#من_ذاكرة_المعارك(6)
الهدف ضبط واحضار اكبر متعاونين شمال بحري
المنطقة داردوق
القوة المنفذه سرية الشرطه العمل الخاص
منطقة داردوق تقع جنوب شرق المعسكر وفي الاصل هي خارج حدود مسؤوليتنا او ممكن نقول مسؤولية مشتركة مع قاعدة حطاب العملياتيه
كنا بنمشي نشتغل فيها لمن تكتر البلاغات خصوصا انه الدعامه كانوا بجوا السوق يفتشوا حتى النسوان هنا مجرد ماتجي معلومة بالشكل دا تاني مابتفكر بتسوق القوة وتتوكل داردوق
العدو كان عندو ارتكاز ثابت في مظلة داردوق اتلحناهم وجغمنا الارتكاز دا اكتر من مرة فخلوا الارتكاز ورحلوا في كبري فريق منه بجو يشفشفوا السوق والسوق للاسف كان سوق دقلو مصغر فيه اي حاجه ممكن تلقى صيدليه كامله في الارض جنب الطماطم وبجوا يقعدوا في المنطقه يشفشفوا ويشتغلوا جبايات ويبيعوا مسروقات ....ويرجعوا
جاتنا معلومه غريبه شويه انه مروج الايس للعدو في شمال بحري اسمه جلال وساكن داردوق
بدينا تجميع معلوماتنا لقينا جلال دا ود عم قائد اكبر عصابه في شمال بحري(مامستحضر اسمه حاليا،)
وكان من قبل الحرب مقلقل المنطقه من العذبه وبعد الحرب هو وعصابته الطرشقوا مخزن مباني الجهاز الجنبهم وبقى دعامي وجلال دا كان يدو اليمين ومسؤول ملف الايس والحبوب
بعد قتل قريبه دا جلال حرم العذبه وقعد في داردوق من الاتجاه الشمالي الشرقي
اتواصلنا مع المصادر افادوا بتواجده في البيت معاهو عدد من الافراد
عملنا كروكي للموقع وللبيت وختينا خطتنا
وبسم الله اتوكلنا
المسافه بعيده كتقريب ما اقل من 15كيلو ولانه العربات المقاتله كانت بسيطه فكنا بنخاف عليها عديل😂 فالماموريات بتكون كداري وانت محمل سلاحك ومرتبك الحربي وذخائر احتياطيه وقرنوفات واربجيهات وبي تن فالموضوع فيه تعب حقيقي
وبعدا وانت متقدم بتتقدم شارع شارع تفتش وتامن وتتقدم
المهم وصلنا داردوق فصلنا قوة بقيادة دفعتي علي استلم المظله والشارع البجي من السامراب شرق ومدخل الشارع المشينا بيه نحن
باقي القوة تامين لخط الانسحاب التغطيه شمال جنوب ومعاي اكتر جماعتين تعبتهم واسود الله يحفظهم التانية بقيادة مدثر ابو كلام والتامنه بقيادة التنين فهد(التنين دي جا يوم قال لي ياعمك نحن تنانين شنو كل يوم من خط نار لي خط نار،😂)
المهم وصلنا المربع الفيه البيت دور التامنه تامين محيط المربع من الاربعة اتجاهات
ومهمتنا نحن مداهمة البيت
بعد اتاكدت من تامين المحيط قسمنا قوة الاقتحام
حانقتحم البيت من الاربعه اتجاهات في نفس الزمن
وفعلا تلبنا جوه البيت
استلمنا البيت كله في اقل من دقيقه وتفتيش الغرف بالبمبان طلعوا زي الفيران وتم ضبط المتهمين وعلى راسهم جلال
وضبط 5ك ايس واربعة قطع سلاح والحوش عبارة عن ورشه تقطيع عربات اكتر من سته عربات مقطعه وشغالين في بوكس وغرفة للتعاطي فيها اربعه اشخاص ضاربين ايس
وكمية مسروقات في البيت من الارض للسقف
وفي تلاته من العنصر النسائي جملة المتهمين 12
وكنا بنتجنب اي ذخيرة لسببين
عشان مانلقت انتباه العدو وهو قريب من الموقع وعشان جلال يعتبر صيد سمين
فعلا التحري الاولي طلع كمية المتعاونيين وولاده البوزعوا وطريقة التوزيع وانه الدعامه تجنيدهم الاساسي بالايس مجرد ماجيت تستنفر بطعنوك ايس عشان تدمن بعديها تشتغل تجيب قروش تطعن ماعندك قروش يشيلوا من دم اي واحد ويدوك
ومن ضمن التحري كان نواة لمعرفة مصدر البضاعه ودا ساقنا لوجود مصنع مخدرات للمليشيا بمنطقة قري جوار المصفاة
المهم كان عندو معلومات قيمه جدا
والحمد لله قبضناهوا من نص العدو وانسحبنا لاتجاه المعسكر مسافه 15ك او تزيد من دون خسائر ولا طلقة واحده
وبعديها جلال كب النضيف واتساقطت شبكه الترويج للعدو زي مناديل العربية ودا كان واحد من اهم اسباب انه كراع العدو تخف اتجاه السامراب والدروشاب ومحيط المعسكر
#الكتراااااااابة
ليست هناك تعليقات:
إرسال تعليق