕ ﺍﻟﺪﺭﺍﺳﺔ ﻓﻲ ﻣﺪﺭﺳﺔ ﺧﺎﺻﻪ . ﻓﻲ ﺍﻟﻔﺘﻴﺤﺎﺏ ﺍﻟﺸﺮﻗﻴﺔ ..

ﻭﻓﺨﺮﻱ ﻛﻢ ﻣﺮﺓ ﻣﺸﻰ ﺍﻟﻤﺪﺭﺳﺔ ﺩﻱ .. ﺑﻘﻴﻒ ﻓﻲ ﺍﻟﺸﺎﺭﻉ .. ﻋﺸﺎﻥ ﻳﺸﻮﻑ ﻧﻮﺭ ﻣﻦ ﺑﻌﻴﺪ ..

ﻟﻜﻦ ﻣﺴﺘﺤﻴﻞ ﻳﺸﻮﻓﻬﺎ ﺍﻭ ﻳﻌﺮﻓﻬﺎ .. ﻻﻧﻬﺎ ﻣﻨﻘﺒﺔ ﻭﻣﻌﺎﻫﺎ ﻛﻢ ﻭﺍﺣﺪﺓ ﻣﻨﻘﺒﺔ ..

ﻓﻲ ﻓﺘﺮﺓ ﻛﺪﺍ ﻓﺨﺮﻱ ﺍﻧﺸﻐﻞ ﺑﻲ ﺍﻣﺘﺤﺎﻧﺎﺗﻮ ﺍﻟﻨﻬﺎﺋﻴﺔ .. ﻭﺑﻘﻰ ﻣﺎﻓﺎﻫﻢ ﺍﻱ ﺣﺎﺟﺔ ..

ﻭﻣﺮﺕ ﺍﻳﺎﻡ ﻛﺘﻴﺮﺓ ﻭﻟﺴﻊ ﻻﻫﻮ ﻧﺴﻰ ﻧﻮﺭ . ﻭﻻﻗﺎﺩﺭ ﻳﻤﺸﻲ ﻳﻮﺍﺟﻬﺎ ﻭﺧﺎﻳﻒ ﻣﻦ ﺷﻨﻮ ﻫﻮ ﺯﺍﺗﻮ ﻣﺎﻋﺎﺭﻑ ..

ﺑﻌﺪ ﻣﺎ ﻧﺘﻬﺖ ﺍﻣﺘﺤﺎﻧﺎﺗﻮ .. ﺍﺻﺮ ﻳﻮﻡ ﻳﻤﺸﻲ ﻟﻴﻬﻢ ﻓﻲ ﺍﻟﺒﻴﺖ .. ﻻﻧﻮ ﻓﻌﻼ ﺑﻘﻰ ﻣﺎﻋﻨﺪﻭ ﺗﻔﻜﻴﺮ ﻏﻴﺮﻫﺎ ..

ﻭﻧﻮﺭ ﻛﺎﻧﺖ ﻣﻨﻬﻤﻜﺔ ﻓﻲ ﻣﺬﺍﻛﺮﺗﻬﺎ .. ﻭﺩﺭﻭﺳﻬﺎ ﻭﻣﺠﺘﻬﺪﺓ ﺍﺟﺘﻬﺎﺩ ﺷﺪﻳﺪ .. ‏( ﺍﻟﺒﺖ ﻣﻤﺘﺤﻨﺔ ﺍﻟﺠﺎﻣﻌﺔ ﻭﻛﺪﺍ ‏) ..

ﺍﻟﻌﺼﺮﻳﺔ ﻛﺪﺍ ﺍﻟﺒﺎﺏ ﺩﻗﺔ .. ﻣﺤﻤﺪ ﻛﺎﻥ ﻣﺎﻓﻲ .. ﻭﻛﻮﺛﺮ ﺟﻮﺓ ﻣﺸﻐﻮﻟﺔ ﻓﻲ ﺣﺎﺟﺔ ..

ﻭﺍﻟﺒﻨﺎﺕ ﺍﻟﺼﻐﺎﺭ ﻧﺎﻳﻤﺎﺕ ..

ﻧﻮﺭ ﻟﻔﺖ ﺍﻟﺘﻮﺏ ﺍﺗﺒﻠﻤﺖ ﺑﻴﻬﻮ ﻭﻣﺸﺖ ﺗﻔﺘﺢ ﺍﻟﺒﺎﺏ ..

ﻻﻗﺖ ﺷﺎﺏ .. ﻭﺿﻲ ﺍﻟﻮﺟﻪ .. ﺟﻤﻴﻞ ﺍﻟﻄﻠﻌﺔ .. ﻣﺴﺘﻮﻱ ﺍﻟﻘﻮﺍﻡ .. ﻣﺸﺮﻕ ﺍﻟﻮﺟﻪ ﻋﻨﺪﻭ ﻣﻼﻣﺢ ﺣﺎﺩﺓ ..

ﻋﻴﻮﻧﻬﺎ ﻻﻗﺖ ﻋﻴﻮﻧﻮ .. ﻛﺪﺍ .. ﺣﺴﺖ ﺑﻲ ﺷﻲ ﻣﺎﻃﺒﻴﻌﻲ .. ﺳﺮﻳﻊ ﺍﻧﺰﻭﺕ ﺑﻲ ﺟﻨﺒﺔ ﺍﻟﺒﺎﺏ .. ﻭﺍﺧﺘﺒﺄﺕ .. ﻭﻗﺎﻟﺖ .. ﻋﻠﻴﻜﻢ ﺍﻟﺴﻼﻡ ..

ﻭﻫﻮ ﺑﺲ ﺍﺗﺴﻤﺮ ﻗﺒﻠﻮ .. ﺍﺗﺒﻜﻢ ﻭﻏﻠﺒﺘﻮ ﺍﻟﻜﻠﻤﺔ ..

ﻗﺎﻟﺖ ﻟﻴﻬﻮ ﻣﺮﺣﺒﺎ ﻋﺎﻳﺰ ﻣﻨﻮ ؟ ..

ﻗﺎﻝ ﻟﻴﻬﺎ ﺍﻧﺎ ﻓﺨﺮﻱ .. .. !! ﺣﺴﺖ ﺑﺎﻧﻮ ﻛﺮﻋﻴﻬﺎ ﺑﺮﺩﻭﻥ .. ﻭﻗﺮﺑﺖ ﺗﺒﺮﻙ ..

ﻭﻗﻠﺒﻬﺎ ﺩﻩ ﺍﻟﺘﻒ ﺍﻟﺘﻒ ﺍﻟﺘﻒ .. ﻭﺟﺎﺗﻬﺎ ﺷﺤﺔ ﻛﺪﺍ ﻗﻠﺒﻬﺎ .. ﻣﻦ ﺻﺪﺭﻫﺎ ﻻﻣﻦ ﻭﺻﻠﺖ ﺍﻟﻜﻠﻰ ..

ﻗﺎﻟﺖ ﻟﻴﻬﻮ ﻣﺮﺣﺐ ﻳﺎﻓﺨﺮﻱ ﺍﺗﻔﻀﻞ .. ﻭﺧﻠﺖ ﺍﻟﺒﺎﺏ ﻓﺎﺗﺢ ﻭﺩﺧﻠﺖ ﻗﺪﺍﻣﻮ ..

ﻭﻫﻮ ﻗﻔﻞ ﺍﻟﺒﺎﺏ ﻭﺭﺍﻫﻮ .. ﻭﺩﺧﻞ ﻣﺪﺕ ﻟﻴﻬﻮ ﻳﺪﻫﺎ ﻋﻠﻰ ﺍﻟﻐﺮﻓﺔ ﺍﻟﺨﺎﺭﺟﻴﺔ ..

ﻭﻗﺎﻟﺖ ﻟﻴﻬﻮ ﺍﺗﻔﻀﻞ ﺑﻴﺠﺎﻱ .. ﻟﻤﻦ ﺍﻟﺒﺖ ﻣﺪﺕ ﻟﻴﻬﻮ ﻳﺪﻫﺎ ﻋﻠﻰ ﺍﻻﻭﺿﺔ .. ﻳﺪﻫﺎ ﺍﻧﻜﺸﻔﺖ ﻣﻦ ﺍﻟﺘﻮﺏ ﺑﻐﻴﺮ ﻗﺼﺪ ﻟﻐﺎﻳﺔ ﻧﺺ ﺍﻟﺴﺎﻋﺪ ﻛﺪﺍ .. ﻓﺨﺮﻱ ﻗﻠﺒﻮ ﺩﻩ ﻋﻤﻠﻮ ﺯﻧﻨﻨﻨﻨﻦ .. ﻫﻬﻬﻪ ﻭﻫﻲ ﺳﺮﻳﻊ ﻏﻄﺖ ﻳﺪﻫﺎ ..

ﻫﻮ ﺩﺧﻞ ﺑﻴﻬﻨﺎ ﻭﻫﻲ ﻭﺍﺻﻠﺖ ﻣﺎﺷﺔ ﻟﻲ ﺟﻮﺓ ..

ﺗﻤﺸﻲ ﻛﻤﺎ ﺗﻤﺸﻲ ﺍﻟﺴﺤﺎﺑﺔ ﺍﻟﺮﺍﺣﻠﻪ .. ﻗﻮﺍﻡ ﻓﺎﺭﻉ .. ﻭﺗﻘﺴﻴﻢ ﺍﻻﻫﻲ .. ﺳﺒﺤﺎﻥ ﺍﻟﺨﻼﻕ . ﻻ ﺑﺘﻜﺶ ﻧﻌﻼﺗﻬﺎ ﻭﻻﺑﺘﺴﻚ ﻗﺪﻣﻴﻬﺎ ..

ﻓﺨﺮﻱ ﺩﺧﻞ ﺍﻻﻭﺿﺔ ﻭﻛﺮﻋﻴﻬﻮ ﺩﻳﻞ ﻳﺘﻀﺮﺑﻦ ﻭﻧﻔﺴﻮ ﻗﺎﻳﻢ ﺍﻟﺘﻘﻮﻝ ﻛﺎﻥ ﻃﺎﻟﻌﻠﻮ ﺟﺒﻞ ..

ﺍﻣﻬﺎ ﻛﻮﺭﻛﺖ ﻟﻴﻬﺎ ﻣﻦ ﺟﻮﺓ .. ﻧﻮﺭ؟؟ ﻳﺎﻧﻮﺭ ؟؟ ﻗﺎﻟﺖ ﻟﻴﻬﺎ ﻧﻌﻢ ﻳﺎ ﺍﻣﻲ .

ﻗﺎﻟﺖ ﻟﻴﻬﺎ ﺩﻩ ﻣﻨﻮ ﺍﻟﺠﺎﺀ؟ .. ﻗﺎﻟﺖ ﻟﻴﻬﺎ ﺩﻩ ﻓﺨﺮﻱ ﻭﺩ ﺧﺎﻟﺘﻲ ﺯﻳﻨﺐ ..

ﻛﻮﺛﺮ ﺧﺘﺖ ﺍﻟﻔﻲ ﻳﺪﻫﺎ ﻭﻧﻔﻀﺖ ﺍﻳﺪﻳﻬﺎ ﻭﺟﺎﺕ ﻣﺎﺭﻗﺔ ..

ﻭﺟﺎﺕ ﺳﻠﻤﺖ ﻋﻠﻴﻬﻮ .. ﺑﻜﻞ ﺗﺮﺣﺎﺏ )).. ﻓﺨﺮﻱ ؟؟؟؟ ﻳﺤﻠﻴﻠﻮ .. ﻳﺤﻠﻴﻠﻮ .. ﻛﻴﻒ ﺣﺎﻟﻚ ﻳﺎﻭﻟﺪﻱ ؟؟ .. ﻣﺎﺷﺎﺀ ﺍﻟﻠﻪ ﻣﺎﺷﺎﺀ ﺍﻟﻠﻪ ﺻﻼﺓ ﺍﻟﻨﺒﻲ .. ﺍﻟﻌﻴﺎﻝ ﻛﺒﺮﺕ ﻳﺎﺧﻮﺍﻧﻲ .. ﻧﻔﺲ ﻣﻼﻣﺤﻚ ﻣﺎﺗﻐﻴﺮﺕ .. ﻭﻭﺷﻚ ﺍﻟﻄﻴﺐ .. ﺭﺑﻨﺎ ﻳﺤﻔﻈﻚ ..

ﺍﻫﺎ ﺍﻟﺒﻨﻴﺎﺕ ﺍﻟﺼﻐﺎﺭ ﺻﺤﻨﻤﻦ ﺍﻟﻨﻮﻡ .. ﻭﻣﺤﻤﺪ ﺟﺎ ﺩﺍﺧﻞ ﻭﺳﻠﻢ ﻋﻠﻰ ﻓﺨﺮﻱ ..

ﻭﻓﺮﺡ ﺑﻲ ﺟﻴﺘﻮ ﺷﺪﻳﺪ .. ﻭﻗﻌﺪ ﻣﻌﺎﻫﻮ . ﻳﺘﻮﻧﺴﻮﺍ .. ﻭﻳﺘﺬﻛﺮﻭﺍ ﻓﻲ ﻳﻮﻡ ﺍﻟﺤﺮﺍﺻﻪ ..

ﻭﻧﻮﺭ ﻣﺸﺖ ﺗﻘﺮﺍ ﻓﻲ ﻗﺮﺍﻳﺘﻬﺎ .. ﻟﻜﻦ ﻭﻻﺣﺮﻑ ﻣﺎﻓﻬﻤﺘﻮ .. ﺗﺮﺟﻒ ﻣﻦ ﺭﺍﺳﻬﺎ ﻟﻲ ﻛﺮﻋﻴﻬﺎ ..

ﺍﻟﻤﻬﻢ ﺑﻲ ﺍﺧﺘﺼﺎﺭ ﺷﺪﻳﺪ .. ﻋﺸﺎﻥ ﻣﺎ ﻧﻄﻮﻝ ﻓﻲ ﺗﺼﻮﻳﺮ ﺍﻟﻤﻮﺍﻗﻒ ..

ﻣﺤﻤﺪ ﻭﻛﻮﺛﺮ ﻋﻜﺴﻮ ﻟﻔﺨﺮﻱ ﺭﺍﻱ ﺍﻟﺒﺖ ﻧﻮﺭ ..

ﻓﺨﺮﻱ ﻗﺎﻝ ﻟﻴﻬﻢ ﺍﻧﺎ ﻣﺎﺑﻤﺸﻲ .. ﺍﻻﻫﻲ ﺗﻮﺭﻳﻨﻲ ﺍﻟﺴﺒﺐ ..

ﻣﺤﻤﺪ ﻗﺎﻝ ﻟﻜﻮﺛﺮ ﻧﺎﺩﻳﻬﺎ ﻳﺎﻛﻮﺛﺮ .. ﺟﺎﺕ ﺩﺧﻠﺖ ﻭﻗﻌﺪﺕ ﻓﻲ ﻃﺮﻑ ﺍﻟﺴﺮﻳﺮ .. ﻭﻻﻣﺔ ﻧﻔﺴﻬﺎ ﻭﺿﺎﻣﻪ ﺭﺟﻠﻴﻬﺎ .. ﻗﻌﺪﺗﻬﺎ ﺍﻟﻤﻌﺘﺎﺩﺓ ﺍﻟﻤﻌﺮﻭﻓﺔ .. ﻭﻣﺪﻧﻘﺮﺓ ﻋﻠﻰ ﺍﻻﺭﺽ ..

ﻣﺤﻤﺪ ﻓﺘﺢ ﺍﻟﻜﻼﻡ ﻗﺎﻝ ﻟﻴﻬﺎ .. ﻓﺨﺮﻱ ﻋﺎﻳﺰ ﻳﺴﻤﻊ ﻣﻨﻚ ﻳﺎﻧﻮﺭ .. ﻻﻧﻮ ﺍﻟﺰﻭﻝ ﺩﻩ ﻣﺼﺮ ﺍﻧﻚ ﺗﺪﻳﻬﻮ ﻛﻠﻤﺔ ﻭﺍﺣﺪﺓ .. ﻭﺗﺎﻧﻲ ﻣﺎ ﺣﻴﻀﺎﻳﻘﻚ ..

ﻗﺎﻟﺖ ﻟﻴﻬﻮ ﻣﻌﻠﻴﺶ ﻳﺎﻓﺨﺮﻱ .. ﺍﻧﺎ ﺑﻘﺪﺭ ﺍﺭﺗﺒﻂ ﺑﻴﻚ ..

ﻓﺨﺮﻱ ﻗﺎﻝ ﻟﻴﻬﺎ .. ﺍﻟﻜﻼﻡ ﺩﻩ ﻭﺻﻠﻨﻲ .. ﻭﺍﻧﺎ ﺟﺎﻱ ﻫﻨﺎ ﺑﺲ ﻋﺸﺎﻥ ﺍﻋﺮﻑ ﺍﻟﺴﺒﺐ ..

ﻗﺎﻟﺖ ﻟﻴﻬﻮ ﺑﺪﻭﻥ ﺍﻱ ﺳﺒﺐ .. ﺍﻧﺎ ﺷﺨﺼﻴﺎ " ﻣﺎﻋﻨﺪﻱ ﺭﻏﺒﺔ ﻓﻲ ﺍﻻﺭﺗﺒﺎﻁ ﺩﻩ ﺑﺎﻟﺬﺍﺕ ..

ﻗﺎﻝ ﻟﻴﻬﺎ ﻣﺴﺘﺤﻴﻞ ﻭﺍﻧﺎ ﻣﺎﺑﻤﺸﻲ ﻗﺒﻞ ﻣﺎ ﺍﻋﺮﻑ ..

ﺳﻜﺘﺖ ﻣﺴﺎﻓﺔ ﻭﻗﺎﻟﺖ ﻟﻴﻬﻮ ..

ﻓﺨﺮﻱ ﺍﻧﺎ ﻭﺻﻤﺔ ﻋﺎﺭ .. ﺍﻧﺎ ﺳﺒﺔ ﻓﻲ ﻛﻞ ﺍﻟﻤﺠﺘﻤﻊ .. ﺍﻧﺎ ﺩﺧﻮﻟﻲ ﻋﻠﻰ ﺍﻱ ﺍﺳﺮﺓ ﺑﻬﻴﻦ ﻛﺮﺍﻣﺘﻬﺎ .. ﻭﺑﻮﺳﺦ ﺳﻤﻌﻨﻬﺎ .. ﻓﺨﺮﻱ .. ﺍﻧﺖ ﻭﺍﻣﻚ ﺍﻋﺰ ﻧﺎﺱ ﻋﻨﺪﻱ .. ﺑﻌﺪ ﺍﻣﻲ ﻭﺍﺑﻮﻱ ..

ﻓﺎﻧﺎ ﻛﻴﻒ ﺍﻭﺳﺦ ﺳﻤﻌﺘﻜﻢ .. ﺍﻧﺖ ﻳﻘﻮﻟﻮ ﻟﻴﻚ ﻣﺮﺗﻚ ﺍﻟﻠﻘﻴﻄﺔ .. ﻭﺍﻣﻚ ﻳﻘﻮﻟﻮ ﻟﻴﻬﺎ ﻣﺮﺓ ﻭﻟﺪﻙ ﺍﻟﻠﻘﻴﻄﺔ .. ﻭﺍﻭﻻﺩﻙ ﻳﻘﻮﻟﻮ ﻟﻴﻬﻢ ﺍﻣﻜﻢ ﺍﻟﻠﻘﻴﻄﺔ ..

ﺣﺘﻰ ﻟﻮ ﺍﻧﺖ ﻣﺎﺑﻬﻤﻚ ﺍﻟﻜﻼﻡ .. ﻭﻣﺴﺘﻌﺪ ﺗﻀﺤﻲ ﺑﻲ ﺳﻤﻌﺘﻚ ﻋﺸﺎﻥ ﺳﻌﺎﺩﺗﻲ .. ﺍﻧﺎ ﻣﺴﺘﺤﻴﻞ ﺍﻗﺒﻞ ﺍﻟﺤﺎﺟﺔ ﺩﻱ .. ﺍﻧﺎ ﺍﻟﻘﺪﺭ ﺍﻻﺗﻜﺘﺐ ﻋﻠﻲ .. ﻻﺯﻡ ﺍﺗﺤﻤﻞ ﻧﺘﻴﺠﺘﻮ ﺑﺮﺍﻱ ..

ﻟﻴﻪ ﺍﺧﻠﻲ ﻧﺎﺱ ﺗﺎﻧﻴﻦ ﻳﻌﺎﻧﻮ ﻣﻌﺎﻱ ؟

ﺍﻧﺎ ﻛﺒﺮﺕ ﻳﺎﻓﺨﺮﻱ .. ﻭﻓﻬﻤﺖ .. ﻭﻋﺮﻓﺖ ﻳﻌﻨﻲ ﺷﻨﻮ ﺍﻟﺰﻭﻝ ﻳﺘﺰﻭﺝ ﻟﻴﻬﻮ ﻭﺍﺣﺪﺓ ﻣﺎﻣﻌﺮﻭﻑ ﻟﻴﻬﺎ ﺍﺻﻞ ..

ﻭﻣﺎﻣﻌﺮﻭﻓﺔ ﻧﺎﺗﺠﺔ ﻋﻦ ﻋﻼﻗﺔ ﺷﺮﻋﻴﺔ ﻭﻻ ﻣﺎﺷﺮﻋﻴﺔ ..

ﻭﻛﻞ ﺍﻟﻤﺠﺘﻤﻊ ﻭﺍﻟﻨﺎﺱ ﺑﺮﺟﺤﻮﺍ ﺍﻧﻲ ﻧﺘﺎﺝ ﻟﻲ ﻋﻼﻗﺔ ﻏﻴﺮ ﺷﺮﻋﻴﺔ .. ﺃﻭﻝ ﺷﺘﻴﻤﻪ ﺷﺘﻤﻮﻧﻲ ﻟﻴﻬﺎ ﺍﻟﺒﻨﺎﺕ .. ﻭﺳﻤﻌﺘﻬﺎ ﺍﺿﺎﻧﻲ .. ﻫﻲ ﺍﻧﻲ ﺃﻧﺎ ............ ‏( ﻭﻗﻔﺖ ﻟﻴﻬﺎ ﻋﺒﺮﺓ ﻭﻣﺎﻗﺪﺭﺕ ﺗﻘﻮﻝ ﺍﻟﻜﻠﻤﺔ ‏) .. ﺣﺘﻰ ﻳﺎﻓﺨﺮﻱ ﻟﻮ ﻛﺎﻧﺖ ﺍﻟﻘﺼﺔ ﻣﺎﻣﻌﺮﻭﻓﺔ .. ﺑﺲ ﻓﻲ ﺍﻟﻨﻬﺎﻳﺔ ﺍﻧﺎ ﻟﻘﻴﻄﺔ .. ﻭﺳﺒﺔ ﻭﻭﺻﻤﺔ ﻋﺎﺭ .. ﻣﺎ ﻣﻤﻜﻦ ﺍﻟﺼﻖ ﺍﻟﺴﻤﻌﺔ ﻭﺍﻟﻌﻴﺐ ﻓﻴﻜﻢ ﺍﻧﺘﻮ ..

ﺍﻧﺎ ﻗﺼﺔ ﺯﻭﺍﺝ ﻭﺍﺗﺒﺎﻁ ﺩﻱ .. ﻫﺴﻲ ﻣﺎﻣﻔﻜﺮﺓ ﻓﻴﻬﺎ .. ﻭﻳﺸﻬﺪ ﺍﻟﻠﻪ ﻟﻮ ﻣﺎ ﺍﻟﺴﺒﺐ ﺩﻩ .. ﺍﻧﺖ ﺍﻟﻮﺣﻴﺪ ﺍﻟﻔﻲ ﺍﻟﺪﻧﻴﺎ ﺩﻱ ﺑﺘﻤﻨﺎﻫﻮ .. ﺍﻧﺖ ﻣﺎﻓﻴﻚ ﻋﻴﺐ .. ﺍﻟﻌﻴﺐ ﻓﻴﻨﻲ ﺍﻧﺎ ﻳﺎﻓﺨﺮﻱ ..

ﻭﺩﻣﻮﻋﻬﺎ ﻧﺰﻟﻦ ..

ﺍﻟﻰ ﺍﻟﻠﻘﺎﺀ

ﻗﺒﻞ ﺍﻟﻰ ﺍﻟﻠﻘﺎﺀ .. ﻻﻳﺰﺍﻝ ﺍﻟﺴﺆﺍﻝ ﻳﻄﺮﺡ ﻧﻔﺴﻪ .. ‏( ﻣﻦ ﺍﻟﻤﺴﺆﻝ؟ ‏

ﺍﻟﻤﺴﺆﻭﻟﻴﺔ .

ﺍﻟﺤﻠﻘﺔ 24 ..

ﺑﻘﻠﻢ ﻃﺎﺭﻕ ﺍﻟﻠﺒﻴﺐ .

ﺑﻌﺪ ﻣﺎ ﻛﻤﻠﺖ ﻧﻮﺭ ﻛﻼﻣﻬﺎ .. ﻭﻗﻊ ﺍﻟﻜﻼﻡ ﻋﻠﻰ ﺍﻟﺤﻀﻮﺭ ﺯﻱ ﺍﻟﺼﺎﻋﻘﺔ .. ﻭﺳﻜﺘﻮ ‏( ﺗﻤﻤﻢ ‏) ﺍﻣﻜﻦ ﺩﻗﻴﻘﺔ ﺍﻭ ﺩﻗﻴﻘﺘﻴﻦ ﻣﺎﻓﻲ ﺯﻭﻝ ﻗﺎﻝ ﻛﻠﻤﺔ ..

ﻻﻧﻬﺎ ﺧﺘﺖ ﻟﻴﻬﻢ ﺍﻟﻨﻘﺎﻁ ﻓﻮﻕ ﺍﻟﺤﺮﻭﻑ .. ﻛﻮﺛﺮ ﻣﺎ ﺍﺳﺘﺤﻤﻠﺖ ﻗﺎﻣﺖ ﻃﻠﻌﺖ ..

ﻭﻧﻮﺭ ﻗﺎﻣﺖ ﻭﺭﺍﻫﺎ ﻭﻫﻲ ﺗﻨﺘﺤﺐ ﻣﻦ ﺍﻟﺒﻜﺎﺀ ..

ﻭﻣﺤﻤﺪ ﻭﻓﺨﺮﻱ ﻗﻌﺪﻭ ﻣﺤﺘﺎﺭﻳﻦ ..

ﻓﺨﺮﻱ ﻗﺎﻝ ﻟﻤﺤﻤﺪ .. ﺍﻧﺖ ﻳﺎﻋﻢ ﻣﺤﻤﺪ ﻣﺎ ﻣﺸﻴﺖ ﺳﺄﻟﺖ ﻣﻦ ﻧﻮﺭ؟ .. ﺍﻟﺠﺎﺑﻬﺎ ﺍﺻﻼ ﻟﻠﺪﺍﺭ ﻣﻨﻮ ؟ﻭﺟﺎﺕ ﻛﻴﻒ؟ ..

ﻗﺎﻝ ﻟﻴﻬﻮ . ﻭﺍﻟﻠﻪ ﻳﺎﻓﺨﺮﻱ ﻳﺎ ﺍﺑﻨﻲ ﺯﻱ ﻣﺎﻋﺎﺭﻑ ﺍﻟﺘﺮﺩﺩ ﻭﺍﻟﺘﺨﻮﻑ ﻓﻲ ﻗﻠﺐ ﺍﻻﻧﺴﺎﻥ .. ﻭﺧﺼﻮﺻﺎ " ﺍﻧﺎ ﺣﺎﺱ ﺍﺣﺴﺎﺱ ﺍﻟﻮﺍﻟﺪ . ﻓﺎﻫﻤﻨﻲ ؟

ﻃﺒﻌﺎ " ﺻﺮﺍﺣﺔ ﺍﻣﻠﻲ ﻛﻠﻪ ﺍﻧﻮ ﺗﻄﻠﻊ ﻧﻮﺭ ﺑﺖ ﺣﻼﻝ .. ﻋﺸﺎﻥ ﻛﺪﺍ ﺑﺘﺨﻮﻑ ﺍﻧﻲ ﺍﺣﺼﻞ ﻋﻠﻰ ﻣﻌﻠﻮﻣﺔ ﺗﺄﻛﺪ ﻟﻲ ﺍﻟﺤﺎﺟﺔ ﺍﻟﺘﺎﻧﻴﺔ ..

ﻟﻜﻦ ﺑﺎﻟﻨﺴﺒﻪ ﻟﻠﺪﺍﺭ .. ﻣﺸﻴﺖ ﻭﺳﺄﻟﺖ .. ﻭﻛﻢ ﻣﺮﺓ ﺑﻤﺸﻲ ﻭﻣﺘﺎﺑﻊ ﻣﻌﺎﻫﻢ . ﺑﺲ ﻓﻲ ﺳﺮﻳﺔ ﺗﺎﻣﺔ . ﻭﻣﺎﻓﻲ ﺯﻭﻝ ﻣﻦ ﻧﺎﺱ ﺍﻟﺒﻴﺖ ﻋﺎﺭﻑ ﺍﻟﺘﻔﺎﺻﻴﻞ .. ﻭﺗﺘﺨﻴﻞ ﻳﻮﻡ ﻣﻦ ﺫﺍﺕ ﺍﻻﻳﺎﻡ . ﻧﻮﺭ ﻗﺎﻟﺖ ﻻﻣﻬﺎ ﺷﻨﻮ؟ .. ﻗﺎﻟﺖ ﻟﻴﻬﺎ . ﺍﻧﺎ ﻧﻔﺴﻲ ﺍﻣﺸﻲ ﺍﺳﺄﻝ ﻣﻦ ﻧﻔﺴﻲ .. . ﺑﺲ ﺧﺎﻳﻔﺔ ﺍﻃﻠﻊ ﻧﺘﻴﺠﺔ ﻟﻌﻼﻗﺔ ﻏﻴﺮ ﺷﺮﻋﻴﺔ .. . ﻋﺸﺎﻥ ﻛﺪﺍ ﺍﺣﺴﻦ ﻣﺎ ﺍﻣﺸﻲ ﺍﺳﺄﻝ ..

ﺑﺎﻟﻤﻨﺎﺳﺒﺔ ﻳﺎﻓﺨﺮﻱ .. ﺍﻧﺎ ﻋﺎﻳﺰ ﺍﻗﻮﻝ ﻟﻴﻚ ﺣﺎﺟﺔ .. ﻧﻮﺭ ﺩﻱ .. ﻣﺴﺘﺤﻴﻞ ﻳﺘﻌﺮﻑ ﺍﻫﻠﻬﺎ ﺍﻟﺤﻘﻴﻘﻴﻴﻦ ..

ﺍﻧﺖ ﻋﺎﺭﻑ ﻟﻴﻪ؟ ..

ﻗﺎﻟﻮ ﺍﻭﻝ ﺣﺎﺟﺔ ﻟﻘﺎﻫﺎ ﺳﺎﺋﻖ ﺗﻜﺴﻲ .. ﺍﻟﺴﺎﻋﺔ 4 ﺻﺒﺎﺣﺎ " .. ﻣﺨﺘﻮﺗﻪ ﻓﻮﻕ ﺻﺒﺔ ﻣﻘﻌﺪ ﺑﺘﺎﻉ ﻣﻈﻠﺔ .. ﻭﻣﺎﻋﺎﺭﻑ ﻋﻨﻬﺎ ﺍﻱ ﺣﺎﺟﺔ .. . ﺑﺲ ﺣﺲ ﺍﻧﻬﺎﺍ ﻣﺴﺆﻭﻟﻴﻪ ﺍﻣﺎﻡ ﺍﻟﻠﻪ ﻭﺷﺎﻟﻬﺎ ﻭﺩﺍﻫﺎ ﺍﻟﺪﺍﺭ ﻓﻲ ﻧﻔﺲ ﺍﻟﻮﻗﺖ .

ﻭﺍﻟﺴﻮﺍﻕ ﺩﺍ ﻣﻦ ﻣﻨﻄﻘﺔ ﺍﻟﻌﺴﻴﻼﺕ .. ﻭﻫﺴﻲ ﺍﻟﺰﻭﻝ ﺩﻩ ﻛﺒﺮ .. ﻭﺍﻧﺎ ﻧﺎﻣﺸﻴﺖ ﻟﻴﻬﻮ ﻓﻲ ﻣﻜﺎﻧﻪ .. ﻋﺸﺎﻥ ﻳﺪﻳﻨﻲ ﺍﻱ ﺭﺍﺱ ﺧﻴﺖ .. ﻭﺍﻟﻘﻰ ﻋﻨﺪﻭ ﺍﻱ ﻣﻌﻠﻮﻣﻪ .. ﺗﻔﻴﺪﻧﻲ ﺍﻭ ﺗﻘﻮﺩﻧﻲ ﻟﻠﻤﻌﺮﻓﻪ .. ﻟﻜﻦ .. ﻟﻼﺳﻒ ..

ﻣﺎﻋﻨﺪﻭ ﺍﻱ ﺩﻟﻴﻞ ﻳﻬﺪﻳﻨﻲ .. ﻏﻴﺮ ﺍﻧﻮ ﻟﻘﺎﻫﺎ ﻓﻲ ﻣﻈﻠﺔ .. ﻣﻠﻔﻮﻓﺔ ﺑﻲ ﺑﺸﻜﻴﺮ ﺑﻤﺒﻲ .. ﻭﻣﺮﺑﻮﻁ ﻓﻲ ﺭﻗﺒﺘﻬﺎ ﺧﻴﻂ ﺍﺣﻤﺮ .. . ﻭﺷﺎﻟﻬﺎ ﻭﺩﺍﻫﺎ ﺍﻟﺪﺍﺭ ..

ﺍﻟﻤﻬﻢ ﺩﻩ ﻛﻞ ﺍﻟﺤﺎﺻﻞ ..

ﻓﺨﺮﻱ ﻗﺎﻝ ﻟﻴﻬﻮ ﻟﻘﺎﻫﺎ ﻭﻳﻦ ﺑﺎﻟﻀﺒﻂ ..

ﻗﺎﻝ ﻟﻴﻬﻮ ﻟﻘﺎﻫﺎ ﻓﻲ ﻣﻨﻄﻘﺔ ‏( .......... ‏) ﺍﻟﻤﻨﻄﻘﺔ ﺩﺍﺧﻞ ﺍﻟﻌﺎﺻﻤﺔ .. ﻓﻲ ﻣﻈﻠﺔ ﻓﻲ ﺍﻟﺸﺎﺭﻉ ﺍﻟﻔﻼﻧﻲ ﻓﺨﺮﻱ ﻗﺎﻝ ﻟﻴﻬﻮ ﺍﻳﻮﺓ ﺑﻌﺮﻓﻮ .. ﺑﺲ ﻣﺎﻭﺭﺍﻙ ﻟﻘﺎﻫﺎ ﻓﻲ ﻳﺎﺗﻮ ﻣﻈﻠﺔ؟ ..

ﻣﺤﻤﺪ ﻗﺎﻝ ﻟﻴﻬﻮ ﺍﺑﺪﺍ " ﻭﻣﺎﺳﺄﻟﺘﻪ .. ﻻﻧﻮ ﺩﻩ ﺳﺆﺍﻝ ﺑﺪﻭﻥ ﻓﺎﺋﺪﺓ ..

ﻗﺎﻝ ﻟﻴﻬﻮ ﻭﻣﻴﻦ ﻗﺎﻝ ﺑﺪﻭﻥ ﻓﺎﺋﺪﺓ ؟ .. ﻳﺎﻋﻢ ﻣﺤﻤﺪ .. ﺍﻟﻠﻪ ﻳﺨﻠﻴﻚ .. ﺧﻠﻴﻨﺎ ﻧﺒﺬﻝ ﻣﺠﻬﻮﺩ ﺍﻛﺒﺮ .. ﺷﺎﻥ ﻧﻌﺮﻑ ﺍﻟﺤﺎﺻﻞ ﺷﻨﻮ .. ﻧﻮﺭ ﺩﻱ ﺑﺘﺴﺘﺤﻖ ﺍﻧﻮ ﺍﻟﺰﻭﻝ ﻳﺨﺴﺮ ﻭﺭﺍﻫﺎ ﺍﻟﻐﺎﻟﻲ ﻭﺍﻟﻨﻔﻴﺲ .. ﻣﺤﻤﺪ ﻗﺎﻝ ﻟﻴﻬﻮ ﺍﻫﺎ ﻃﻴﺐ .. ﺍﻧﺖ ﻓﻜﺮﺗﻚ ﺷﻨﻮ؟

ﻗﺎﻝ ﻟﻴﻬﻮ ﺑﺲ ﻋﺎﻳﺰﻙ ﺗﻮﺻﻠﻨﻲ ﻟﻠﺮﺍﺟﻞ ﺳﻮﺍﻕ ﺍﻟﺘﻜﺴﻲ ﺍﻟﺸﺎﻝ ﻧﻮﺭ ﻣﻦ ﺍﻟﻤﻈﻠﺔ ﻭﻫﻲ ﻃﻔﻠﺔ ﻭﻭﺩﺍﻫﺎ ﻟﺪﺍﺭ ﺍﻻﻳﺘﺎﻡ . ﺩﻩ ﺯﺍﺍﺍﺍﺍﺗﻮ ..

ﻭﻧﺴﺎﻟﻪ ﺯﻳﺎﺩﺓ ﺍﺳﺌﻠﻪ ﺧﺼﻮﺻﺎ ﺗﺤﺪﻳﺪ ﺍﻟﻤﻈﻠﻪ ﺩﻩ ﺍﺣﺘﻤﺎﻝ ﻛﺒﻴﺮ ﻳﻔﻴﺪﻧﺎ . ﻗﺎﻝ ﻟﻴﻬﻮ ﻳﺎﻓﺨﺮﻱ ﻋﺎﻳﻦ ﺍﻟﻜﻼﻡ ﺩﻩ ﻣﺮ ﻋﻠﻴﻪ ﻛﻢ ﻣﻦ ﺍﻟﺴﻨﻴﻦ ..

ﻓﺨﺮﻱ ﻗﺎﻝ ﻟﻴﻪ ﺑﺲ ﺍﻧﺖ ﻭﺻﻠﻨﻲ ﺍﻟﺰﻭﻝ ﺑﺘﺎﻉ ﺍﻟﺘﻜﺴﻲ ..

ﻗﺎﻝ ﻟﻴﻬﻮ ﺟﺪﺍ ﺍﻟﺴﺒﺖ ﺍﻟﺼﺒﺎﺡ ﺗﺠﻴﻨﻲ ﻧﻤﺸﻲ ﻟﻴﻬﻮ ..

ﻭﻓﺨﺮﻱ ﻭﺩﻋﻬﻢ ﻭﻣﺸﻰ ﻟﺒﻴﺖ ﺧﺎﻟﺘﻮ ﺣﻜﻰ ﻟﻴﻬﺎ ﺍﻟﺤﺎﺻﻞ ..

ﺧﺎﻟﺘﻮ ﺩﻛﺘﻮﺭﺓ ﻓﺎﻃﻤﺔ .. ﺻﺎﺣﺒﺘﻮ ﺷﺪﻳﺪ ﻭﺑﻜﻠﻤﻬﺎ ﺑﺎﻱ ﺣﺎﺟﺔ .. ﻭﻫﻲ ﺍﻧﺴﺎﻧﺔ ﻭﺍﻋﻴﺔ

ﻗﺎﻟﺖ ﻟﻴﻬﻮ ﻳﺤﻠﻴﻼ ﻧﻮﺭ ﻭﺍﻟﻠﻪ ﻗﻄﻌﺖ ﻗﻠﺒﻲ .. ﺍﻧﺎ ﻧﻔﺴﻲ ﺍﻣﺸﻲ ﻟﻨﻮﺭ ﻓﻲ ﺍﻟﺒﻴﺖ ﻭﺍﺗﻮﻧﺲ ﻣﻌﺎﻫﺎ .. ﻭﺍﺣﺴﺴﻬﺎ ﺍﻧﻮ ﻓﻲ ﻧﺎﺱ ﻭﺍﻗﻔﻴﻦ ﻣﻌﺎﻫﺎ ..

ﻭﺍﻟﻠﻪ ﺍﻟﺒﺖ ﺩﻱ ﺑﺮﻳﺪﻫﺎ ﺭﻳﺪﻩ ﺳﺒﺤﺎﻥ ﺍﻟﻠﻪ .. ﻓﺨﺮﻱ ﻗﺎﻝ ﻟﻴﻬﺎ ﺍﻟﺼﺒﺮ ﻳﺎﺧﺎﻟﺘﻲ .. ﺡ ﺍﻭﺻﻠﻚ ﻟﻴﻬﺎ ..

ﻗﺎﻟﺖ ﻟﻴﻬﻮ ﺑﺲ ﺍﻧﺎ ﺍﻟﻤﺤﻴﺮﻧﻲ .. ﺍﻧﺖ ﻣﺎﺷﻲ ﺍﻟﻌﺴﻴﻼﺕ ﺗﺴﺄﻝ ﻣﻦ ﺯﻭﻝ ﻳﻮﺻﻒ ﻟﻴﻚ ﺍﻟﻤﻈﻠﺔ ..

ﻫﺐ ﺍﻧﻚ ﻋﺮﻓﺖ ﺍﻟﻤﻈﻠﺔ .. ﺣﺘﺮﺟﻊ ﺍﻟﺰﻣﻦ ﻋﺸﺮﻳﻦ ﺳﻨﺔ ﻟﻮﺭﺍ ﻋﺸﺎﻥ ﺗﺸﻮﻑ ﺍﻟﺒﺖ ﺍﻟﺨﺘﺎﻫﺎ ﻫﻨﺎ ﻣﻨﻮ؟

ﻗﺎﻝ ﻟﻴﻬﺎ ﺍﻧﺎ ﺑﺲ ﻣﺘﻮﻛﻞ ﻋﻠﻰ ﺍﻟﻠﻪ ﺍﻧﻲ ﺡ ﺃﻋﺮﻑ ﺭﺍﺱ ﺧﻴﺖ ﻓﻲ ﺍﻟﻤﻮﺿﻮﻉ

ﺍﻧﺎ ﻗﺎﻋﺪ ﺍﺣﺲ ﺍﻧﻮ ﻧﻮﺭ ﺩﻱ ﺡ ﺃﻟﻘﻰ ﻟﻴﻬﺎ ﻣﺨﺮﺝ ﻭﻓﺮﺝ ﺑﺎﺫﻥ ﺍﻟﻠﻪ ..

ﻭﺍﺣﺴﺎﺳﻲ ﺩﻩ ﻣﺴﻴﻄﺮ ﻋﻠﻲ ﺳﻴﻄﺮﺓ ﺷﺪﻳﺪﺓ

ﻻﺯﻡ ﺍﺳﻚ ﺍﻟﻤﻮﺿﻮﻉ ﺩﻩ ﻭﺍﻭﺻﻠﻮ ﺍﺧﺮﻭ .. ﻟﻮ ﻭﺻﻠﺖ ﻟﻬﺪﻓﻲ ﻭﻟﻘﻴﺖ ﻣﺮﺍﺩﻱ .. ﻳﺒﻘﻰ ﻛﻞ ﺗﻌﺒﻲ ﻭﺷﻘﺎﻱ ﺍﻟﻨﺴﺒﺔ ﻟﻲ ﻣﺘﻌﺔ ﻭﺫﻛﺮﻳﺎﺕ ﻃﻴﺒﺔ .. ﻭﻟﻮ ﻓﺸﻠﺖ ﻓﻲ ﻣﺴﻌﺎﻱ ﺑﻜﻮﻥ ﺭﺿﻴﺎﻥ ﻣﻦ ﺍﻟﻌﻤﻠﺘﻮ .. ﻭﻟﻮ ﻃﻠﻌﺖ ﻧﻮﺭ ﺍﻟﺸﻲ ﺍﻟﻨﺤﻦ ﺧﺎﻳﻔﻴﻦ ﻣﻨﻮ .. ﻧﺸﻮﻑ ﺑﻌﺪﻳﻦ ﺍﻟﺒﺤﺼﻞ ﺷﻨﻮ ..

ﺍﻟﺴﺒﺖ ﺟﺎ .. ﻭﻫﻮ ﻣﺸﻰ ﻟﻤﺤﻤﺪ ﻭﺭﻛﺒﻮ ﻭﻣﺸﻮ ﺍﻟﻌﺴﻴﻼﺕ .. ﻭﻟﻘﻮ ﺍﻟﺮﺍﺟﻞ ﺍﻟﻜﺒﻴﺮ ﺑﺘﺎﻉ ﺍﻟﺘﻜﺴﻲ ﻋﻴﺎﻥ .. ﻭﺣﺎﻭﻟﻮ ﻳﺘﻜﻠﻤﻮ ﻣﻌﺎﻫﻮ .. ﺑﺲ ﺍﻭﻻﺩ ﺍﻟﺮﺍﺟﻞ ﻣﻨﻌﻮﻫﻢ

ﻗﻌﺪﻭ ﻣﻌﺎﻫﻢ ﺷﻮﻳﺔ ﻋﺸﺎﻥ ﻳﺘﺤﺴﻦ .. ﺑﺲ ﺍﻟﺮﺍﺟﻞ ﺣﺎﻟﺘﻮ ﻣﺎﺷﺔ ﻣﺘﺄﺧﺮﺓ ..

ﻭﻛﻠﻤﺎ ﻫﻢ ﻗﺎﻋﺪﻳﻦ ﻓﺨﺮﻱ ﻳﻤﺴﻚ ﻭﺍﺣﺪ ﻭﺍﺣﺪ ﻓﻲ ﺍﻻﻭﻻﺩ .. ﻭﻳﺤﻨﺴﻮ ﻳﻘﻮﻝ ﻟﻴﻬﻮ ﺍﻟﻤﻌﻠﻮﻣﺔ ﺍﻟﻮﺣﻴﺪﺓ .. ﺍﻟﻨﺤﻦ ﺣﻨﺸﻴﻼ ﻣﻦ ﺍﺑﻮﻙ ﺩﻱ ﻣﺒﻨﻴﺔ ﻋﻠﻴﻬﺎ ﺣﻴﺎﺓ ﻛﺎﻣﻠﺔ ﻻﻧﺴﺎﻥ ﻣﺴﻠﻢ ..

ﺍﺻﻠﻮ ﺍﺑﻮ ﻳﺴﻤﻌﻮﺍ ﻛﻼﻣﻮ .. ﻭﻗﺎﻟﻮ ﻟﻴﻬﻮ ﺍﺑﻮﻧﺎ ﻣﻤﻨﻮﻉ ﻣﻦ ﺍﻟﻜﻼﻡ ..

ﻭﺣﺘﻰ ﻟﻮ ﺳﻤﺤﻨﺎ ﻟﻴﻚ ﺍﺗﻜﻠﻤﺘﺎ ﻣﻌﺎﻫﻮ .. ﻫﺴﻲ ﻫﻮ ﻣﺎﺑﻘﺪﺭ ﻳﺠﻤﻊ ﻋﺸﺎﻥ ﻳﺠﺎﻭﺑﻚ ﻋﻠﻰ ﺍﺳﺌﻠﺘﻚ ..

ﺍﻟﻤﻬﻢ ﻟﻐﺎﻳﺔ ﺍﻟﻌﺼﺮ ﻛﺪﺍ ﻗﻨﻌﻮ ﻣﻨﻬﻢ .. ﻭﺭﺟﻌﻮﺍ ﺑﺪﻭﻥ ﻣﺎﻳﻌﺮﻓﻮ ﻣﻌﻠﻮﻣﺔ ..

ﻭﻓﻲ ﺍﻟﺸﺎﺭﻉ ﻣﺤﻤﺪ ﻗﺎﻝ ﻟﻲ ﻓﺨﺮﻱ .. ﻳﺎﻓﺨﺮﻱ ﻧﺤﻦ ﻫﺴﻲ ﺿﻴﻌﻨﺎ ﺍﻟﻴﻮﻡ ﺩﻩ ﺑﺪﻭﻥ ﻓﺎﺋﺪﺓ ..

ﻭﺍﻟﻠﻪ ﺍﻧﺎ ﻛﻞ ﻣﺮﺓ ﺑﻘﻮﻝ ﻓﺨﺮﻱ ﺩﻩ ﺍﻟﻤﻈﻠﺔ ﺩﺍﻳﺮ ﺑﻴﻬﺎ ﺷﻨﻮ؟

ﻗﺎﻝ ﻟﻴﻬﻮ ﻳﺎﻣﺤﻤﺪ ﺍﻧﺎ ﻋﺎﻣﻞ ﺯﻱ ﺍﻟﻐﺮﻳﻖ ﺍﻟﺒﺘﻌﻠﻖ ﺑﻲ ﻗﺸﺔ ..

ﻟﻜﻦ ﺍﻫﻮ ﺭﺑﻨﺎ ﻣﺎﻗﺴﻢ ﻟﻲ ﺍﻟﻘﻰ ﺍﻟﻤﻌﻠﻮﻣﺔ ﺍﻋﻤﻞ ﺷﻨﻮ؟

ﻓﺨﺮﻱ ﻣﺸﻰ ﻗﺎﻋﺪ ﺗﻼﺗﺔ ﺍﻳﺎﻡ ﻣﻬﻤﻮﻡ ﻭﻣﻐﻤﻮﻡ .. ﻭﻓﻲ ﺍﻟﻴﻮﻡ ﺍﻟﺘﺎﻟﺖ ﻗﺎﻡ ﻣﺸﻰ ﻟﻲ ﺑﻴﺖ ﻧﺎﺱ ﻧﻮﺭ ..

ﻻﻧﻮ ﺣﺲ ﺍﻧﻮ ﻗﻠﺒﻮ ﺣﺮﻗﺎﻥ ﻣﻦ ﺷﻮﻗﻬﺎ .. ﻭﻧﻔﺴﻮ ﺑﺲ ﺣﺘﻰ ﻟﻮ ﻣﺎ ﺷﺎﻓﻬﺎ ..

ﻳﻜﻮﻥ ﻗﺎﻋﺪ ﻓﻲ ﺣﺘﺔ ﻭﻳﺤﺲ ﺑﺎﻧﻬﺎ ﻫﻲ ﻗﺮﺑﺔ ﻣﻨﻮ ...

ﻭﺻﻞ ﺑﻴﺖ ﻧﺎﺱ ﻧﻮﺭ .. ﻭﻟﻘﻰ ﻣﺤﻤﺪ ﻗﺎﻋﺪ .. ﻭﻣﺤﻤﺪ ﺍﻛﺮﻣﻮ ﻭﺍﺗﻮﻧﺲ ﻣﻌﺎﻫﻮ ﻭﺟﺎﺕ ﻛﻮﺛﺮ ﺳﺄﻟﺘﻮ ﻣﻦ ﺍﻟﻌﻤﻠﻴﺔ ﺍﻟﺠﻨﻮﻧﻴﺔ ﺑﺘﺎﻋﺔ ﻣﺸﻴﺔ ﺍﻟﻌﺴﻴﻼﺕ ﺩﻱ .. ﻫﺪﻓﻮ ﻣﻨﻬﺎ ﺷﻨﻮ؟

ﻗﺎﻝ ﻟﻴﻬﺎ ﻭﺍﻟﻠﻪ ﺍﻫﻮ ﻳﺎﺧﺎﻟﺘﻲ ﺍﻟﻮﺍﺣﺪ ﺑﺤﺎﻭﻝ ﻳﻠﻘﻰ ﺍﻣﻞ .. ﻋﻠﻴﻚ ﺍﻟﻠﻪ ﻧﻮﺭ ﻛﻴﻔﻨﻬﺎ ..

ﻗﺎﻟﺖ ﻟﻴﻬﻮ ﻧﻮﺭ ﻣﺪﻋﻮﻭﻭﻭﻭﻭﻛﻪ ﻓﻲ ﺍﻟﻘﺮﺍﻳﺔ ..

ﻗﺎﻟﺖ ﻟﻴﻬﻮ ﺩﻗﻴﻘﺔ ﺍﻧﺎﺩﻳﻬﺎ ﺗﺴﻠﻢ ﻋﻠﻴﻚ .. ﻭﻣﺸﺖ ﺩﺧﻠﺖ ﻋﻠﻴﻬﺎ ﻓﻲ ﻏﺮﻓﺘﻬﺎ .. ﻗﺎﻟﺖ ﻟﻴﻬﺎ ﻳﺎﻧﻮﺭ ﻓﺨﺮﻱ ﺟﺎ .. ﻣﺎﺟﺎﻳﺔ ﺗﺴﻠﻤﻲ ﻋﻠﻴﻬﻮ؟ .

ﻗﺎﻟﺖ ﻟﻴﻬﺎ ﻣﺎﺑﻘﺪﺭ ﻳﺎ ﻣﺎﻣﺎ ﺣﺒﻴﺒﺘﻲ ..

ﺑﺼﺮﺍﺣﺔ .. ﺍﻟﺰﻭﻝ ﺩﻩ ﻟﻮ ﺷﻔﺘﻮ ﺑﺮﺗﺒﻚ .. ﺗﺎﻧﻲ ﻟﻲ ﺑﻜﺮﺓ ﻣﺎﺑﻘﺪﺭ ﺍﻗﺮﺍ ..

ﺍﻣﺸﻲ ﻟﻴﻬﻮ ﺑﻠﻐﻴﻬﻮ ﺳﻼﻣﻲ ﺍﻟﻠﻪ ﻳﺨﻠﻴﻚ .. ﺑﻌﺪ ﺍﻣﻬﺎ ﻃﻠﻌﺖ ﻧﻮﺭ .

ﺩﻣﻮﻋﻬﺎ ﻋﺎﻭﺩﺕ ﺍﻟﺬﻓﻖ ﻭﺍﻻﻧﺴﻜﺎﺏ ..

ﻳﺎ ﺍﻟﻠﻪ .. ﻋﻠﻲ ﺍﻟﺤﺐ ﺍﻟﻌﻈﻴﻢ ﺍﻟﻨﻘﻲ .. ﺣﻴﻨﻤﺎ ﻳﻜﻮﻥ ﻣﻘﻴﺪﺍ " ﻭﻣﻨﻜﺴﺮﺍ " ..

ﻭﻣﺤﻜﻮﻡ ﻋﻠﻴﻬﻮ ﺑﺎﻻﻋﺪﺍﻡ .. ﻭﻓﺎﻗﺪ ﺍﻻﻣﻞ .. ﻣﺸﺘﺖ ﻭﻳﺘﻴﻢ ..

ﻛﻞ ﺍﻟﻨﺎﺱ ﺑﺘﺤﺐ ﻭﺗﻌﻴﺶ ﻓﻲ ﺍﻟﺤﺐ .. ﺑﻲ ﻫﺪﻑ ﺍﻟﻠﻘﺎﺀ ﺍﻟﻤﻘﺪﺱ .. ﻭﺭﺑﺎﻁ ﺍﻟﺰﻭﺍﺝ ﻭﺍﻟﻔﺮﺡ

ﺍﻻ ﻧﻮﺭ .. ﻧﻮﺭ ﺣﺎﺳﻪ ﺑﻲ ﻓﺨﺮﻱ ﺣﺐ ﺣﻴﺎﺗﻬﺎ ﻗﺮﻳﺐ ﻣﻨﻬﺎ .. ﻭﺣﺎﺳﻪ ﺑﻲ ﺭﻭﺣﻮ ﺗﺤﺘﻮﻱ ﺍﻟﻤﻜﺎﻥ .. ﻭﺗﻨﻬﺎﻝ ﻋﻠﻰ ﺍﻻﺟﻮﺍﺀ ﻋﻄﺮﺍ " ﻭﺃﻣﻨﺎ " ..

ﻭﻫﻮ ﺑﺤﺒﻬﺎ .. ﻭﻫﻲ ﺑﺘﺤﺒﻮ .. ﻭﺍﻫﻠﻬﺎ ﺑﺤﺒﻮﻫﻮ .. ﻭﺍﻫﻠﻮ ﺑﺤﺒﻮﻫﺎ ﻭﻣﻮﺍﻓﻘﻴﻦ ﻋﻠﻴﻬﺎ ..

ﻟﻜﻦ ﺍﻟﺴﺒﺐ ﺍﻟﻘﺎﺗﻞ ﺍﻟﻮﺍﻗﻒ ﻓﻲ ﻃﺮﻳﻘﻬﺎ .. ﻣﺎﻋﻨﺪﻫﺎ ﻓﻴﻬﻮ ﻳﺪ ..

ﻳﺎﺗﺮﻯ ‏( ﻣﻦ ﺍﻟﻤﺴﺆﻝ .. ﻣﻦ ﺍﻟﻤﺴﺆﻭﻝ ‏)

..

ﻛﻮﺛﺮ ﻣﺸﺖ ﻟﻲ ﻓﺨﺮﻱ ﺑﻲ ﻏﺎﺩﻱ .. ﻭ ﺑﻠﻐﺘﻪ ﺍﻟﺴﻼﻡ ﻣﻦ ﻧﻮﺭ .. ﻭﻓﻬﻢ ﺍﻧﻮ ﻣﺎ ﺣﻴﻘﺪﺭ ﻳﺸﻮﻓﻬﺎ .. ﻭﻻﻳﺴﻤﻊ ﺻﻮﺗﻬﺎ ﺣﺘﻰ .. ﻭﻫﻮ ﻛﺎﻥ ﻣﺘﻤﻨﻲ ﺍﻧﻮ ﻧﻮﺭ ﺗﺠﻲ ﺗﺴﻠﻢ ﻋﻠﻴﻬﻮ .. ﻣﻦ ﺑﻌﻴﺪ ﺑﺲ .. ﻣﺠﺮﺩ ﺳﻼﻡ .. ﻣﺠﺮﺩ ﺳﻼﻡ ..

ﺍﻟﻤﻬﻢ ﺑﻌﺪ ﻃﻠﻊ ﻣﻨﻬﻢ ﻣﻜﺴﻮﺭ ﺍﻟﺨﺎﻃﺮ .. ﻣﺘﻴﻢ ﺍﻟﻔﺆﺍﺩ .. ﺑﺲ ﺍﺻﺮ ﺍﺻﺮﺍﺭ ﺷﺪﻳﺪ ﺍﻧﻮ ﻳﻤﺸﻲ ﺍﻟﻌﺴﻴﻼﺕ ﺗﺎﻧﻲ ﻣﺮﺓ ..

ﻟﻮ ﻟﻘﻰ ﺍﻟﺮﺍﺟﻞ ﺣﻲ ﻳﺴﺄﻟﻪ ﻭﻣﺎﻳﺠﻲ ﺍﻻ ﻳﺠﻲ ﺑﻨﺘﻴﺠﺔ ..

ﻭﻟﻮ ﻟﻘﺎﻫﻮ ﺍﻧﺘﻘﻞ ﻳﻌﺰﻱ ﺍﻻﻭﻻﺩ ..

ﻭﻣﺸﻰ ﻓﺨﺮﻱ ﻟﻠﻌﺴﻴﻼﺕ .. ﺑﺪﻭﻥ ﻣﺎﻳﻜﻠﻢ ﻣﺤﻤﺪ ﻭﻻﻓﻲ ﺯﻭﻝ ﻋﺎﺭﻑ ﺍﻟﻤﺸﻮﺍﺭ ﺩﻩ .. ﺍﻫﺎ ﻭﺻﻞ ﻭﻟﻘﻰ ﺍﻟﺮﺍﺟﻞ ﺍﻟﺘﻜﺎﺳﻲ ﺻﺤﺼﺢ ﻭﺑﻘﻰ ﺯﻱ ﺍﻟﻔﻞ ...

ﻭﻗﺎﻝ ﻟﻲ ﻓﺨﺮﻱ . ﺍﻟﺠﻤﺎﻋﺔ ﻗﺎﻟﻮ .. ﺍﻧﺖ ﺟﻴﺘﻨﻲ ﻫﻨﺎ ..

ﻭﻋﺎﻳﺰ ﺗﺴﺄﻝ ﻋﻦ ﺣﺎﺟﺔ .. ﻗﺎﻝ ﻟﻴﻬﻮ ﻧﻌﻢ ﻳﺎﻋﻤﻲ .. ﺍﻧﺖ ﺑﺘﺬﻛﺮ ﺍﻟﻄﻔﻠﺔ ﺍﻟﻘﻴﺘﻬﺎ .. ﻓﻲ ﺍﻟﺼﺒﺔ ﺑﺘﺎﻋﺔ ﺍﻟﻤﻈﻠﺔ .. ﻭﻭﺩﻳﺘﻬﺎ ﺩﺍﺭ ﺍﻻﻳﺘﺎﻡ ..

ﻗﺎﻝ ﻟﻴﻬﻮ ﺍﻱ ﺑﺘﺬﻛﺮﻫﺎ ..

ﻗﺎﻝ ﻟﻴﻬﻮ ﺍﻟﻤﻈﻠﺔ ﻓﻲ ﻳﺎﺗﻮ ﻣﺤﻄﺔ ﺍﻟﻤﻈﻠﺔ ﻳﺎﺗﻬﺎ ﺗﺤﺪﻳﺪﺍ " ﻛﺪﺍ ؟؟؟

ﻗﺎﻝ ﻟﻴﻬﻮ ﺍﻟﻤﻈﻠﺔ ﻓﻲ ﻣﺤﻄﺔ 12 .. ﻛﺎﻥ ﻣﻜﺘﻮﺏ ﻋﻠﻴﻬﺎ . ﻭﻗﻒ ﻟﺮﻭﺡ ﺍﻟﺤﺠﻪ ‏( ﻓﻼﻧﺔ ﺍﻟﻔﺮﺗﻜﺎﻧﻴﺔ ‏) .. ﻳﺎﺧﻲ ﻓﺨﺮﻱ ﺩﻩ ﻓﺮﺡ ﻓﺮﺣﺔ ﺍﻟﺘﻘﻮﻝ ﻋﺮﺳﻮ ﻟﻴﻬﻮ ﻧﻮﺭ .

ﺍﻟﻨﺸﻮﻑ ﺍﻟﺰﻭﻝ ﺩﻩ ﻓﻬﻤﻮ ﺷﻨﻮ . ؟

ﺍﻟﻰ ﺍﻟﻠﻘﺎﺀ 

ﺍﻟﻤﺴﻮﻟﻴﺔ

ﺍﻟﺤﻠﻘﺔ 25

ﺑﻘﻠﻢ ﻃﺎﺭﻕ ﺍﻟﻠﺒﻴﺐ

ﻓﺨﺮﻱ ﺍﻟﺤﺒﻴﺐ ﺍﻟﻠﻪ ﻳﻌﻴﻨﻮ ﻓﻲ ﻣﺴﻌﺎﻫﻮ .. ﺟﺎﺀ ﺭﺍﺟﻊ ﻣﻦ ﺍﻟﻌﺴﻴﻼﺕ ﻓﺮﺣﺎﻥ ..

ﺍﻭﻝ ﺷﻲ ﻣﺸﻰ ﺑﺸﺸﺮ ﺧﺎﻟﺘﻮ .. ﻭﻗﺎﻝ ﻟﻴﻬﺎ ﻋﺮﻓﺖ ﺍﻟﻤﻈﻠﺔ .. ﺩﻛﺘﻮﺭﺓ ﻓﺎﻃﻤﺔ ﻗﻌﺪﺕ ﺗﻀﺤﻚ .. ﻗﺎﻟﺖ ﻟﻴﻬﻮ . ﺍﻟﺒﺸﻮﻑ ﻓﺮﺣﺘﻚ ﻳﻘﻮﻝ ﻋﺮﻓﺖ ﺍﻫﻞ ﻧﻮﺭ ﻫﻬﻬﻪ .

ﺍﻟﻤﻬﻢ ﻋﺪﺍ ﺍﻟﻴﻮﻡ ﺩﺍﻙ ﻣﻘﻠﻘﻞ .. ﻻﻧﻮ ﻭﺻﻞ ﺍﻟﺒﻴﺖ ﺯﻱ ﺍﻟﺴﺎﻋﺔ ﺗﻼﺗﺔ ﻛﺪﺍ .. ﻭﺍﻟﻮﻛﺖ ﻣﺎ ﺑﻤﻬﻠﻮ ﻳﺴﻮﻱ ﺷﻲ ..

ﻭﺑﺎﻛﺮ ﻣﻦ ﺍﻟﺼﺒﺎﺡ .. ﻗﺎﻝ ﻟﻴﻬﺎ ﻳﺎﺧﺎﻟﺘﻲ ﺍﻧﺎ ﻣﺎﺷﻲ ﺍﺳﺤﺐ ﻟﻲ ﻗﺮﻭﺵ ﻣﻦ ﺍﻟﺒﻨﻚ .. ﻭﺡ ﺍﻧﻘﻄﻊ ﻣﻨﻜﻢ ﺷﻬﺮ .. ﻗﺎﻟﺖ ﻟﻴﻬﻮ ﻣﺎﺷﻲ ﻭﻳﻦ ﺁﺍﻟﺒﺨﻴﺖ ؟ ..

ﻗﺎﻝ ﻟﻴﻬﺎ ﺑﻴﻨﺎ ﺍﻟﺘﻠﻔﻮﻥ .. ﻭﺍﻧﺎ ﺑﻮﺍﻓﻴﻚ ﺑﻜﻞ ﻛﺒﻴﺮﺓ ﻭﺻﻐﻴﺮﺓ ﺗﺤﺼﻞ ﻣﻌﺎﻱ .. ﺑﺲ ﺩﻋﻮﺍﺗﻚ .. ﻭﻟﻤﻪ ﻫﺪﻭﻣﻮ ﻓﻲ ﺷﻨﻄﺔ ﻭﻓﺎﺕ ..

ﻭﺧﺎﻟﺘﻮ ﺗﺼﻔﻖ ﻓﻲ ﺍﻳﺪﻳﻬﺎ .. ﻗﺎﻟﺖ ﺍﻟﻮﻟﺪ ﺩﻩ ﺍﻛﻴﺪ .. ﻓﻮﺕ ﻭﻓﻘﺪ ﺍﻟﺘﺮﻛﻴﺰ .

ﻓﺨﺮﻱ ﻣﺸﻰ ﻟﻲ ‏( .......... ‏) ﺍﻟﻠﻬﻲ ﺍﻟﻤﻨﻄﻘﺔ ﺍﻟﻤﻘﺼﻮﺩﻩ .. _ ﺑﺮﺿﻮ ﻣﺎﺩﺍﻳﺮﻳﻦ ﻧﺠﻴﺐ ﺍﺳﻤﻬﺎ ﻣﺮﺍﻋﺎﺓ ﻟﺴﻜﺎﻧﻬﺎ ﻣﻦ ﺍﻟﻘﺮﺍﺀ . _

ﺍﻟﻤﻬﻢ ﻭﻛﺖ ﻭﺻﻞ ﻭﻋﺎﻳﻦ . ﺷﺎﻑ ﺍﻟﻤﻈﻠﺔ ﻓﻲ ﻣﺤﻄﺔ 12 ﻭﻫﻮ ﺭﺍﻛﺐ ﻓﻲ ﺍﻟﺤﺎﻓﻠﺔ ..

ﺩﻗﺔ ﺃﺷﺮ ﻟﻠﻜﻤﺴﺎﺭﻱ ﻭﻭﻗﻒ .. ﻣﺸﻰ ﻗﻌﺪ ﻓﻲ ﺍﻟﻤﻈﻠﺔ .. ﺍﻟﻤﻈﻠﺔ ﺻﺒﺘﻬﺎ ﻣﺸﻘﻘﺔ ﻭﺍﻻﺳﻤﻨﺘﻲ ﺑﺪﺍ ﻳﻘﻮﻡ ﻗﺤﻮﻑ ﻗﺤﻮﻑ ..

ﻭﺍﻟﺮﻛﺎﻳﺰ ﺑﺘﺎﻋﺘﻬﺎ ﺧﻼﺱ ﺍﺗﺄﺳﻔﻦ ﻣﻦ ﺍﻟﺰﻣﻦ ..

ﻗﻌﺪ ﻓﻮﻕ ﺍﻟﺼﺒﺔ ﻣﺤﻞ ﺑﻘﻌﺪﻭ ﺍﻟﻨﺎﺱ .. ﺍﻟﻤﻨﺘﻈﺮﻳﻦ ﻭﺑﻘﻰ ﻳﻬﺒﺶ ﻓﻲ ﺍﻟﺼﺒﺔ ﺑﻲ ﻳﺪﻭ ﻛﺪﺍ ﻭﻳﻤﺴﺢ ﻓﻴﻬﺎ .. ‏( ﺳﺒﺤﺎﻥ ﺍﻟﻠﻪ ﻳﻌﻨﻲ ﻧﻮﺭ ﺧﺘﻮﻫﺎ ﻫﻨﺎ ﻭﻓﺎﺗﻮ ﻣﻨﻬﺎ . ؟؟ ‏)

ﺍﺧﺪ ﻗﻌﺪﺗﻮ ﻭﻗﺎﻡ .. ﻣﺸﻰ ﻟﻲ ﺍﻭﻝ ﺑﺘﺎﻉ ﺑﻘﺎﻟﺔ ﻓﺎﺗﺢ ﻋﻠﻲ ﺍﻟﻤﻈﻠﺔ ﺟﺎﺀﻫﻮ ﺳﻠﻢ ﻋﻠﻴﻌﻮ ..

ﻭﻗﺎﻝ ﻟﻴﻬﻮ ﻟﻮ ﺳﻤﺤﺖ ﺍﻧﺎ ﻋﺎﻳﺰ ﻟﻲ ﻧﺺ ﺑﻴﺖ ﻟﻼﻳﺠﺎﺭ ﻟﻤﺪﺓ ﺷﻬﺮ . ﺑﺲ ﻓﻲ ﺍﻟﺤﺘﺔ ﺩﻱ . ﺍﻫﻢ ﺣﺎﺟﺔ ﻳﻜﻮﻥ ﻓﻲ ﺍﻟﺤﺘﺔ ﺩﻱ .

ﻗﺎﻝ ﻟﻴﻬﻮ ﺍﻧﺖ ﻣﻌﺎﻙ ﻣﻨﻮ؟ ﻗﺎﻝ ﻟﻴﻬﻮ ﺍﻧﺎ ﺑﺮﺍﺍﺍﺍﺍﺍﺍﺍﻱ ..

ﺑﺘﺎﻉ ﺍﻟﺒﻘﺎﻟﺔ ﻗﺎﻝ ﻟﻴﻬﻮ ﻭﻳﻨﻮ ﻋﻔﺸﻚ؟ .. ﻗﺎﻟﻴﻬﻮ ﻣﺎﻋﻨﺪﻱ ﺑﺲ ﺷﻨﻄﺘﻲ .. ﺩﻱ ﻓﻴﻬﺎ ﻏﻴﺎﺭ .. ﻭﻣﻤﻜﻦ ﺍﺷﺘﺮﻱ ﻟﻲ ﺳﺮﻳﺮ ﻭﻟﺤﺎﻑ ﻭﻣﻼﻳﻪ ﺗﺎﻧﻲ ﻓﻲ ﺷﻨﻮ ؟

ﻗﺎﻝ ﻟﻴﻬﻮ ﺍﻗﻌﺪ ﺩﻗﻴﻘﺔ .. ﻗﻌﺪ ﻗﺪﺍﻡ ﺍﻟﺒﻘﺎﻟﺔ ﻓﻲ ﺍﻟﻜﺮﺳﻲ ..

ﺑﺘﺎﻉ ﺍﻟﺒﻘﺎﻟﺔ ﺍﺳﻤﻮ ﻋﺒﺪ ﺍﻟﻌﺰﻳﺰ .. ﻣﻦ ﻧﺎﺱ ﺍﻟﻨﻴﻞ ﺍﻻﺑﻴﺾ ﻭﺯﻭﻝ ﺍﺧﻮ ﺍﺧﻮﺍﻥ ..

ﺑﻌﺪ ﺧﻠﺺ ﺍﻟﺰﺑﺎﻳﻦ ﺟﺎﻫﻮ ﻗﻌﺪ ﻣﻌﺎﻫﻮ ﻭﺍﺗﻌﺮﻑ ﻋﻠﻴﻬﻮ ﻭﻋﺮﻑ ﺍﺳﻤﻮ .. ﻭﻗﺎﻝ ﻟﻴﻬﻮ ﺍﻧﺖ ﺷﻐﻠﻚ ﺷﻨﻮ ؟ ﻗﺎﻝ ﻟﻴﻬﻮ ﺍﻧﺎ ﺷﻐﻠﻲ ﺳﺮﻱ ﺷﻮﻳﺔ ﺍﺫﺍ ﺑﺘﻜﺘﻢ ﺍﻟﺴﺮ . ﺑﻮﺭﻳﻚ ﻟﻘﺪﺍﻡ ..

ﻗﺎﻝ ﻟﻴﻬﻮ ﻳﺎ ﻓﺨﺮﻱ .. ﺍﻧﺎ ﺳﺎﻛﻦ ﺑﺮﺍﻱ ﻓﻲ ﻧﺺ ﺑﻴﺖ .. ﻣﻤﻜﻦ ﺗﺴﻜﻦ ﻣﻌﺎﻱ ..

ﻭﺗﺪﻓﻊ ﻟﻲ ﻧﺺ ﺍﻻﻳﺠﺎﺭ .. ﺍﺻﻼ ﻫﻮ ﺷﻬﺮ ﺻﺎﺡ؟ ﻗﺎﻝ ﻟﻴﻬﻮ ﻭﺍﺣﺘﻤﺎﻝ ﺍﻗﻞ ﻣﻦ ﺷﻬﺮ ..

ﺍﻟﻤﻬﻢ ﻓﺨﺮﻱ ﺳﻜﻦ ﻣﻊ ﻋﺒﺪ ﺍﻟﻌﺰﻳﺰﺑﺘﺎﻉ ﺍﻟﺒﻘﺎﻟﺔ ﻓﯽ ﺑﯿﺘﻮ ﻭﺑﻘﻮ ﺍﺻﺤﺎﺏ ..

ﻓﺨﺮﻱ ﺣﺎﻭﻝ ﻳﻮﻫﻢ ﻋﺒﺪ ﺍﻟﻌﺰﻳﺰ ﺍﻧﻮ ﺷﻐﺎﻝ ﻓﻲ ﺍﻟﻤﺒﺎﺣﺚ ﻭﺑﺤﻘﻖ ﻓﻲ ﻗﻀﻴﺔ .. ﻓﺨﺮﻱ ﻫﺪﻓﻮ ﺷﻨﻮ ﻣﻦ ﺍﻟﻤﻮﺿﻮﻉ ﺩﻩ ؟ﺍﻟﻠﻪ ﺍﻋﻠﻢ ..

ﺑﺪﺍ ﻳﻮﻫﻤﻮ ﻛﻴﻒ ؟ ﻓﺨﺮﻱ ﺑﺎﻟﻠﻴﻞ ﺑﺘﻜﻠﻢ ﻓﻲ ﺍﻟﻠﻔﻮﻥ ﻣﻜﺎﻟﻤﺎﺕ ﻋﺠﻴﺒﺔ ..

ﺍﻟﻤﺘﻬﻢ .. ﻭﺍﻟﻜﻴﺲ ﺍﻟﻔﻼﻧﻲ .. ﻭﺍﻟﻘﻀﻴﺔ .. ﻭﺍﻟﺘﺤﺮﻳﺎﺕ .. ﻭﺣﺎﺟﺎﺕ ﻛﺪﺍ ﺑﺘﻜﻠﻢ ﺑﺮﺍﺣﺔ ﻭﺩﺍﻙ ﺳﺎﻣﻌﻮ ..

ﻭﻛﻠﻬﺎ ﻣﻜﺎﻟﻤﺎﺕ ﻭﻫﻤﻴﺔ ﺳﺎﻱ .. ﺍﻟﻤﻬﻢ ﻋﺒﺪ ﺍﻟﻌﺰﻳﺰ ﺍﺗﺎﻛﺪ ﺍﻧﻮ ﺍﻟﺰﻭﻝ ﺩﻩ ﺷﻐﺎﻝ ﻓﻲ ﺍﻟﻤﺒﺎﺣﺚ .. ﻭﺗﺎﻧﻲ ﻣﺎﺳﺎﻟﻮ ﻣﻦ ﺷﻐﻠﻮ

ﻛﻤﺎﻥ ﻣﺮﺍﺕ ﺑﻨﺎﺩﻳﻬﻮ ﻳﻘﻮﻝ ﻟﻴﻬﻮ ﻳﺎﺟﻨﺎﺑﻮ ﻫﻬﻪ ..

ﻭﺷﻮﻳﺔ ﺷﻮﻳﺔ ﺧﺶ ﻓﻲ ﺍﻭﻻﺩ ﺍﻟﺤﻠﺔ .. ﻛﻞ ﻣﺎﻳﻠﻘﺎ ﻟﻴﻬﻮ ﺷﻠﺔ ﻗﺎﻋﺪﺓ ﻓﻲ ﺭﻛﻦ .. ﻳﺠﻲ ﻳﻘﻌﺪ ﻣﻌﺎﻫﻢ ﻭﻳﻌﺰﻣﻬﻢ ﻋﺸﺎﺀ .. ﻭﻓﻲ ﺍﺳﺒﻮﻉ ﺑﻘﻰ ﻣﺸﻬﻮﺭ ﺑﺎﻧﻮ ﺯﻭﻝ ﻛﻠﺲ ﻭﺃﺻﻠﻲ ..

ﻭﺑﻴﻤﻜﺎﻟﻤﺔ ﻭﻫﻤﻴﺔ ﻭﺍﺣﺪﺓ .. ﻛﻞ ﺍﻟﺸﺒﺎﺏ ﺣﺴﻮ ﺍﻧﻮ ﺍﻟﺰﻭﻝ ﺩﻩ ﻣﺒﺎﺣﺚ ..

ﻭﻃﻠﻘﻮ ﺍﻟﺨﺒﺮ ﻓﻲ ﺍﻟﺤﻠﺔ .. ﻭﺩﻱ ﺍﻟﺤﺎﺟﺔ ﺍﻟﻜﺎﻥ ﺩﺍﻳﺮﻫﺎ ﻫﻮ .. ﻳﺎﺭﺑﻲ ﻫﺪﻓﻮ ﺷﻨﻮ ﻧﺼﺒﺮ ..

ﺍﻫﺎ ﻳﻮﻡ ﺑﺴﺄﻝ ﻓﻲ ﻋﺒﺪ ﺍﻟﻌﺰﻳﺰ .. ﻗﺎﻝ ﻟﻴﻬﻮ ﻋﺒﺪ ﺍﺍﻟﻌﺰﻳﺰ .. ﺍﻟﺒﻘﺎﻟﺔ ﺩﻱ ﻓﺎﺗﺤﺔ ﻫﻨﺎ ﻟﻴﻬﺎ ﻛﻢ ؟

ﻗﺎﻝ ﻟﻴﻬﻮ ﻟﻴﻬﺎ ﺍﻛﺘﺮ ﻣﻦ ﺗﻼﺗﻴﻦ ﺳﻨﺔ ..

ﻭﻛﺎﻥ ﻗﺒﺎﻟﻲ ﺷﻐﺎﻝ ﻓﻴﻬﺎ ﻋﻤﻚ ﻣﺤﻤﻮﺩ .. ﻫﺴﻲ ﻣﺆﺫﻥ ﻓﻲ ﺍﻟﻤﺴﺠﺪ ﺍﻟﻘﺪﺍﻡ ﺩﻩ ..

ﻣﺤﻤﻮﺩ ﺩﻩ ﻛﺎﻥ ﺷﻐﺎﻝ ﻓﻲ ﺍﻟﺒﻘﺎﻟﺔ ﺩﻱ ﻣﻦ ﻓﺘﺤﻮﻫﺎ ..

ﻗﺎﻝ ﻟﻴﻬﺎ ﻭ ﻃﻴﺐ ﻭﺍﻧﺖ ﻳﺎﻋﺒﺪ ﺍﻟﻌﺰﻳﺰ ﻣﺴﻜﺘﻬﺎ ﻣﻦ ﻣﺘﻴﻦ ؟

ﻗﺎﻝ ﻟﻴﻬﻮ ﻳﻤﻜﻦ ﺳﺒﻊ ﺳﻨﻮﺍﺕ ﻛﺪﺍ ..

ﻓﺨﺮﻱ ﻃﻮﺍﻟﻲ ﺑﻘﻰ ﻳﻤﺸﻲ ﺍﻟﺼﻠﻮﺍﺕ ﺍﻟﺨﻤﺲ ﻓﻲ ﺍﻟﻤﺴﺠﺪ ﺍﻟﻘﺪﺍﻡ .. ﻭﺻﺎﺣﺐ ﺍﻟﻤﺆﺫﻥ ﻭﻟﻘﺎﻫﻮ ﺭﺟﻞ ﻓﺎﺿﻞ ..

ﻗﺎﻡ ﻳﻮﻡ ﺳﺄﻟﻪ ﻗﺎﻟﻴﻬﻮ ﻳﺎﻋﻢ ﻣﺤﻤﻮﺩ .. ﺣﺼﻞ ﺳﻤﻌﺖ ﻭﺍﻧﺖ ﻓﻲ ﺍﻟﺒﻘﺎﻟﺔ ﺩﻱ .. ﻋﻦ ﻭﺍﺣﺪﺓ ﺣﻤﻠﺖ ﺑﺎﻟﺤﺮﺍﻡ؟

ﺣﺎﺝ ﻣﺤﻤﻮﺩ ﻗﺎﻝ ﻟﻴﻬﻮ .. ﺍﻋﻮﺫ ﺑﺎﻟﻠﻪ .. ﺩﻩ ﻛﻼﻡ ﺷﻨﻮ ﺍﻟﺒﺘﻘﻮﻝ ﻓﻴﻬﻮ ﺩﻩ ﻳﺎﻭﻟﺪﻱ ..

ﻗﺎﻡ ﻓﺨﺮﻱ ﻗﺎﻝ ﻟﻴﻬﻮ ﺍﻧﺖ ﺭﺍﺟﻞ ﺻﺎﻟﺢ .. ﺍﻧﺎ ﻛﺎﻥ ﺣﻜﻴﺖ ﻟﻴﻚ ﻣﺸﻜﻠﺘﻲ ﺑﺘﺴﺎﻋﺪﻧﻲ ؟

ﻗﺎﻝ ﻟﻴﻬﻮ ﻗﻮﻝ .. ﻭﺍﻟﻌﻮﻥ ﻣﻦ ﺍﻟﻠﻪ .. ﺣﻜﺎ ﻟﻴﻬﻮ ﻛﺮﺭﺭﺭﺭﺭ ﻣﻦ ﻃﻖ ﻃﻖ ﻟﻠﺴﻼﻡ ﻋﻠﻴﻜﻢ ..

ﺣﺎﺝ ﻣﺤﻤﻮﺩ ﻗﺎﻝ ﻟﻴﻬﻮ ﺷﻮﻑ ﻳﺎ ﺍﺑﻨﻲ ﻭﺩﻩ ﺑﺮﺿﻮ ﻛﻼﻡ ﺳﺮ .. ﺍﻧﺎ ﻓﻲ ﻓﺘﺮﺗﻲ ﺍﻟﻘﺎﻋﺪﻫﺎ ﺳﻤﻌﺖ ﺑﻲ ﺗﻼﺕ ﺣﺎﻻﺕ ﺯﻱ ﺩﻱ .. ﻟﻜﻦ ﻭﺍﻟﻠﻪ ﻣﺎﺑﺘﺬﻛﺮ ﺍﻟﺴﻨﻮﺍﺕ ﺑﺎﻟﻀﺒﻂ .. ﻭﻣﺎﻋﺎﺭﻓﺎﻟﺒﻨﺎﺕ ﺍﻟﺤﺼﻞ ﻟﻴﻬﻢ ﻛﺪﺍ .. ﺍﻟﻤﻮﺕ ﺣﺎﺭ ﻳﺎﻭﻟﺪﻱ .. ﻟﻜﻦ ﻟﻴﻚ ﻋﻠﻲ ﺑﺴﺎﻋﺪﻙ ﻣﺎﺩﺍﻡ ﺳﻌﻴﻚ ﺳﻌﻲ ﺧﻴﺮ ..

ﺍﻫﺎ ﺧﺖ ﻟﻲ ﺑﺎﻟﻚ ﻛﻮﻳﺲ .. ﻓﻲ ﻣﺮﺍﺓ ﺑﺘﺒﻊ ﺍﻟﻄﻌﻤﻴﺔ ﻓﻲ ﺍﻟﺒﻘﺎﻟﺔ ﺍﻟﻘﺪﺍﻡ .. ﺍﻟﺒﻌﺪ ﺑﻘﺎﻟﺔ ﻋﺒﺪ ﺍﻟﻌﺰﻳﺰ .. ﺍﺳﻤﻬﺎ ﺯﻫﺮﺍﺀ ..

ﺯﻫﺮﺍﺀ ﺩﻱ ﻣﺴﻤﻨﻬﺎ ﻣﻨﺘﻜﺎﺭﻟﻮ .. ﻃﻮﻝ ﺍﻟﺴﻨﻮﺍﺕ ﺩﻱ ﻭﻫﻲ ﻋﻨﺪﻫﺎ ﺍﻱ ﺧﺒﺮ . ﻣﻬﻤﺎ ﻛﺎﻥ ﺳﺮﻱ . ﻭﺑﺎﻟﺘﻔﺎﺻﻴﻞ .. ﻟﻮ ﻗﺪﺭﺕ ﺍﺗﻮﺻﻠﺖ ﻟﻴﻬﺎ ﻭﻛﺴﺒﺖ ﺛﻘﺘﻬﺎ .. ﺣﺘﻤﺎ " ﺣ